Okhuma 19 - Emakhuwa Bible

Ophiya wa aYixrayeli omwaako Sinayi

¹ Nihuku yaakwaniherasaaya nyeeri miraru aYixrayeli evennyeene wExipitu, yaaphiyasa nikare na oSinayi.

² Evennyeene oRefidimi, yaavolowa munikareni na oSinayi ni aYixrayeli yaakonelawo mukerekhere mwaako.

³ Vano Moisesi aawela mwaako weera amukumaneno Muluku ni Yave aamwiitthana wa mwaako eeraka: “Mwaleele masu ala ekhapira ya Yakobe, aYixrayeli:

⁴ “Nyuwo mohoona yeeyo kaapakenlaaka awExipitu ni moota kookuxalaakani mmapuphani mwa xaaka ni kooruuhalaakani wa Miyo.

⁵ Vano mwakiiwelela oororomeleyeene ni mwathokorora wiiraanyihawaka, munookhala atthu ootthuneyaaka variyari wa miloko sootheene. Erookhalaru elapo yootheene yawaka,

⁶ nyuwosa munookhala omwene wa asaserdoti* ni mulokwaaka wootteela.’ Mwaaleele masu ala aYixrayeli.”

⁷ Vano Moisesi aahokolowa, anaawiitthana asitokweene a muloko ni aahaathalihera masu ootheene Yave aamulamulenlaawe ohima.

⁸ Muloko wootheene waamwaakhula vamoha: “Hiyo nnoopaka sootheene Yave olamulenlaawe.” Hiiho Moisesi aamuronghela Yave yoowaakhulaaya.

⁹ Yave aamweerela Moisesi: “Kinimoorwa wa nyuwo munihutteni nooriipihana weera muloko okiiwaka wuuluma, woororomeleni mahuku ootheene.” Vano Moisesi aamuthalihera Yave yoowaakhula ya muloko.

¹⁰ Yave aamweerela Moisesi: “Murowe wa muloko ni mwatteelihe olelo ni omaalo. Awosa ecapeke soowarasaya

¹¹ weera ekhale oolikaneene munihukuni nanaararu. Nihuku nenenenno Yave onookhuruwela vamwaakoni Sinayi, muloko wootheene woonaka.

¹² Mwakhalihere mipika sirukureenreene mwaako ni mwaleele muloko: ‘Mwiipasoope weera muhiwele mwaako hoye hoye muhiphiye omenlaaya mwaako. Yoowo aneera aphiye vamwaako vekhaikhai iiviwe.

¹³ Owo onoovonyiwa maluku hoye hoye onimwiiviwa ni nyuupa. Ahikhale aneera atave ni ntata. Hata mutthu, naari mwaamunama khankhala ni okumi. Paahi naruma nipalapatta awo eweleke vamwaako.’”

¹⁴ Moisesi akhuruwakaru vamwaako, aatteeliha muloko ni awo yaacapa soowarasaya.

¹⁵ Aaweerela atthu: “Mwiirehererele nihuku nanaararu ni muhikoneno axaarinyu.”

¹⁶ Oxa wa nihukuni nanaararu saahoopa itari ni overinya ni mwaako waakhuneeliwa ni nihutte nooriipihana ni nipalapatta naaruma vancipalexa. Atthu ootheene a waakonelingwe yaathukumela ni woova.

¹⁷ Moisesi aakhumihera muloko okerekhere wa waakoneliwe weera wakumane ni Muluku, ni awosa yaaheemela mukerekhere mwaako.

¹⁸ Vano mwaako Sinayi waakhuneeleya ni mwiixi, niwoko Yave aakhuruwela vaavaawo ni malumi a mmooroni. Mwa yoowo waatthuwa mwiixi ntoko wa niikho ni mwaako wootheene waatetereya vancipale

¹⁹ ni oruma wa nipalapatta wannapwaherera wiiwanyeyaxa. Vano Moisesi aahuuluma, ni Muluku aamwaakhula mutarini.

²⁰ Yave aakhuruwela vatthomelani wa mwaako Sinayi ni aamwiitthana Moisesi vasulu mwaako. Moisesi aawela

²¹ ni Yave aamweerela: “Mukhuruwe ni mwawooperere atthu weera ehituphe mipika weera emoone Yave. Yeera hiiho, ancipale eniikhwe.

²² Mpakatho asaserdoti* yaamwaattamelaka Yave yiitteeliheke weera Yave ahaaphwate.”

²³ Vano Moisesi aamwaakhula Yave: “Atthu khaangwera owela mwaako Sinayi, niwoko Nyuwo muneenaanyu moonooperera: ‘mukhalihe mipika sirukureenreene mwaako ni mweereleke wootteela.”

²⁴ Yave aamwaakhula: “Mukhuruwe ni munrwaane Aharoni. Vaheera asaserdoti* ni atthutho ehituphe mipika etthunaka owela wa Yave weera Yave ahaaphwate.”

²⁵ Vano Moisesi aakhuruwa, anooperera muloko.