Nuumeru 9 - Emakhuwa Bible

mPaska* oSinayi

¹ Vamweerini woopacera vayaakhani yanaaveeli, aYixrayeli ekhumaleene wExipitu, Yave aamweerela Moisesi, munikareni na oSinayi:

² “aYixrayeli emuupuweleleke mPaska* mweehuhunimwawe.

³ Mpake efesta ela mweehuhuni yoothanliwa nsuwa nneelaka vanihukuni nanaamuloko ni maxexe na mweereene yoowo muttharihaka malamulowaaya ni ikanosaya sootheene.”

⁴ Vano Moisesi aahaalamulela aYixrayeli weera epakeke efesta ya mPaska*;

⁵ ni awosa yaapaka yeeyo munikareni na oSinayi, nsuwa nneelaka vanihukuni nanaamuloko ni maxexe na mweeri woopacera. aYixrayeli yaapaka sootheene ntoko Yave aamulamulenlaawe Moisesi.

⁶ Vaheera akina akina a yaawo khayaawenre opaka efesta ya mPaska* nihuku nne yeenre yathatuwaka oohiitteela wootava muttembo. Tivawo yaamwaattamenlaaya Moisesi ni Aharoni nihuku nenenenne,

⁷ enamweerela Moisesi: “Hiyo noothatuwa oohitteela wootava muttembo, vano heeni neeraahu nihiihiwe omoonihera yooveleelaahu Yave mweehuhunimwaya, ntoko aYixrayeli akinaawo?”

⁸ Moisesi aawaakhulasa: “Ngwehererase mpaka miyo kineeraaka kisuwele yeeyo Yave olamulenlaawe aweerelakani nyuwo.”

⁹ Vano Yave aamweerela Moisesi:

¹⁰ Mwaaleele aYixrayeli weera mukina a nyuwo hoye hoye a ekhapiraanyu athatuwa oohitteela wootava muttembo hoye hoye arakamela niwoko na mukwaha, hata hiiho apakeke efesta ya mPaska* a Yave.

¹¹ Mpakeke efesta ya mPaska* vanihukuni nanaamuloko ni maxexe na mweeri wanaaveeli, nsuwa nneelaka. Mukhuureke eputtiputthi vamoha ni epaawu yoohikhalano eferementu ni mapoonda oowaawa.

¹² Muhihiyeru etthu mpaka waaxiiye ni muhipwexeru nikhuva na eputtiputthi. Mwaapakaka efesta ya mPaska*, mwiiweleleke ikano sootheene sa mPaska*.

¹³ Wa soothesene, mulopwana akhala ootteela ahinarakamela niwoko na mukwaha, ni hiiho aahipaka efesta ya mPaska*, owo oomoliweke eriyari ya mulokwaawe eenre ahimpakelaka yooveleela Yave mweehuhuni yootthuneya. Owo onoohaawa ni makacamiho a sootthekasawe.

¹⁴ Namarwa onkhala eriyaraanyu ontthuna opaka efesta ya mPaska* a Yave, apakeke attharihaka malamulo ni ikano sa mPaska*. Malamuloweene yaawo ekhaleke wa namarwa mpaka neethi.

¹⁵ Vanihukuni yaakungiwaaya etabernaakulu* – Eheema enthokorora itthaabwa sa wiiraana, nihutte naakhuneela eyo. Okhuma oxekuwa mpaka oxa nno vasulu wa etabernaakulu* naalikana ni mooro.

¹⁶ Mahuku ootheene yeereya ha: Othana nihutte naakhuneela eyo ni ohiyu naalikana ni mooro.

¹⁷ Imaara sootheene nihutte naawelaaya vasulu wa Eheema, aYixrayeli yaamuttimula; vanipuroni naakhuruwaaya nihutte, awosa yaamukonelawo.

¹⁸ aYixrayeli yaattimula ettharihaka Nlamulo na Yave, ntokotho ni Nlamulo na Yave yaamukonela. Ehuhu yootheene nihutte naakhalaaya vasulu wa etabernaakulu*, aYixrayeli khayeetta.

¹⁹ Nihutte naakhalaaya vasulu etabernaakulu* mweehuhuni yincipale, aYixrayeli yiiwelela olamula wa Yave ni khayaattimula.

²⁰ Imaara sikina nihutte naakhala vasulu etabernaakulu* mahuku vakhaani ni awosa yannakonela ntoko aalamulenlaawe Yave. Vahoolowaya yaattimula elamuleliweene ni Yave.

²¹ Imaara sikina nihutte nannapwaherera okhuma oxekuwa mpaka waaxiiye, ni oxeexelo naawelaaya, awosa yaamuttimula. Othana hoye hoye ohiyu, imaara sootheene nihutte naawelaaya, awosa yaamuttimula.

²² Naari nihutte naakhalaaya vasulu etabernaakulu* mahuku meeli, mweeri mmoha hoye hoye eyaakha emoha, aYixrayeli yaamupwaherera waakoneliwa ni khayaattimula. Vaheera nno naawelaaya, yaamuttimula.

²³ Mwa yeeyo, yaakhala ni yaattimula ettharihaka Nlamulo na Yave. Yannakwanihera otthuna wa Yave, ettharihaka olamula waalaleiwale mwa Moisesi.