Okhuma 26 - Emakhuwa Bible

Etabernaakulu

¹ Mpake etabernaakulu* ni iluttu muloko sa mpuwa wa ikuwo sa eliinyu* sootthaveliwa ni sa kanka, sookankela ni sooxeera. Vano mulamulele oxoriwamo akerubini*.

² Iluttu sootheene silikaneleke: imeetru* muloko ni piili ni eriyari ya emeetru*, vamoha ni emeetru* emoha ni wookwanaka imeetru* piili.

³ Muluttanye iluttu ithanu sa mpuwa ekina ni ekhwaaya ni mpake hiiho ni ithanu sikina iyo.

⁴ Muttotthelele miramba sa ekuwo ya kanka mukhwipi wa eluttu yookisera ya ithanu soopacera ni hiihotho eluttu yookisera ya ithanu sikina.

⁵ Muttotthele miramba miloko mithanu muluttuni yookisera ya ithanu soopacera nitho miramba miloko mithanu muluttuni yookisera ya ithanu sikina moota wooweera miramba siwehaneke.

⁶ Vano mpake ivarelelo miloko mithanu sa eyuuma yoorikaxa muneeraanyu mutthukeleleno iluttu sa mpuwa ekina ni ekhwaaya weera etabernaakulu* ekhaleke emohamoharu.

⁷ Moopopanye iluttu muloko niimoha sa mapururu a ipuri mpake eheema yookhuneelano etabernaakulu*.

⁸ Iluttu muloko niimoha silikaneleke: imeetru* muloko ni tthaaru ni eriyari ya emeetru*, vamoha ni emeetru* emoha ni wookwanaka imeetru* piili.

⁹ Muluttanye mpatta mmoha iluttu ithanu nitho ithannamosa sikina mpatta mukina. Mupintte mipatta miili eluttu yanaathannamosa ohoolo wa eheema.

¹⁰ Muttotthelele miramba miloko mithanu mukhwipi wa eluttu yookisera ya ithanu soopacera ni miramba miloko mithanu mukhwipi wa yookisera ya ithannamosa sikina.

¹¹ Vano mpake ivarelelo miloko mithanu sa ebronze* ni muhele mmirambani weera eheema ekhale emohamoharu.

¹² Enghala mweerakameloni wa iluttu sa eheema, nkhwapa onuuhale, otthukeleliweke opithela wa etabernaakulu*.

¹³ Vano khula mpatta wa iluttu muloko onghala eriyari ya emeetru* emoha, ni yeeyo enghala etthukeleliweke mipatta miili sa etabernaakulu* weera ekhuneeleke.

¹⁴ Mpakeletho yookhuneelela eheema ya ixapala sa amaankhoro sooningiwa yooxeera, ni vasuluwaya ixapala soohukhiwa.

Sootekela etabernaakulu

¹⁵ Mwaapakele acikhi a mwiri wa akaasiya* etabernaakulu*.

¹⁶ Khula cikhi akhaleke ni miringo iya: imeetru* ixexe, vamoha ni eriyari ya emeetru* emoha.

¹⁷ Khula cikhi alubaanyihiweke veeli weera akumane ni mukhwaawe. Ti hiiho muneeraanyu mwaalumbaanyiheke acikhi ootheene.

¹⁸ Mwaapakeke acikhi miloko miili ohitto wa etabernaakulu*

¹⁹ ni vathiwaya nyettosaya miloko mixexe sa eparatha* – nyetto miili wa khula cikhi; mmoha vathi wa khula makumano.

²⁰ Vano wa mpatta mukina ori ottuttuwani wa etabernaakulu* mwaapake acikhi muloko miili

²¹ ni vathiwaya nyettosaya miloko mixexe sa eparatha* – nyetto miili wa khula cikhi.

²² Mwaapake acikhi athannamosa mpatta ninkela nsuwa wa etabernaakulu*

²³ ni acikhi eeli mpatta wa ottuli mmaloothoni.

²⁴ Acikhi a mmaloothoni meeli awo ephitaanyiweke okhuma vathi mpaka osulu etthukiweene ni munela mmoha. Ooweeli epakiweke moota mmoha.

²⁵ Mooteene yoowo eniikhale acikhi athannaararu ni nyetto muloko ni mithannamosa sa eparatha*; miili vathi wa khula cikhi.

²⁶ Mwapaketho mikoomba mithanu sa mwiri wa akaasiya* wa acikhi a mpatta mmoha wa etabernaakulu*,

²⁷ mithanu wa acikhi a mpatta mukina nitho mithanu wa yaawo a mpatta ninkela nsuwa, opithela wa etabernaakulu*.

²⁸ Vano mukoomba wa eriyari okhumeke okhwipi mpaka okhwipi variyari wa acikhi.

²⁹ Mwaahuruweleke acikhi ni eyuuma yoorikaxa yooreera ni mwaapake annela a eyuumeene yeeyo oolipiherano mikoomba. Vano mikoomba iyo sihuruweliweketho eyuumeene yeeyo.

³⁰ Mwapake etabernaakulu* mooteene yoowo mooniheringwaanyu omwaako.

Eluttu yookawanya

³¹ Mwapake eluttu yookawanya ya eliinyu* yootthaveliwa ni ya kanka, yookankela ni yooxeera ni mwalamulele oxoriwamo akerubini*.

³² Mwakwettihere eluttu eyo mweevareleloni ixexe mwaamarimbuni axexe a mwiri wa akaasiya* ahuruweliwe ni eyuuma yoorikaxa ni yeemexeriwe mwettwaaya wa eparatha*.

³³ Mwakwettihere eluttu mweevareleloni ni mwawiikaathi Arka* a Wiiraana ottuli wa eluttu. Vano eluttu eyo eniikawanyihe Nipuro Nootteela* ni Nootteelaxa*.

³⁴ Vanonto, mwiikaathere yookhuneelano wa Arkani* a Wiiraana vaNipuroni Nootteelaxa*.

³⁵ Mwiikaathi meesa omokoni wa eluttu eyo mpatta wa ottuttuwani wa etabernaakulu* ni onyaari ohoolowaya meesa, mpatta wa ohitto.

³⁶ Mwapakele eluttu wa mulako wa eheema ya eliinyu* yootthaveliwa ni ya kanka, yookankela ni yooxeera, yoopakiwa ni namaxora.

³⁷ Mwapakele eluttu ivarelelo ithanu ni amarimbu athanu a mwiri wa akaasiya* ni mwaahuruwele ni eyuuma yoorikaxa. Mwarumihe ohaneliwa nyetto mithanu sa ebronze* wa yaawo.