Nuumeru 21 - Emakhuwa Bible

Enowa ya ebronze*

¹ Mwene a oKanaani wArade aakhala oNegebe, asuwelaka weera aYixrayeli yaarweela mmuseweni wa wAtarimi, aahaawanano aYixrayeli, anaavara akina akina a yaawosa.

² Vano aYixrayeli yaamuroromeliha Yave moota ola: “Mwinnyerera muloko ola mmatatanimwahu, nnoophwata woomalela isidadesaya.”

³ Yave aahiiwa yoovekela ya aYixrayeli, anawinnyerera aKanaani. aYixrayeli yaahaaphwatasa woomalela yaawo ni isidadesaya, moota wooweera nipuro nne naahiitthaniwa oHorema.

⁴ Yaattimulasa vamwaako Hori, ekuxeraka ephiro emvira ephareiya yooxeera weera esembe elapo ya wEdomi. Vaheera mphironi muloko waakhulumuwaxa,

⁵ onamukhupanya Yave ni Moisesi, weeraka: “Munikhumiheranseni wExipitu weera nikhwele munikareni? Kheemomo yooca! Khaamomo maahi! Vano hiyo ninthanya yooca ela yoohiira”

⁶ Vano Yave aarumiha inowa soohapala saalumme muloko, ni ancipale yaahookhwa.

⁷ Muloko waarowa wa Moisesi oneera: “Noottheka woomukhupanya Yave ni nyuwo. Mumvekele Yave weera avenxe inowa eriyaraahu.” Moisesi aavekelela muloko.

⁸ Yave aamweerela Moisesi: “Mpake enowa ni muthomeye vanttoroni; ootheene eneera elummwe, enaweha yeeyo, anookhala ni okumi.”

⁹ Vano, Moisesi aapaka enowa ya ebronze*, anathomeya vanttoroni. Mukina aalummwaawe ni enowa ni aawehaawe enowa ya ebronze, aampwaherera ni okumi.

Mukwaha wa oMowabe

¹⁰ aYixrayeli yaattimula, enakonela wOboti.

¹¹ Vahoolowaya, yaattimulasa wOboti, enakonelasa wIye-Abarimi, munikareni muxerexere wa oMowabe, mmwiinanoni wa mpatta ninkhuma nsuwa wa oMowabe.

¹² Woovenya vaavaale, yaattimula, enakonela mureyareyani na oZeredi.

¹³ Evenyaka oZeredi, yaarowa okonela okhopela mooloko Arenoni, ophattungwe munikareni, onaphutula mulaponi ya awAmori opakaka mwiinano eriyari ya elapo ya aMowabe ni awAmori.

¹⁴ Tivawo eneeriwaaya mulivuruni ya ikhotto sa Yave: “oWayebi mulaponi mwa wOsufa ni moovinavineya mwa mooloko wArenoni

¹⁵ ni nyaako sa moovinavineya sinrowa mpaka esidade ya wAri, mukerekhere omwiinanono wa oMowabe.”

¹⁶ Woovenya vaavaale, yaapwaherera mpaka oBeeri, ehime mwa yeeyo Yave aamweerenlaawe Moisesi: “Muthukumanyihe muloko ni Miyo kinoovaha maahi.”

¹⁷ Vano aYixrayeli yaahiipa ecipo ela: “Ehime epiluwe maahi! Mwiipele ecipo,

¹⁸ ehime yaathimpwale ni anamwane asilopwana a mamwene, yaathimpwale ni maneethi, ni ikopo ni mittontto soolamulelano. Woovenya munikareni yaarowasa oMatana,

¹⁹ enarowa oNahaliyeli, woovenya oNahaliyeli yaarowa oBamoti,

²⁰ ni woovenya oBamote, yaarowa oreyareyani na oMowabe, engwehanaaya etthomela ya mwaako Pisega mpatta wa munikareni.

Owiniwa wa mwene Sihoni

²¹ aYixrayeli yaahaarumiha anamitthenga weera emweerele Sihoni, mwene a awAmori:

²² Munihiye nivire mulaponimwanyu. Khanihapuwelaru mmatta hata mmatta mwa iwuuva*, naari khaniwuraru maahi a muhimenimwanyu. Nnikuxere paahi ephiro etokweene, mpaka omaliha ovira mulaponimwanyu.”

²³ Wa soothesene, Sihoni khaahingye aYixrayeli eviraka mulaponimwawe. Aahaathukumanyiha anakhottwaawe ootheene, anaawanano aYixrayeli munikareni. Aaphiyalaawe oYahazi, aahaawanano aYixrayeli.

²⁴ Wa soothesene, aYixrayeli yaamphwata ni ekatana, enakuxa ilaposawe okhuma wArenoni wookela oYaboki, mpaka mwiinano wa wAmoni paahi niwoko mwiinanoweene yoole waalipihiwaxa.

²⁵ aYixrayeli yaakuxa isidade sootheene sa awAmori, enaakamela, vamoha ni oHexeboni ni mittetthesaya sootheene.

²⁶ oHexeboni yaari esidade ya Sihoni, mwene a aMori, aangwananne mwene a khalayi a oMowabe, akuxaka ilaposawe sootheene mpaka wArenoni.

²⁷ Tivawo anamiruku aneeraaya: “Murwe oHexeboni! Eyo eraseliwe; erehereriwetho esidade ya Sihoni!

²⁸ Mooro waakhuma oHexeboni, malumi a mooro a esidade ya Sihoni; waalaliha wAri mulaponi mwa oMowabe, amaki a mmattumuxani a wArenoni.

²⁹ Ii! Wa nyuwosa, amaki a oMowabe! Nyuwo moophwatiwa, Ii! Muloko wa Kemoxi! Owo oowinnyerera anamwanaawe asilopwana ntoko anamatthawa, anamwanaawe asithiyana ntoko anamatthukiwa ni Sihoni, mwene a awAmori.

³⁰ Vaheera hiyo nohaawina; oHexeboni woophwatiwa ephiro yootheeneeyo mpaka oDiboni. Hiyo nohaaphwata mpaka oNofa, ni mpaka oMedeba.”

³¹ Hiiho aYixrayeli yaamaka mulaponi mwa awAmori.

³² Moisesi aahaarumiha anamahottela oYazari, ni aYixrayeli yaakuxa mittetthe saarukureenre, enawoomolasa awAmori yaakhalawo.

Owiniwa wa mwene Ogi

³³ Vahoolowaya, yaahokolowasa, enavira mphironi enkela oBaxani ni Ogi, mwene a oBaxani, ni anakhottwaawe ootheene, yaarowa weera yaawaneno wEdereyi.

³⁴ Vaheera Yave aamweerela Moisesi: “Muhimoove, niwoko Miyo koomwinnyerera wa nyuwo, vamoha ni anakhottwaawe ni elapwaawe. Nyuwo munoompakela yeeyo mwaampakenlaanyu Sihoni, mwene a awAmori, aakhala oHexeboni.”

³⁵ Vano, awosa yaangwinaxa, okhuma anamwanaawe mpaka anakhottwaawe ehimuhiyakaru oohalahala. Vanonto yaakuxasa elapwaawe.