Nuumeru 35 - Emakhuwa Bible

aLeevi evahiwe isidade

¹ Yave aamweerela Moisesi munghawalawani wa oMowabe, muxerexere mooloko Yordanu, okhopela wa oYeriko:

² “Mwaalamulele aYixrayeli weera yaavahe aLeevi isidade wa elapo akuxalaaya, weera aLeevi ekhalemo. Yaavahetho moocihamo muxerexere isidade.

³ Hiiho, awosa anookhalano isidade soomaka ni moocihamo imombesaya, ikhondoolosaya ni mihuwo sikinatho.

⁴ Moocihamo wa muxerexere wa isidade muneeraanyu mwaavahe aLeevi sikhumeke muxirini sirowaka imeetru* macira maxexe ni miloko mithanu, wookela oxerexere.

⁵ Mpatta wa okhwipi wa esidade, mwaringe imeetru* macira mathannamaxexe wookela mpatta ninkhuma nsuwa, mpatta wa ohitto, mpatta ninkela nsuwa ni mpatta wa ottuttuwani, esidade ereene eriyariru. Awosa ekhalaneke ettima eyo ntoko moocihamwaya mwa isidade.

⁶ Isidade ithannamosa sa seiyo muneeranyu mwaavahe aLeevi nsikhale isidade sootthawela, aneeraawe atthaweleke yoowo anaamwiive mutthu. Ohiya isidadesene seiyo, mwaavahase isidade miloko mixexe ni piili sikina.

⁷ Wa sootheene iyo, nyuwosa mwaavaheke aLeevi isidade miloko mixexe niithannatthaaru, vamoha ni moocihamwaya.

⁸ Isidade muneeraanyu mwaavahe aLeevi, ilapo sa aYixrayeli, sootheene iyo mutthariheke waatta wa yoohiyeriwa ya khula epuumba; mukuxeke isidade sincipale sa epuumba erino isidade sincipale, vaheera vakhaani wa yeeyo erino vakhaani.

Isidade sootthawelawo

⁹ Yave aamweerelatho Moisesi:

¹⁰ Mwaaleele aYixrayeli: ‘Nyuwosa munlapungweene Yordanu, munavolowasa oKanaani,

¹¹ mwathanle isidade sikina sikina, weera sikhale isidadesanyu sootthawela aneeraawe atthawelekemo mukina omwiivale mutthu mweerisani.

¹² Isidade iyo nsikhale isidade sootthawela mwaha wa nakukuttula ohononeliwe, weera mukina ootheriwe wiiva, ahikhwe ahinaaye wiixoonihera onthoriheloni ohoolo wa muloko.

¹³ Isidade ithannamosa muneeraanyu muthanle nsikhale isidadesanyu sootthawela.

¹⁴ Muthanleke isidade tthaaru mpatta ninkhuma nsuwa oYordanu, ni tthaaru sikina iyo, mulaponi ya oKanaani. Iyo nsikhale isidade sootthawela.

¹⁵ Ekhalaka aYixrayeli mpaka anamarwa amankemo hoye hoye anamavira a eriyaraaya, isidade iyo nsikhale isidade sootthawela. Mwemmo etthawelekemo ootheene eniimwiive mutthu mweerisani.

Mwaha wa wiiva ni wiinlela ikukuttula ephome

¹⁶ Mutthu amvulaliha mukina ni etthu ya eyuuma mpaka mutthu owo okhwa, owo namwiiva; vano namwiiva owo ontthuneya wiiviwa.

¹⁷ Hoye hoye mukina ammana mutthu ni nluku, anamwiivela, hoye hoye anamvulaliha mutthu mpaka owo okhwa, ti namwiiva; vano namwiiva owo ontthuneya okhwa.

¹⁸ Vano mukina ammana mutthu ni etthaabwa, anamwiivela, hoye hoye anamvulaliha mutthu mpaka owo okhwa, ti namwiiva; vano namwiiva owo ontthuneya wiiviwa.

¹⁹ Nakukuttula ohononeliwe onoomwiiva namwiiva; aani aamphwanyaka onoomwiiva.

²⁰ Mukina amukakha mukhwaawe hoye hoye amvonya etthu ekina mwayiini mpaka mutthu owo okhwa,

²¹ hata ammana ni ecipakhira mooxililini, anamwiiva, owo ontthuneya wiiviwa; ti namwiiva. Nakukuttula ohononeliwe amphwanya, onoomwiiva.

²² Wa soothesene, mukina ahiittanne amukakha mutthu hoye hoye amvonya etthu aheerelaka ompakela yoonanara,

²³ hoye hoye ahimoonne, ammoroxela nluku ningwera omwiiva ni owo akhwa, vano eenre ahikhalaka mwiitthanaawe ni ahaatthuna omvulaliha,

²⁴ muloko othoriheke eriyaraawe ni nakukuttula ohononeliwe, ettharihiweke malamulo ala:

²⁵ Muloko omukhapeleleke namootheriwa omwiivale nakukuttula ohononeliwe ni amuhokoloxeke osidade otthawenlaawe amuronghaka otthangwaawewo. Iwo akhalekewo mpaka okhwa wa mutokweene a asaserdoti* ottikittheliwe ni makhura ootteela.

²⁶ Wa soothesene, namootheriwa atupha mwiinano wa esidade yootthawela wa weiwo otthangwaawewo,

²⁷ ni nakukuttula ohononeliwe amphwanya okhwipi wa esidade, owo amwiiveke namootheriwa ni khankhalano nthowa na wiiva.

²⁸ Namootheriwa apwaherereke musidadenimwawe yootthawelawo mpaka okhwa wa mutokweene a asaserdoti*; owo ahokoloweke paahi akhwiiyeene mutokweene a asaserdoti*, arowaka elapwaawe.

²⁹ Soonyesereriha iya sikhaleke sa nyuwo ni wa ikhapirasanyu sa muhoolo, yakhalaru elapo muneeraanyu mmake.

³⁰ Mwaha wa wiiva, namwiiva athoriheliweke okhwa yakhalela anamoona ancipale; namoona mmoha paahi khoongwereya omuthorihela okhwa mutthu.

³¹ Muhaakhulele woopoliwa okumi wa namwiiva; owo oophwanela okhwa. Woohihovela ontthuneya wiiviwa.

³² Ohaakhuleliweketho woopoliwa wa mutthu otthawenle esidade yootthawela weera ahokoleele elapwaawe, ahinaaye okhwa mutokweene a asaserdoti*.

³³ Muhivalihe elapo nyuwosa munkhalaanyu. Oyeeha ephome onghiiriha elapo, ni oreherereliweke wiiwanana ni Yave paahi yeereliwaka elapo eyeeheriwaayawo ephome mwa yeeyo namwiiva oyeenghaawe.

³⁴ Muhivalihe elapo munkhalaanyu ni kinkhalaakawo Miyo, niwoko Miyo, Yave, kinkhala eriyari ya aYixrayeli.