Nuumeru 36 - Emakhuwa Bible

Mwaha wa yoohiyeeriwa wa asithiyana akina

¹ Mapwattapwattha a imusi sa nihimo na Gileyade, mwaana mulopwana a Makiri, osuulu wa Manaxe, yaari a mahimo a ikhapira sa Yoseefe, yaarowa wuuluma ni Moisesi, ahooleli ni mapwattapwattha a imusi sa aYixrayeli.

² Yaamweerela Moisesi: “Yave aalamulenlaawe apwiyaaka weera, mooreereliwani, yaavahe elapo ntoko yoohiyeriwa aYixrayeli, yaalamulelatho weera nyuwosa mwaavahe yoohiyeriwa ya munnihu Zelofehadi anamwanaawe asithiyana.

³ Vaheera awosa yathelana ni mukina a epuumba ekina ya aYixrayeli, yoohiyeriwaaya enoosusihiwa wa yoohiyeriwa ya makholowaahu, ni enimwaandyeereriwa yoohiyeriwa ya epuumbaahu mwa yeeyo awosa atheliwaaya. Ni mpatta wa yoohiyeriwa nreereliwaahu hiyo onoovenxiwa.

⁴ Yaaphiyeraka eyaakha ya otthapa wa aYixrayeli, yoohiyeriwaaya yaandyeereriweke wa epuumba eneeraaya ethelaneno, ni yoohiyeriwaayasa enoovenxiwa mwa yoohiyeriwa ya makholowaahu.”

⁵ Vano Moisesi axuttihiweene ni Yave, aahaalamulela aYixrayeli moota ola: “Epuumba ya ekhapira ya Yoseefe yoohima nnene.

⁶ Olamulenlaawe Yave mwaha wa anamwane asithiyana a Zelofehadi ti ela: Awosa ethelanaseke ni akhalaru mulopwana anaasivele yaalikelelaka othelana ni munihimoni mwa epuumba ya atithaya.

⁷ Ehikhaleru yoohiyeriwa oYixrayeli eniikhume mpuumbanimwaya erowaka mpuumbani ekina, niwoko aYixrayeli ootheene eniipwaherere mulaponi sa ipuumba sineera sihiyeriwe yoohiyeriwa ni makholowaaya.

⁸ Akhalaru mwaana muthiyana anaakhaleno yoohiyeriwa ya elapo ya yakhalaru epuumba ya aYixrayeli, ethelaneke ni mukina a nihimo na epuumba ya atithawe weera khula muYixrayeli akhaleno yoohiyeriwa ya makholowaawe.

⁹ Ehikhaleru yoohiyeriwa eniikhume mpuumbanimwaya erowaka mpuumbani ekina, niwoko khula epuumba ya aYixrayeli entthuneya opwaherera okhalano elapo ehiyeriwaaya.

¹⁰ Anamwane asithiyana aZelofehadi, yaapaka ntoko Yave aamulamulenlaawe Moisesi.

¹¹ Anamwane asithiyana a Zelofehadi – Mahela, Tireza, Hogela, Milka ni Nowa, yaathelanasa ni axirokoraya a wuutiithini ooyariwa ni axunnaya atithaya;

¹² mmahimoni a ikhapira sa Manaxe, mwaana mulopwana a Yoseefe ni yoohiyeriwaayasa yaapwaherera munihimoni ni mpuumbani mwa atithaya.

¹³ Ti yaala malamulo ni sooruma Yave aavanghaawe aYixrayeli mwa Moisesi, munghawalawani wa oMowabe, muxerexere Yordanu, okhopela wa oYeriko.