Okhuma 32 - Emakhuwa Bible

Mwaamombe a eyuuma yoorikaxa

¹ Muloko woonaka weera Moisesi annapisa vancipale okhuruwa vamwaako, waathukumana omurukureeraka Aharoni, onamweerela: “Nkarwani, munipakele miluku sineera sinihoolele. Vano Moiseseene yoowo onikhumihale wExipitu – khanisuwenle emukhumelenle.”

² Aharoni aahaakhula: “Mwaarule axiveeve a eyuuma yoorikaxa yaawanraaya axaarinyu ni anamwaniinyu asilopwana ni asithiyana ni mukiruuhele.”

³ Vano atthu ootheene yaahaarula axiveeve a eyuuma yoorikaxa, enamuroihela Aharoni.

⁴ Aahaakuxa yaawo yaamuruuhenlaaya, anaahana, aatatuxaka ootheenaawo muluku oowootha akhalanaka ekhalelo ya mwaamombe. Vano awo yaaheera: “aYixrayeli, iya va milukusanyu sookhumihaleni wExipitu.”

⁵ Oonaka yeeyo, Aharoni aahaateka altaari* ohoolo wa mwaamombe, analaalika: “Omaalo eniikhale efesta wa Yave.”

⁶ Oxaawaya atthu yaavenya oxeexelo enapaka sooveleela soohisa ni sa murettele. Vahoolowaya yaakilaathi weera ece ni ewure ni yaapacera ococopolana.

⁷ Vanonto, Yave aamweerela Moisesi: “Mukhuruweke, niwoko mulokwaanyu, mwa yoowo mukhumihalaanyu wExipitu, woohapuwela ephiro yoolokottha.

⁸ Woowaakuveya aahiya yeele kaalamulenlaaka ni ahiipakela muluku oowootha mmukhaleloni wa mwaamombe. Awo aamuuramela empakelaka sooveleela, yeeraka: ‘aYixrayeli, iya va milukusanyu sookhumihaleni wExipitu.’”

⁹ Yave aapwaherera eeraka: “Kohoona weera muloko owo woottiyamaaru!

¹⁰ Vano mukihiyeke weera waanyoonyeriwawaka waapattele ni weera kaaphwate! Vahoolowaya kinimootatuxerani muloko mutokotoko.”

¹¹ Wa soothesene, Moisesi aamudyoonttelela Yave, Mulukwaawe, akhuwelaka: “Yave, heeni munnyoonyeriwaanyu mulokwaanyu owo, mwa yoowo mukhumihalaanyu wExipitu ni ikuru sitokotoko ni ntatananyu noolipaxa?

¹² Muntthuna weera awExipitu yeere: ‘Owo aahaakhumiha ni murima woonanara weera awiivele mmanyaakoni ni aaphwatele mweelaponimu? Mukurunuxe isarasanyu soowoopiha! Muupuwele moota mukina ni muhiruuhele yoonanara eyo mulokwaanyu.

¹³ Muupuwelele sa arumeiyaanyu Abrahaamu, Isaki ni Yakobe. Nyuwo mwaahiilipela: ‘Nkaandyeerere ekhapiraanyu ntoko ithenyeeri sa wiirimu ni kinoovaha elapo yootheene ela kaaroromelinghaaka. Eniikhale yoohiyeriwaaya wa mahuku ootheene.’”

¹⁴ Vano Yave aaceendya soowuupuwelasawe ahipakelaka mulokwaawe yoonanara oopopiheraawe.

¹⁵ Moisesi aakhuruwa vamwaako, akunxeene itthaabwa piili sa Namoona. Iye saalempwe ninno ninno.

¹⁶ Itthaabwa saapakiwe ni Muluku, yeeyo yaalempwemo aalempe Muluku, silempwe mmatthaabwani.

¹⁷ Yoxuwa iiwakaru onyakula wa atthu ekhuwelaka, aamweerela Moisesi: “Wookhala onyakula wa ekhotto okonelingwe.”

¹⁸ Moisesi aamwaakhula: “Khoohiyono oruma wa owina naari owiniwa – kiniiwa oruma wa icipo.”

¹⁹ Moisesi aattamelaka waakonelingwe ni amoonakaru mwaamombe ni atthu yiinaka, aanyoonyiwa vancipale. Aavonyera vathi mukerekhere mwaako itthaabwa saari mmatatanimwawe apwexaka.

²⁰ Aamukuxa mwaamombe awosa yaampankaaya, anamuhisa. Vahoolowaya aamuxila mpaka oxileya, aahootowela mmaahini, aanyesererihaka aYixrayeli owura.

²¹ Aamweerela Aharoni: “Atthu ala aweeringheni weera nyuwo mwaaruuhele yoottheka etokotoko ela?”

²² Aharoni aamwaakhula: “Muhinyoonyiwe pwiiyaaka. Moosuwela nnenesene weera muloko ola ontthuna opaka soonanara.

²³ Awo yaakeerela: ‘munipakele miluku sineera sinihoolele. Vaheera Moiseseene yoowo aanikhuminghe wExipitu – khanisuwenle emukhumelenle.’

²⁴ Vano miyo kaaweerelasa: ‘Ootheene arino itthu sa iyuuma soorikaxa, ekiruuhele. Awo yaakiruuhela eyuuma yoorikaxa, kinavonyera mmooroni anakhumelela mwaamombe owo!”

²⁵ Moisesi aahoona weera atthu yaaheettela moota woohiiwelela ni weera Aharoni aahaahiya waawehaweha ni hiiho amwiittanaaya yannaatheya.

²⁶ Vano aaheemela vamulako wa waakhoneliwe, aneera: “Yaawo ari mpatta wa Yave, ethukumane ni miyo.” Ootheene a epuumba ya Leevi yaathukumana ni yoowo.

²⁷ Vano Moisesi aaweerela:“Yave, Muluku a Yixrayeli oneera ha: ‘Khula mutthu iitthukele nluwonawe aviravire okonelingwe khula eheema ni amwiivaka munneiye, nthamwenaawe ni mwaattamanaawe.’”

²⁸ aLeevi yaapaka yeeyo Moisesi aalamulenlaawe ni nihuku nne yaahookhwa atthu wookwanaka macira miloko miraru variyari wa muloko.

²⁹ Moisesi aaweerela: “Nyuwosa olelo mohiitteelihera Yave, niwoko khaawo a nyuwosa omuurenle mwanawe naari munneiye moota wooweera Yave ohooreelihasani nihuku nna.”

³⁰ Oxaawaya Moisesi aaheerela muloko: “Nyuwosa mootthekaxa, mene kinoowela wa Yave. Apaale kinoowera wiiraanyiha wa yootthekaanyu.”

³¹ Moisesi aahokoleela wa Yave, anamweerela: “Ii! Muloko wootthekaxa! Wohiipakela miluku sa eyuuma yoorikaxa.

³² Vanonto, dyoontte, mulevelele yootthekaaya. Mwaahilevelela, mucipihe nsinanaka mulempaanyu mulivurinimwanyu.”

³³ Yave aamwaakhula Moisesi: “Kinoocipiha mulivurunimwaka masina a ootheene yaale akitthekenle.”

³⁴ Vano, murowe, mwahoolele muloko wa nipuro Miyo kooleenlaakani, ni ndyelowaaka onimoohoolelani. Wa soothesene, yaphiyera ehuhu yoottaruxa, kinimwaattaruxa niwoko na yootthekaaya.”

³⁵ Yave aaruuhela muloko nihooxo niwoko waamvekela Aharoni ompaka mwaamombe.