Okhuma 25 - Emakhuwa Bible

Sooveleela sa etabernaakulu*

¹ Yave aamweerela Moisesi:

² “Mwaaleele aYixrayeli weera ekiruuhele sooveleela. Mwaakhelele sa yoole omvaha ni murima wootheene.

³ Sooveleela muneeraanyu mwaakhele wa yaawo ti iya: Iyuuma soorikaxa, ebronze*,

⁴ ikuwo sooxeera, sa kanka ni sookankela, ikuwo sootteettheya, mapururu a ipuri,

⁵ ixapala sa amaankhoro sooningiwa yooxeera, exapala yoohukhiwa, mwiri wa akaasiya*;

⁶ makhura oomwaleelela, itthu sooreerela sintakansiwano makhura oottikitthelano ni erubani* yoowunkhelaxa;

⁷ onikisi* ni maluku makina oowaaraxa weera ettottheleliwe wa mooxikoottini a esaserdoti ni ya vakakasani.

⁸ Vahoolowaya mukitekele Nipuro Nootteela* weera kimake variyari wa muloko.

⁹ Mwateke etabernaakulu* vamoha ni itthusaya sootheene muttharaka nnenesene ekhalelo kineeraaka kiwoonihereni.

Etabernaakulu*

¹⁰ Mwaapake Arka* a mwiri wa akaasiya* ni miringo iya: emeetru* emoha ni vakhaani, vamoha ni eriyari ya emeetru* emoha, vamoha ni eriyari ya emeetru* emoha.

¹¹ Mwaahuruwele mpuwa ni omokoni ni eyuuma yoorikaxa yooreera mulepelelaka mukhwipimwaya ni eyuuma yoorikaxa.

¹² Mwaapake annela axexe a eyuuma yoorikaxa ni mwaatthukelele mmaloothoni oomaxexe; annela eeli wa khula mpatta.

¹³ Vahoolowaya mwapake ikopo sa mwiri wa akaasiya* ni muhuruweleke ni eyuuma yoorikaxa.

¹⁴ Mvolonghere mwa annelani mpararini mwa Arka* weera eteexiwekeno.

¹⁵ Ikopo sikhaleke mwa annelani a Arka*; sihivenxiweke.

¹⁶ Vano mwaheleke mwa Arkani* Namoona* kineeraaka koovaheeni.

¹⁷ Mwapake yookhuneelano ya eyuuma yoorikaxa yooreera ni miringo iya: emeetru* emoha ni vakhaani, vamoha ni eriyari ya emeetru* emoha.

¹⁸ Mwaapake akerubini* eeli a eyuuma yoorikaxa oohaniwa, mukhwipimwaya yookhuneelano.

¹⁹ Mumpake kerubini* mmoha mukerekhere wa mpatta mmoha ni anaaveeli mpatta mukina, ooweeli awo ni yookhuneelano emohamoharu.

²⁰ Akerubini* ekhalaneke mapuphaaya ookungeela ohoolo ekhunelenleeneno yookhuneelano. Awo ekhalelaneke ohoolo yuuramenleene yookhuneelano.

²¹ Ngwiikaathereke yookhuneelano Arka*, ni mpuwamwaya Namoona* kineeraaka koovaheeni.

²² Vawo, vasulu yookhuneelano variyari wa akerubini* eeli ari vasulu wa Arkani* a Namoona, kinoophwanyaneya ni nyuwo ni kinimoovahani malamulowaaka ootheene yeereliwe aYixrayeli.

Meesa ni epaawu ya Okhala*

²³ Mwapake meesa a mwiri wa akaasiya* ni miringo iya: wookwanaka emeetru* emoha, vamoha ni eriyari ya emeetru* emoha, vamoha ni eriyari ya emeetru* emoha.

²⁴ Mwahuruwele ni eyuuma yoorikaxa yooreera mulepelelaka mukhwipimwaya ni eyuuma yoorikaxa.

²⁵ Muheleketho muxoreke mwiittaaya isentimeetru* ithanu ni tthaaru ni mulepelele ni icaambulo sa eyuuma yoorikaxa mukhwipimwaya.

²⁶ Mwaapake annela axexe a eyuuma yoorikaxa ni mwaatthukeleleke mmaloothonimwaya oomaxexe simvolowaayamo nyettosaya mixexe.

²⁷ Vano annela etthukeleliweke vakhiviru ni mooxoriwa weera annela singhuleeliwaayamo ikopo sinteexeriwa meesa ekhale oolipeene.

²⁸ Mwapake ikopo sa mwiri wa akaasiya* muhuruwelaka eyuuma yoorikaxa ni ekuxiwekeno seiyo.

²⁹ Mwapakele ni eyuuma yoorikaxa isasaanisaya nitho ikhope, ibasiya ni ikoomixi simvareliwa muteko woovuuvihera sooveleela soowura.

³⁰ Mwiikaathi vameesa epaawu ya Okhala* weera ekhale ohoolowaka mahuku ootheene.

Onyaari wa eyuuma yoorikaxa

³¹ Mpake onyaari wa eyuuma yoorikaxa woohaniwa. Nnaawonaya, mwettwaaya, ikoomixisaya, soottuvasaya ni ithutusaya sootheene sikhaleke etthu emohamoharu paahi.

³² Iphandi ithannamosa sikhumeke woonyaarini – khula mpatta wa mwettwaaya tthaaru tthaaru.

³³ Sikhaleke ithutu tthaaru sa emandoweira* sikhalanaka soottuvasaya ni makukhwaaya wa ephandi emoha – ni hiihotho wa iphandi ithannamosa sootheene sinkhuma woonyaarini.

³⁴ Vanonto mwettwaaya okhalaneke ithutu ixexe sa emandoweira* sikhalanaka soottuvasaya ni makukhwaaya.

³⁵ Ethutu yoopacera ya mwetto ekhaleke vathi wa iphandi piili soopacera sinkhuma woonyaarini; yanaaveeli vathi wa piili sinttharelana ni yanaararu vathi wa piili soomalihera.

³⁶ Iphandi ni ithutusaya sikhaleke etthu emohamoharu ni onyaari, sootheene soopakiwa ni eyuuma yoorikaxa yooreera ni soohaniwa.

³⁷ Vahoolowaya mpakeleketho soomwaleela ithannapiili ni muhelelekewo weera simwaleeleke ohoolowaya.

³⁸ Soorehererano mutthambo ni soocipiherasaya sikhaleke sa eyuuma yoorikaxa yooreera.

³⁹ Vano mvareleke muteko ikiilu* miloko miraru niithanu sa eyuuma yoorikaxa yooreera weera mpake onyaari ni ikarumasaya sootheene.

⁴⁰ Mwiipasoope woopaka muttharaka moota muxutterihiwaanyu omwaako.