Okhuma 37 - Emakhuwa Bible

Otekiwa wa Arka* a Wiiraana

¹ Bezaleli aahaapaka Arka* a mwiri wa akaasiya* ni miringo iya: emeetru* emoha ni vakhaani, vamoha ni eriyari ya emeetru* emoha, vamoha ni eriyari ya emeetru* emoha.

² Aahaahuruwela mpuwa ni omokoni ni eyuuma yoorikaxa yooreera alepelelaka mukhwipimwaya ni eyuuma yoorikaxa.

³ Aahaapaka annela axexe a eyuuma yoorikaxa aatthukelelaka mmaloothoni oomaxexe; annela eeli wa khula mpatta.

⁴ Vahoolowaya aapaka ikopo sa mwiri wa akaasiya*, anahuruwela ni eyuuma yoorikaxa.

⁵ Vano aavolonghera mwa annelani mpararini mwa Arka* weera eteexiwekeno.

⁶ Aapaka yookhuneelano ya eyuuma yoorikaxa yooreera ni miringo iya: emeetru* emoha ni vakhaani, vamoha ni eriyari ya emeetru* emoha.

⁷ Vahoolowaya aahaapaka akerubini* eeli a eyuuma yoorikaxa oohaniwa, enakhomeleliwa mukhwipimwaya yookhuneelano.

⁸ Aampakatho kerubini* mmoha mukerekhere wa mpatta mmoha ni anaaveeli mpatta mukina; ooweeli awo ekhalaka emohamoharu ni yookhuneelano.

⁹ Akerubini* yaakhalano mapuphaaya ookungeela ohoolo ekhuneelakano yookhuneelano. Awo yaakhalelana ohoolo ewehaka yookhuneelano.

Otekiwa wa meesa a epaawu ya Okhala*

¹⁰ Aapaka meesa a mwiri wa akaasiya* ni miringo iya: wookwanaka emeetru* emoha, vamoha ni eriyari ya emeetru* emoha, vamoha ni eriyari ya emeetru* emoha.

¹¹ Aahuruwela ni eyuuma yoorikaxa yooreera alepelelaka mukhwipimwaya ni eyuuma yoorikaxa.

¹² Aaxoratho mukhwipimwaya, mwiittaaya waari isentimeetru* ithannatthaaru, analepelela ni icaambulo sa eyuuma yoorikaxa mukhwipimwaya.

¹³ Aahanela mesa annela axexe a eyuuma yoorikaxa atthukelelaka mmaloothonimwaya oomaxexe simvolowaayamo nyettosaya mixexe.

¹⁴ Vano annela yaatthukeleliwa mukerekhere mooxoriwa weera sivolongheriwe ikopo sooteexerano meesa.

¹⁵ Vano ikopo sooteexerano meesa saapakiwe ni mwiri wa akaasiya* sihuruweliwaka eyuuma yoorikaxa.

¹⁶ Aapaka ikaruma sa meesa a eyuuma yoorikaxa yooreeraxa: Isasaanisaya nitho ikhope, ibasiya ni ikoomixi simvareliwa muteko woovuuvihera sooveleela soowura.

Onyaari wa eyuuma yoorikaxa

¹⁷ Aapaka onyaari wa eyuuma yoorikaxa yooreera woohaniwa. Nnaawonaya, mwettwaaya, ikoomixisaya, soottuvasaya ni ithutusaya sootheene saakhala etthu emohamoharu paahi.

¹⁸ Iphandi ithannamosa saakhuma woonyaarini – khula mpatta wa mwettwaaya tthaaru tthaaru.

¹⁹ Saakhala ithutu tthaaru sa emandoweira* sikhalanaka soottuvasaya ni makukhwaaya a ephandi emoha – ni hiihotho wa iphandi sootheene sikina sikhumme woonyaarini.

²⁰ Vamwettoniwaya waakhalano ithutu ixexe sa emandoweira* sikhalanaka soottuvasaya ni makukhwaaya.

²¹ Ethutu yoopacera ya mwetto yaakhala vathi wa iphandi piili soopacera sinkhuma woonyaarini; yanaaveeli vathi wa piili sinttharelana ni yanaararu vathi wa piili soomalihera – opwexerera saari ithannamosa.

²² Iphandi ni ithutusaya saakhala etthu emohamoharu ni onyaari, sootheene soopakiwa ni eyuuma yoorikaxa yooreera ni soohaniwa.

²³ Vahoolowaya aapakelatho soomwaleela ithannapiili vamoha ni soorehererano mutthambo ni soocipiherasaya sa eyuuma yoorikaxa yooreera.

²⁴ Aapaka onyaari ni ikarumasaya sootheene avarelaka muteko ikiilu* miloko miraru niithanu sa eyuuma yoorikaxa yooreera.

Altaari* a erubani

²⁵ Aahaapaka altaari* a erubani* a mwiri wa akaasiya*. Yaari oolikanela ni miringo iya: eriyari ya emeetru* emoha, vamoha ni eriyari ya emeetru* emoha, vamoha ni wookwanaka emeetru* emoha. Manyakaaya yaari etthu emohamoharu ni altaari*.

²⁶ Aahuruwela mpatta wa osulu, mipatta sikina sootheene, nitho manyaka ni eyuuma yoorikaxa alepelelaka mukhwipimwaya ni eyuuma yoorikaxa.

²⁷ Aahaapakela altaari* annela eeli a eyuuma yoorikaxa wa khula mpatta vathi wa ehuruwelelo weera sivolongheriwe ikopo sooteexerano.

²⁸ Aapaka ikopo ni mwiri wa akaasiya*, anahuruwela ni eyuuma yoorikaxa.

²⁹ Aaheekatho makhura ootteela oottikitthelano ni erubani* yoowunkhelaxa yooreera – oopakiwa ni namweeka.