Okhuma 13 - Emakhuwa Bible

Otteelihiwa wa matthaara

¹ Yave aamweerela Moisesi:

² “Mukitteelihere matthaara ootheene. Khula ntthaara na muloko ti nawaka; khaahiyono paahi atthuru, menetho axinama.”

³ Vano Moisesi aaheerela muloko: “Muupuwelele nihuku nna nyuwo mwaakhumalaanyu wExipitu, elapo ya okaporwaanyu, niwoko Yave ohookhumihani iwe ni ntatanawe nooweraxa. Muhiceru yooheliwa eferementu.

⁴ Nihuku nna na mweeri wa Abibi, nyuwo mookhuma.

⁵ Yave oovoleihakani mweelaponi ya aKanaani, aHiti, awAmori, aHivi ni aYebusi, vano muupuwelele opaka efesta mweereene yoola. Ti elapweene yeeyo Owo aaroromelinghaawe ni nlipelo makholowaanyu weera aarwa woovahani; elapo yoosareya oravo ni mukaka.

⁶ Wa mahuku mathannameeli muceeke epaawu yoohikhalano eferementu ni nihuku nanaathanameeli mumpakele Yave efesta ela.

⁷ Muceeke epaawu yoohikhalano eferementu wa mahuku mathanameeli awo. Ehiphwanyaneyeru yookhalano eferementu variyariwanyu, hata ehikhaleru eferementu mweelaponimwanyu.

⁸ Nihuku nno khula mutthu amweereleke mwanawe mulopwana: ‘Kimpaka hiiha, niwoko na yeele Yave okipakenlaawe kaakhumaaka wExipitu.’

⁹ Eyo eniyookhaleleni eneneero mmatatanimwanyu ni yoowuupuwelela vayuuciwanyu, weera Nlamulo na Yave nikhale vayanoniwanyu, niwoko Yave ohookhumihani wExipitu ni ntatanawe nooweraxa.

¹⁰ Mukwanihere ikano iya ehuhu emoharu yeeyo wa khula eyaakha.

¹¹ Vahoolo woowoovoleihani Yave mweelaponi ya aKanaani ntoko oororomelinghaaweni ni nlipelo nyuwo ni makholowaanyu, ni woovahani,

¹² vano muntteelihere Yave ntthaara na khula engyariwa. Mwaxaana napunci a mihuwo sootheene ti a Yave.

¹³ Matthaara ootheene a abuuru yoopoliwe ni eputtiputthi, mene mwaahitthuna woopola, vano mwintake exiko. Moopoleletho matthaara ootheene a anamwaniinyu ni eputtiputthi.

¹⁴ Muhoolommo anamwaniinyu yookohani: ‘entaphulela eheeni yeela?,’ vano mwaaleele: ‘Yave onikhuminghe wExipitu, elapo ya okaporo ni ntata nooweraxa.

¹⁵ Farawu* aakhoottaawe ni murima woowuuma weera nipwaheke, Yave aahiiva matthaara ootheene wExipitu, okhuma a atthu mpaka a axinama. Tivawo nnimveleelelaahu Yave khula napunci mwaaxaana a ntthaara ni nnoopolela matthaaraahu malopwana ootheene.’

¹⁶ Eyo eniyookhaleleni eneneero mmatatanimwanyu ni yoowuupuwelela vayuuciwanyu, weera Yave oonikhumiha wExipitu ni ntatanawe nooweraxa.”

Ottimula wa aYixrayeli

¹⁷ Farawu* aatthuniheraawe muloko orowa, Muluku khaavirihale mpatta wa aFilisti yaarookhalaru ephiro yoothikila, niwoko Muluku eenre: “Awosa yavolowa mukhottoni, kapena eniirukunuwe, ehokoleelaka wExipitu.”

¹⁸ Hiiho Muluku aahaarukureeriha aYixrayeli munikareni ekuxeraka ephiro enrowa Ephareiya Yooxeera. aYixrayeli yaavenya wExipitu oolikaneene owana.

¹⁹ Moisesi aakuxa makhuva a Yoseefe, niwoko Yoseefe aahaalipeliha anamwane a Yixrayeli aweerelaka: “Vekhaikhai Muluku anookhaviheraseni ni ehuhuweene yeeyo ekuxeke makhuvaaka nno.”

²⁰ aYixrayeli yaattimula oSukoti, enakonela wEtami, mukerekhere nikare.

²¹ Othana Yave aakhala ohoolowaya ni nrimbu na mahutte weera aweettihe mphironi, ni ohiyu ni nrimbu na mooro weera aamwaleele. Hiiho yaangwera weetta othana ni ohiyu.

²² Nrimbu na mahutte ni nrimbu na mooro naakhala ohoolowaya ehuhu yootheene.