Okhuma 34 - Emakhuwa Bible

Itthaabwa sinyowani sa Nlamulo

¹ Yave aamweerela Moisesi: “Mukuxe enyutto ni ephalo mwaattule itthaabwa piili sa maluku ntoko seiye soopacera ni mwa seiyo kinoolepa masu yaarimo soopacera, mwa seiyo mpwenxaanyu.

² Oxeexelo mukhale oolikaneene weera ngwele vamwaako Sinayi. Vaavaawo mwiixoonihere wa Miyo.

³ Ahikhale mukina anaarowe ni nyuwo hata anaakhale mukhwipi wa mwaako. Mpakatho mihuwo sootheene khoontthuniheriwa ociha mukhwipi mwaako.”

⁴ Hiiho Moisesi aahaattula itthaabwa piili sa maluku ntoko seiye soopacera ni oxeexelo aawela vamwaako Sinayi, ntoko Yave aamulamulenlaawe, akunxeene itthaabwa piili iye sa maluku.

⁵ Vano Yave aakhuruwa munihutteni, anakhala vaavaale ni Moisesi, alaleiyaka Nsinanawe, eyo tiiyo, Yave.

⁶ Aavira ohoolo wa Moisesi alaleiyaka: “Yave, Yave – Muluku oopixa murima ni a ikharari, oovilela, oosareya osivela ni ororomeleya,

⁷ mwa Yoowo ompwaherera ni waasivelawawe atthu oohaalikeleya, alevelelaka otakhala, ovaanya ni yoottheka. Hata hiiho, khanghiya omuttaruxa nanthowa. Owo onaattaruxa anamwane ni osuulwaaya mpaka ekhapira yanaararu ni yanaaxexe niwoko na soottheka sa asitithaya.”

⁸ Woowaakuveya Moisesi aahuuramela vathi, anamulapa,

⁹ amweerelaka: “Yave, mwatthuna okoonihera murima wooreera, munihoole. Orimweeraru muloko owo oreene woottiyamaaru, mulevelele sootakhalasahu ni sootthekasahu ni munaakhele ntoko yoohiyeraanyu.”

Oreherera wa wiiraana

¹⁰ Vano Yave aamweerela: “Kimpaka wiiraana ni nyuwo. Vamaithoni wa mulokwaanyu wootheene kinoopaka sootikhiniha sihitonke opakiwa variyari wa miloko sikina sootheene sa mweelaponi. Muloko mwa yoowo munkhalaanyu onimoona muteko wootikhiniha Miyo, Yave, kineeraaka kipake.

¹¹ Mwiiwelele yeeyo kinoolamulelaakani olelo. Kinoowoomolelani ohoolowanyu awAmori, aKanaani, aHiti, aPerizi, aHivi ni aYebusi.

¹² Mwiipasoope weera muhaataane ni yaawo amanke mweelaponi mwa weiwo munrowaanyuwo weera nyuwo muhipharihiwe ni ntaphanaya.

¹³ Ohiyanawaya, mwaaphwate altaaraaya, mwaapwexe amarimbwaaya ootteela ni mwathikile nyiri soothipeleliwa sa Axera.

¹⁴ Muhilaperu miluku sikina, niwoko Yave, mwa yoowo Nsinanawe ti Ehace, Owo ti Muluku a ehace.

¹⁵ Mwiipasoope weera muhaataane ni yaawo amanke mweelaponi. Awo yaararuwaka ni milukusaya epakelaka sooveleela, awo animoolattulani ni animookuxani weera muceno sooveleelasaya.

¹⁶ Mwaathanlaka akina a anamwanaaya asithiyana ntoko axaaraya anamwaniinyu, ni asithiyana awo yararuwa ni milukusaya, eniyeereke waakuxa anamwaniinyu asilopwana elavalaveketho.

¹⁷ Muhiipakele miluku sa iyuuma soohaniwa.

¹⁸ Muupuwelele efesta ya epaawu yoohikhalano eferementu. Muceeke ipaawu soohikhalano eferementu wa mahuku mathannameeli, ntoko koolamulenlaakani. Mpake yeeyo mweehuhuni yoothanliwa, mmweerini wa Abibi, niwoko waari mweereene yoowo mwaakhummaanyu wExipitu.

¹⁹ Matthaara ootheene ti awaka, mpakatho matthaara asilopwana a mihuwosanyu sootheene, hata imombe naari ikhondoolo.

²⁰ Matthaara ootheene a abuuru yoopoliwe ni eputtiputthi, mene mwaahitthuna woopola, vano mwintake exiko. Moopoleletho matthaara ootheene a anamwaniinyu. Ahikhale anaaphiye ohoolowaka matataru.

²¹ Mahuku mathannamosa mvareke mitekosanyu, mene nihuku nanaathannameeli mwiitthuuweke, hata ekhalaka ehuhu ya olima naari ohepha, ontthuneya wiitthuuwa nihuku nno.

²² Muupuwelele efesta ya isimana ni soohepha soopacera sa etrigu ni efesta ya ohepha ommaleloni wa eyaakha.

²³ Imaara tthaaru sa khula eyaakha asilopwana ootheene yiixoonihereke ohoolo wa Adonai Yave, Muluku a aYixrayeli.

²⁴ Miyo kinimoomola miloko ohoolowanyu ni kinimunnuwiha elapwaanyu. Nyuwo mwaawelaka imaara tthaaru sa khula eyaakha weera mwiixoonihere wa Yave Mulukwaanyu, khaawo aneera iinlele elapwaanyu.

²⁵ Muhikiveleelele ephome ya sooveleela vamoha ni yakhalaru etthu yootakansiwa eferementu ni muhixeeleleru sakhalaru sa sooveleela sa efesta ya mPaska* mpaka waaxiiye.

²⁶ Muruuhele Empa ya Yave Mulukwaanyu mpatta woopacera wooreerelaxa wa soohephasanyu. Muhimwaapeye mwaaxaana a epuri mmukakani wa amayawe.”

²⁷ Vano Yave aamweerela Moisesi: “Mulepe masu ala, niwoko ni yaala kimpaka wiiraana ni nyuwo ni aYixrayeli ootheene.”

²⁸ Moisesi aakhala vaavaale vamoha ni Yave othana miloko mixexe ni ohiyu miloko mixexe ahicaka yooca naari ahiwuraka maahi. Aalepa vamatthaabwani masu a Wiiraana – Malamulo Muloko.

Ekhove yoowaaraxa ya Moisesi

²⁹ Akhuruwaka Moisesi vamwaako akunxeene itthaabwa piili sa Namoona, khaasuwela weera ekhovaawe yaamwaara woowuuluma ni Yave.

³⁰ Aharoni ni aYixrayeli ootheene emoonakaru Moisesi ni ekhove yoowaara, yaahoova omwaattamela.

³¹ Wa soothesene, Moisesi aawiitthana ni Aharoni vamoha ni ahooleli ootheene a muloko yaarowasa, ni Moisesi aahuuluma ni yaawosa.

³² Vahoolowaya aYixrayeli ootheene yaamwaattamela ni aahaavaha malamulo ootheene Yave aamvanghaawe vamwaako Sinayi.

³³ Amalihakaru wuuluma ni yaawo, Moisesi aakhuneela ekhovaawe ni ekuwo.

³⁴ Imaara sootheenetho aavolowaawe atthunaka wuuluma ni Yave, aamwiikhunula ekuwo mpaka okhumawawe. Imaara sootheene aakhumaawe aaleelaka aYixrayeli yeeyo aalamulelingwaawe,

³⁵ yannoona weera ekhovaawe yannaaraxa. Vano annakhuneela ekhovaawe ni ekuwo mpaka ovolowatho weera uulume ni Yave.