Nuumeru 20 - Emakhuwa Bible

Maahi a oMeriba

¹ Muloko wootheene wa aYixrayeli waaphiyale munikareni na oSini mmweerini woopacera, onakhala oKadexi. Miriyami aahookhwawo, anavithiwa.

² Vano muloko khawaakhalannewo maahi, ni owo waamurica Moisesi ni Aharoni.

³ Yaanyakulihana ni Moisesi yeeraka: “Fataari naakhwiiye ni axunnihu attaruxiwe ni Yave!

⁴ Nyuwosa, muruuhenleni muloko wa Yave munikarenimu, weera hiyo ni mihuwosahu nikhwele muumu?

⁵ Munikhumiheranseni wExipitu muniruuhaka nipuro nna noowoopiha? Mu khasimomo irooro, hata ifiigu, naari iwuuva* hoye hoye irooma*, naari maahi oowura!”

⁶ Moisesi ni Aharoni yaavenyasa ohoolo wa muthukumano, enarowa vamulako wa Eheema ya Muthukumano*, enuuramihela ikhovesaya vathi, ni ovuwa wa Yave waahaarweela.

⁷ Yave aamweerela Moisesi:

⁸ “Mukuxe ekopo vamoha ni munninyu Aharoni ni muthukumanyihe muloko. Vano ohoolowaya muulumele mwala ole, ni owo onoopiluwa maahi. Nyuwosa munoorika maahi vamwala oowura muloko ni muhuwo.”

⁹ Vano Moisesi aakuxa ekopo yaari ohoolo wa Yave, ntoko Owo aamulamulenlaawe.

¹⁰ Moisesi ni Aharoni yaathukumanyiha muloko ohoolo wa mwala, ni Moisesi aaheera: “Mwiiwe anamavaanya, weeraka ontthuneya orika maahi vamwala weera noovaheeni?”

¹¹ Vano Moisesi aattukhula moono, anamana mwala ni ekopo imaara piili. Yaapiluwa maahi ni hiiho muloko ni muhuwo waawura.

¹² Wa soothesene Yave aamweerela Moisesi ni Aharoni: “Nyuwo khamukiroromenle Miyo muhittittimihaka otteelawaka vamaithoni wa aYixrayeli, tivawo nyuwosa khamvolongha muloko ola mulaponi kimvahaaka.”

¹³ Ala yaari maahi a oMeriba, weiwo aYixrayeli yaanyakulihannaayawo ni Yave ni Owo oonihenraawe otteelawawe eriyaraaya.

wEdomi onkhoottiha muloko wa aYixrayeli ovira mulaponimwaya

¹⁴ oKadexi, Moisesi aahaarumiha anamitthenga wa mwene a awEdomi eeraka: “Munninyu Yixrayeli oneera ha: ‘Nyuwo moosuwela makacamiho ootheene anikhumelenle.

¹⁵ Makholowaahu yaarowa wExipitu, ni iwe naakhalawo iyaakha sincipale. Wa soothesene awExipitu yaanihasula hiyo ni makholowaahu,

¹⁶ vaheera naamukhuwelenlaahu Yave, Owo aahiiwa okhuwelawahu, anamurumiha namutthenga, ananikhumiha wExipitu. Vano nri oKadexi, esidade ehelanne mwiinano ni elapwaanyu.

¹⁷ Munihiye nivire mulaponimwanyu. Khaniviraru mmatta hoye hoye ematta ya iwuuva*, hata khaniwuraru maahi a yakhalaru ehime. Nnivire mmuseweni wa mwene ni khanihapuwelaru naari moono woolopwana hata woothiyana, mpaka nneeraahu niphutule mulaponimwanyu.”

¹⁸ Vaheera Edomi aahaakhula: “Nyuwosa muhivirasemu; mweerera, hiyo nnimoowananani ni ekatana.”

¹⁹ Vano aYixrayeli yaaheera: “Axunna, nnookuxera musewe mutokweene; hiyo ni mihuwosahu nawura maahaanyu, nnooliva. Ninntthuna paahi ovira neettaka vathi, kheewowo etthu ekinatho.”

²⁰ Vaheera Edomi aanyesera: “Nyuwosa khamumvirasa. Vano Edomi vamoha ni anakhotto ancipale ni oowera aahaawanano.

²¹ Eenre Edomi akhoottaka waaviriha mulaponimwawe, aYixrayeli yaahapuwa.

²² Muloko wootheene wa aYixrayeli waattimula oKadexi, onaphiya vamwaako Hori.

²³ Vamwaako vale, waattamela mwiinano wa wEdomi, Yave aamweerela Moisesi ni Aharoni:

²⁴ “Aharoni onoothukumanyihiwa ni makholowaawe. Khavolowa mulaponi kinaavahaaka aYixrayeli, niwoko nyuwosa ooweeli moovaanya Nlamulonaka mukerekhere maahi a oMeriba.

²⁵ Munkuxe Aharoni ni mwaniye mulopwana Eleyazari mpaka vasuluxa mwaako Hori.

²⁶ Munrule Aharoni soowarasawe ni mungwarihe mwaniye Eleyazari, niwoko Aharoni onoothukumanyihiwa ni makholowaawe; owo anaakhwele weiwo.”

²⁷ Moisesi aapaka ntoko Yave aalamulenlaawe; yaawelasa vamwaako Hori, muloko wootheene woonaka.

²⁸ Moisesi aamurula Aharoni soowarasawe, anangwariha mwaniye Eleyazari. Aharoni aakhwela vasulu mwaako. Vahoolowaya Moisesi ni Eleyazari yaakhuruwa vamwaako,

²⁹ ni muloko wootheene osuwelaka weera Aharoni ohookhwa, awosa yaamwiinlela mweehuhuni ya mahuku miloko miraru.