Nuumeru 3 - Emakhuwa Bible

Anamwane a Aharoni

¹ Ola ti mwaha wa ekhapira ya Aharoni ni Moisesi, Yave uulummaawe ni Moisesi vamwaako Sinayi.

² Masina a anamwane asilopwana a Aharoni ti ala: Nadabi, mwaana a ntthaara, Abiyu, Eleyazari ni Ithamari.

³ Ti yaala masina a anamwane asilopwana a Aharoni, oottikittheliwa yaakhalihingwe orumeela ntoko asaserdoti*.

⁴ Vanonto Nadabi ni Abiyu yaahookhwa ohoolo wa Yave yaamuruuhenlaaya yooveleela ni mooro yoohitthuniheriwa, munikareni na oSinayi. Yeenre yahikhalakano anamwane, Eleyazari ni Ithamari ti yaarumeela ntoko asaserdoti* mweehuhuni ya atithaya Aharoni.

⁵ Yave aamweerela Moisesi:

⁶ “Mulamulele wiitthaniwa epuumba ya Leevi ni moonihere wa musaserdoti* Aharoni weera emukhavihere.

⁷ Awosa emurumeeleke Aharoni ni muloko wootheene, ekwaniheraka miteko sintthuneya opakiwa Muheemani ya Muthukumano*.

⁸ Ewehaweheke ikaruma sootheene sa Muheemani ya Muthukumano*, ekwaniheraka soonyesererihiwa sa aYixrayeli mmutekoni mwa etabernaakulu*.

⁹ Mwaatteelihe aLeevi weera emurumeele Aharoni ni anamwanaawe. Awosa ethanliweke eriyari ya aYixrayeli weera ekhale ootteeliheriwa Aharoni.

¹⁰ Munkhalihe Aharoni ni anamwanaawe asilopwana ookwanihera soonyesereriwa sa osaserdoti*; akhalaru mukina anaakhuveele vaNipuroni Nootteela*, iiviweke.”

¹¹ Yave aamweerela Moisesi:

¹² “Miyo muneenaaka kinaathanla aLeevi eriyari ya aYixrayeli vanipuroni na mwaana a ntthaara na khula muthiyana muYixrayeli. aLeevi ti awaka,

¹³ niwoko matthaara ootheene ti awaka. Kiivalaaka matthaara ootheene a wExipitu, kaahiimwalamwalihera matthaara ootheene a aYixrayeli, okhuma eriyari ya atthu mpaka ya mihuwo. Anookhala awaka. Miyo ti Yave.”

Namalepela a aLeevi

¹⁴ Yave aamweerelatho Moisesi munikareni na oSinayi:

¹⁵ “Ngwaalikele aLeevi mweemusinimwaya ni mahimo. Yaalikeliweke asilopwana ootheene a mweeri mmoha wa oyariwawaya woorowa ohoolo.”

¹⁶ Vano Moisesi aawaalikela, attharihaka nlamulo aakhenlaawe wa Yave.

¹⁷ Masina a anamwane a Leevi ti ala: Gerexono, Kohati ni Merari.

¹⁸ Masina a mahimo a Gerexono ti ala: Libeni ni Ximeyi.

¹⁹ Masina a mahimo a Kohati ti ala: Amerami, Yizehara, Hebroni ni Uziyeli.

²⁰ Masina a mahimo a Merari ti ala: Maheli ni Muxi. Ti yaala yaari ahooleli a mahimo a Leevi.

²¹ Mahimo a aLibini ni aSemiyita yaari a Gerexono. Ti yaala yaari mahimo a aGerexono.

²² Waatta wa ootheene yaalikeliwe – asilopwana a mweeri mmoha wa oyariwawaya woorowa ohoolo – yaari atthu 7 500.

²³ Mahimo a aGerexono waatthuneya okonela mpatta ninkela nsuwa, wiithela etabernaakulu*.

²⁴ Muhooleli a imusi sa aGerexono aari Eliyasafi, mwaana mulopwana a Layeli.

²⁵ Muheemani ya Muthukumano*, aGerexoni yaakhalano muteko wookosoopa etabernaakulu* vamoha ni eheemaaya, ekuttelelowaaya, eluttu ya vamulako wa Eheema ya Muthukumano*,

²⁶ iluttu sa omokoni wa nipuwa, iluttu sa mulakwaaya sinrukureera etabernaakulu* ni altaari*, ni mikhoyi vamoha ni sootheene saari vamohamoharu ni muteko owo.

²⁷ Mahimo awAmrami, awIzerahi, aHeberoni awUziyeli yaari a aKohati.

²⁸ Waatta wa asilopwana a mweeri mmoha wa oyariwawaya woorowa ohoolo, yaari asilopwana 8 600. aKohati yaakhalano muteko wookosoopa Nipuro Nootteela*.

²⁹ Mahimo a aKohati waatthuneya okonela mpatta wa ohitto wa etabernaakulu*.

³⁰ Muhooleli a imusi sa mahimo a Kohati aari Elizafani, mwaana mulopwana a Uziyeli.

³¹ Aakhalano muteko woowaakosoopa Arka*, meesa, onyaari, altaari*, ikaruma saavareliwa muteko vaNipuroni Nootteela* ni eluttu ni sootheene saari vamohamoharu ni muteko owo.

³² Muhooleli mutokweene a aLeevi aari Eliyazari, mwaana mulopwana a Aharoni. Owo aakhalano muteko woowaawehaweha yaawo yaahoolela miteko sa okosoopa Nipuro Nootteela*.

³³ Mahimo a aMaheli ni aMuxiti yaari a aMerari; yaari ti yaala mahimo a aMerari.

³⁴ Waatta wa asilopwana yaale yaalikeliwe a mweeri mmoha wa oyariwawaya woorowa ohoolo, yaari asilopwana 6 200.

³⁵ Muhooleli a imusi sa mahimo a aMerari aari Zuriyeli, mwaana mulopwana a Abihayili; waatthuneya awosa okonela mpatta wa ottuttuwani wa etabernaakulu*.

³⁶ aMerari yaakhalano muteko woowaakosoopa acikhi a etabernaakulu*, mikoombasaya, amarimbu, nyettosaya, ikarumasaya sootheene ni sootheene saari vamohamoharu ni muteko owo,

³⁷ nitho amarimbu a nipuwa mukhwipimwaya ni nyettosaya, mikurosaya ni mikhoyisaya.

³⁸ Moisesi, Aharoni ni anamwanaawe asilopwana ekoneleke mpatta ninkhuma nsuwa, wa etabernaakulu*, ohoolo wa Eheema ya Muthukumano*. Awosa yaakhalano muteko wookosoopa Nipuro Nootteela* eweerelaka aYixrayeli. Akhalaru mukina anaakhuveele vaNipuroni Nootteela*, iiviweke.

³⁹ Waatta wa aLeevi yaalikeliwe ni Moisesi ni Aharoni, ntoko Yave aamulamulenlaawe, ettharihiwaka mahimwaaya – asilopwana ootheene a mweeri mmoha wa oyariwawaya woorowa ohoolo, yaari asilopwana 22 000.

Woopoliwa wa matthaara

⁴⁰ Yave aamweerela Moisesi: “Ngwaalikele anamwane asilopwana a matthaara ootheene a aYixrayeli okhuma a mweeri mmoha wa oyariwawaya woorowa ohoolo ni mulepeke masinaaya.

⁴¹ Mukitteelihere aLeevi vanipuroni na matthaara ootheene a aYixrayeli, ni mihuwo sa aLeevi, vanipuroni na matthaara a mihuwo sa aYixrayeli. Miyo ti Yave.”

⁴² Moisesi aawaalikela anamwane asilopwana a matthaara ootheena a aYixrayeli, ntoko Yave aamulamulenlaawe.

⁴³ Waatta wa anamwane asilopwana a matthaara ootheene, okhuma a mweeri mmoha wa oyariwawaya woorowa ohoolo, elepeliwaka ni masinaaya yaari asilowana 22 273.

⁴⁴ Yave aamweerelatho Moisesi:

⁴⁵ aLeevi ekhaleke vanipuroni na matthaara ootheene a aYixrayeli, ni mihuwo sa aLeevi vanipuroni na mihuwo sa aYixrayeli. aLeevi ekhaleke awaka. Miyo ti Yave.”

⁴⁶ Wa woopoliwa wa anamwane asilopwana a matthara a aYixrayeli 273 apwanghe waatta wa aLeevi,

⁴⁷ mukuxe ixekeli* ithanu sa eparatha* wa khula mutthu a yaawosa, muttharaka olemela wa exekeli* ya Nipuro Nootteela*, enlemela igrama* muloko ni piili.

⁴⁸ Mmwinnyerere Aharoni ni anamwanaawe asilopwana, eparatha* yoowoopolela anamwane asilopwana a matthara a aYixrayeli yaawo apwanghe waatta wa aLeevi.

⁴⁹ Hiiho Moisesi aakuxa eparatha* yoowoopolela yaale yaapwanghe waatta wa aLeevi.

⁵⁰ Wa anamwane asilopwana a matthaara a aYixrayeli, owo aarongha ixekeli* 1 365, ettharaka olemela wa exekeli* ya Nipuro Nootteela*.

⁵¹ Moisesi aamwinnyerera Aharoni ni anamwanaawe asilopwana eparatha* yoowoopolela, ntoko aalamulelingwaawe ni Yave.