Nuumeru 24 - Emakhuwa Bible

¹ Biliyami oonaka weera waamusivela Yave waareeliha aYixreyeli, khaapanke macitta ntoko imaara sikina, mene aaweha onikareni.

² Vano aawoona aYixrayeli ekonenleene epuumba epuumba, Munepa wa Muluku waamukhuruwela,

³ ni owo aalaleiya mutthenga ola: “Masu a Biliyami, mwaana mulopwana a Beyori, masu a yoole maithwaawe anoona nnenesene,

⁴ masu a yoole oniiwa masu a Muluku, masu a yoole onoona moonelo onrweela wa Muluku a ikuru sootheene; masu a yoole ommora, anakokhora ni onoona nnenesene:

⁵ Moota sireenraaya iheemasanyu, ii Yakobe, moomakamwanyu, ii! aYixrayeli!

⁶ Anaataleya ntoko mareyareya a ethaadyira, ntoko mattimbe muxerexere mooloko, ntoko nyiri sa alowe*, ni ntoko esedari* Yave ophatteiyaawe muxerexere maahi.

⁷ Mattankhaaya a maahi anoosareya; imattasaya sinoohelelaxiwa maahi, mwenaaya onookhala mutokweene ompwaha Agagi; omwenaaya onimunnuwihiwa.

⁸ Muluku onaakhumiha wExipitu; awosa aakhalano ikuru sa enari, annyaanya miloko soowiitta, ampwexakasa makhuvaaya; anghomano mavakaaya.

⁹ Awosa aniipitha ni aniixaatalela ntoko mwatto mulopwana ni muthiyana, taani anaawere waavenxa? Ereelihiwe yaawo eniyaareelihe, ni elamphwe yaawo eniyaalaphe!”

¹⁰ Vano isara sa Balaki saampattela Biliyami, ni iipa makuphi, eeraka: “Miyo kiwiitthanenleni waalapha amwiittanaaka, vaheera nyuwo mohaareeliha imaara tthaaru!

¹¹ Vano nyuwo mutthawele owannyinyu!” Miyo kaaheera weera kaamoovahani ntthuvelo ntokotoko, vaheera Yave oowooceelihani waakhela.”

¹² Vaheera Biliyami aamwaakhula Balaki: “Miyo kaahaaleela nnenesene anamitthenga mwaarumihenlaanyu owannyaka

¹³ weera naari Balaki akivahaka empaawe ya emwene yoosareya eparatha* ni eyuuma yoorikaxa miyo nkaarambura malamulo a Yave, kipakaka yakhalaru etthu kintthunaaka, ereere hata ehireere. Yeeyo okileenlaawe Yave, ti yeeyo kineeraaka kihime.

¹⁴ Vano kinoohokoleela mulokwaaka, mene mukihiye kooleeleni yeeyo muloko ola oneeraaya opakele mulokwaanyu mmahukuni a muhoolo.

¹⁵ Vano owo aalaleiya mutthenga ola: “Masu a Biliyami, mwaana mulopwana a Beyori, masu a yoole maithwaawe anoona nnenesene,

¹⁶ masu a yoole oniiwa masu a Muluku, orino esuwelo ya Muluku a Musulusulu, a yoole onoona moonelo onrweela wa Muluku a ikuru sootheene, a yoole ommora, anakokhora, mwa yoowo ohulingwe maithwaawe:

¹⁷ Miyo kinimoona, mene khoohiyono vaanaano va; miyo kinimoona, mene khoohiyono vakhiviru. Ethenyeeri enookhumelela wa Yakobe; ekopo ya emwene enimweemela oYixrayeli. Eyo enoopwexakasa iyuuci sa oMowabe ni makarakasa a ikhapira sootheene sa Seti.

¹⁸ wEdomi onoowiniwa; oSeyiri ori mwiittanaaya, onoowiniwatho; vaheera oYixrayeli onimunnuwa mukuruni.

¹⁹ Wa Yakobe onookhumelela namalamula; owo onimwaaphwata oohalahala a musidade.”

Mutthenga wookisera wa Biliyami

²⁰ Biliyami aawoona awAmaleki, analaleiya mutthenga ola: “awAmaleki yaari oopacera eriyari ya miloko, mene ommaleloniwaya onuukhale ophwatiwa.

²¹ Vahoolowaya aawoona aKeni analaleiya mutthenga ola: “Woomakawanyu ti woolipa, epuuruwaanyu elipihiwe vamwala;

²² wa soothesene, nyuwosa aKeni, munoophwatiwa Axuri ookuxakani ootthukiweene.”

²³ Ommaleloni aahima mutthenga ola: “Ii! Taani anaawere okhala ni okumi Muluku aapakaka yeeyo?

²⁴ Makula matokotoko eniirweele muxerexere wa ephareiya ya oKitimi ni anoomuhasula Axuri ni Eberi, vaheera ommaleloniwaya onuukhaletho ophwatiwa.”

²⁵ Vano, Biliyami aavenya anahokoleela owaani, ni Balaki aakuxera ephirowaawe.