Okhuma 24 - Emakhuwa Bible

Ephome ya wiiraana

¹ Vano Yave aamweerela Moisesi: “Ngweleke vamwaako weera munkumaneno Yave – nyuwo vamoha ni Aharoni, Nadabi, Abiyu ni asitokweene miloko mithannamiili a aYixrayeli. Mulape ottai ottai.

² Moisesi paahi ti aneera amwaattamele Yave; akinaawo hoye. Mulokotho ohiwele ni yoowo.”

³ Moisesi aarowa wa muloko, anathalihera masu ni ikano sootheene sa Yave ni awosa yaamwaakhula moota mmoha: “Nnoopaka sootheene Yave olamulenlaawe.”

⁴ Vano Moisesi aalepa sootheene Yave aahimmaawe. Oxaawaya aavenya, anaateka altaari* mukerekhere mwaako, anaweemexa amarimbu muloko neeli a maluku ethoonyeraka ipuumba muloko ni piili sa aYixrayeli.

⁵ Vahoolowaya aahaarumiha amiravo aYixrayeli yaapanke sooveleela soohisa ni yaawiiva axaana a imombe ntoko sooveleelela murettele wa Yave.

⁶ Moisesi aakuxa mpatta mukina wa ephome, anahela mmayoopweni ni mpatta mukina aayeehera mukhwipi altaari*.

⁷ Vahoolowaya aasomela muloko Elivuru ya Wiiraana. Awo yaamwaakhula: “Nnoopaka moororomeleyani sootheene Yave olamulenlaawe.”

⁸ Vano Moisesi aamisa muloko ni ephome eeraka: “Ela ti ephome ya wiiraana Yave ompakaawe ni nyuwo ngwiiwananani ni masu ootheene ala.”

⁹ Moisesi, Aharoni, Nadabi, Abiyu ni asitokweene miloko mithannamiili a aYixrayeli yaawela

¹⁰ ni yaamoona Muluku a aYixrayeli. Vathi wa inaawosawe yaakhalawo yoonyikalela maluku a safira*, waarawaya ntoko erimu.

¹¹ Wa soothesene, Muluku khaattarunxe asitokweene a muloko wa aYixrayeli. Yaamoona Muluku, vahoolowaya yaahooca, enawura.

Moisesi ohoolo wa Muluku

¹² Yave aamweerela Moisesi: “Ngwele mwaako, murwe wa Miyo ni mukhale va. Kinimoovahani itthaabwa sa maluku sikhalanaka malamulo ni ikano kilempaaka weera muxuttiheno muloko.”

¹³ Vano Moisesi aapwaha vamoha ni Yoxuwa, namakhaviheraawe, enawela vamwaakoni wa Muluku.

¹⁴ Moisesi aaweerela asitokweene: “Muniweherere wenno mpaka nneeraahu nihokolowe. Aharoni ni Huri anoohala ni nyuwo. Yoowo anaakhalane mulattu, awaasaaseke yaawosa.”

¹⁵ Moisesi awelakaru, nihutte naakhuneela mwaako,

¹⁶ ni ovuwa wa Yave waakhala vamwaakoni Sinayi. Nihutte naakhuneela mwaako wa mahuku mathannamosa ni nihuku nanaathannameeli Yave aamwiitthana Moisesi munihutteni.

¹⁷ Vamaithoni wa aYixrayeli ovuwa wa Yave waari ntoko mooro woohisa vasulu mwaako.

¹⁸ Moisesi awelaka mwaako, aavolowa munihutteni. Vano aakhalamo othana miloko mixexe ni ohiyu miloko mixexetho.