Okhuma 16 - Emakhuwa Bible

Emana* ni anapiri a wiirimu

¹ aYixrayeli ootheene yaattimula wElimi, enaphiya onikareni na oSini weenre nno wElimi ni oSinayi. Naari nihuku nanaamuloko ni mathanu na mweeri wanaaveeli evennyeene wExipitu.

² Munikareni muloko wootheene wa aYixrayeli waamuttaandawula Moisesi ni Aharoni.

³ aYixrayeli yaaweerela: “Eya! Fataari Yave aaniivenle wExipitu! Wuuwu naakilaathi nrinceene nyaapu sa enama ni naaca yooca naatthunelaahu. Vaheera nyuwo muniruuhenle munikarenimu weera nakupa ootheene ola akhwe etala.”

⁴ Wa soothesene, Yave aamweerela Moisesi: “Miyo kinoowiitthelelasani sooca sa wiirimu. Khula nihuku muloko onoovenyera ottottaka yookwana oca wa nihukuni. Mwa yeeyo kinoowoota murima weera kiwoone yaattharaka hoye hoye yaahittharaka ikanosaka.

⁵ Vano, vanihukuni nanaathannamosa, yiittotteleke ya mahuku meeli weera erehereriwe.”

⁶ Hiiho Moisesi ni Aharoni yaaweerelasa aYixrayeli ootheene: “Wiilaka mmwisuwele weera ti Yave ookhumihaleni wExipitu.

⁷ Vano omaalo ohinaxeru munimoonasa ovuwa wa Yave, niwoko ohiiwa omuttaandawulawanyu. Hiyo taani weera nyuwosa munikhupanye?”

⁸ Moisesi aaweerelatho: “Yave onimoovahasani enama yookhuura waaxekuwaka, ni sooca muntthunelaanyu oxeexelo, niwoko ohiiwa omuttaandawulawanyu. Hiyo taani? Khamunnikhupanya hiyo, mene Yave.”

⁹ Vano Moisesi aamweerela Aharoni: “Muleele muloko wootheene wa aYixrayeli: ‘Mwiixoonihere ohoolo wa Yave, niwoko Owo ohiiwa wiikhupanyerawanyu.’”

¹⁰ Aharoni uulumaka ni muloko wootheene, yaawehasa ootheene onikareni ni ovuwa wa Yave waakhumelelawo vanihutteni.

¹¹ Yave aamweerela Moisesi:

¹² “Kohiiwa ottaandawula wa aYixrayeli. Mwaaleele: ‘Wiilaka munookhuura enama; waaxaaka munoovonasa yooca. Hiiho munoosuwelasa weera Miyo ti Yave Mulukwaanyu.’”

¹³ Wiilaka yaahoorwa anapiri yaakonenlaayawo ni oxeexelo naahiima nikame nincipalexa nirukureenreene yaakonelasiyaayawo.

¹⁴ Nimorakaru nikame, saahalahala vathi itthu sikhaanene sivaranneene pharamanda.

¹⁵ Vano aYixrayeli yoonakaru yeeyo yaaheerelana: “Eheeni yeela?” Khayaasuwelasa yeereiya. Moisesi aaweerela: “Ela ti yooca Yave oovahasiyaaweni weera muce.

¹⁶ Yave aavaha nlamulo nna: ‘Khula pwattapwattha a emusi akhupeke ontthunelaawe. Akuxe ikiilu* piili wa khula mutthu a muheemanimwawe.’”

¹⁷ aYixrayeli yaapaka yeeyo yaaleeliwaaya – akina yaakhupa yoowaatta; akina vakhaaneene.

¹⁸ Eringakaru ni waatta wa ikiilu* piili yaawo yaakhumpe yincipale khayaahanle, ni yaawo yaakhumpe vakhaani yaakwanela. Khula mutthu aakhupa aatthunelaawe.

¹⁹ Vano Moisesi aahaalamulela: “Ahikhale aneera axeelele ya omaalo.”

²⁰ Wa soothesene, akina a yaawo khayaamwiiwelenle Moisesi ni yaaxeelela vakhaani mpaka waaxiiye. Mene yeeyo yaasareya nyuungu ni yaahunkha woovirula. Tivawo Moisesi aanyoonyeringwaawe.

²¹ Khula oxeexelo ootheene yannakhupasa yaatthunelaaya, niwoko nsuwa naavihaaya iyo sannatothowa.

²² Nihuku nanaathannamosa yaakhupasa ya mahuku meeli – ikiilu* ixexe wa khula mutthu. Vano asitokweene a aYixrayeli yaarowa omuthalihera Moisesi.

²³ Owo aahaathalihera: “Nlamulo na Yave ti nna: ‘Omaalo nnikhale nihuku na wiitthuuwa; eSaabadu yootteeliheriwa Yave. Mooxeke ni mwaapeyeke muntthunelaanyu. Muthokororeke enghala mpaka waaxiiye.”

²⁴ Hiiho yaathokorora yeeyo mpaka waaxiiye, ntoko Moisesi aalamulenlaawe ni khayunkhaleru hata khayaarino nyuungu.

²⁵ Moisesi aaweerela: “Mucaaseke olelo, niwoko olelo ti eSaabadu ya Yave. Olelo nyuwosa khamuphwanyawo.

²⁶ Wa mahuku mathannamosa mukhupaseke, vaheera nihuku nanaathanameeli khamuphwanya etthu.”

²⁷ Waarookhalaru hiiho, akina a yaawo yaavenya nihuku nanaathannameeli weera yakhupe, mene khayaaphwannye etthu.

²⁸ Vano Yave aamweerela Moisesi: “Mpaka yaakhani muneeraanyu muhiye orambura ikanosaka ni malamulowaaka?

²⁹ Muupuwelele weera Yave ohoovahani nihuku na eSaabadu, tivawo nihuku nanaathannamosa Owo onnoovahani sooca sa mahuku meeli. Nihuku na eSaabadu, khula mutthu akhaleke vanipuroniwawe; ahikhale aneera avenye.

³⁰ Vano muloko waahiitthuuwa nihuku nanaathannameeli.

³¹ aYixrayeli yaatteha yooca ele emana*. Yaari yootteela ntoko etthabwe ni yaasiva ntoko mukotto wa oravo.

³² Moisesi aaheera: “Nlamulo na Yave ti nna: ‘Mukuxe ikiilu* piili sa emana* weera mukhapelelele ikhapira sa muhoolo weera yoone sooca koovanghaakani munikareni Miyo kookhumihaakani wExipitu.’”

³³ Moisesi aamweerela Aharoni: “Muhele mutthuni yookwana ikiilu* ixexe sa emana*. Vahoolowaya mwiikaathi ohoolo wa Yave weera ekhapeleleye wa ikhapira sa muhoolo.”

³⁴ Aharoni aahiikaathi emana* ohoolo wa Namoona* weera ekhapeleleye vaavaale, ntoko Yave aamulamulenlaawe Moisesi.

³⁵ aYixrayeli yaahooca emana* wa iyaakha miloko mixexe mpaka yaaphiyaaya elapo yoomakeya. Yaahooca emana* mpaka yaaphiyaaya mwiinano wa oKanaani.

³⁶ Vano miringo yaakhupelaya khula nihuku ti mpatta wanaamuloko wa efa*.