Nuumeru 18 - Emakhuwa Bible

Soonyesererihiwa sa asaserdoti* ni aLeevi

¹ Yave aamweerela Aharoni: “Nyuwo, anamwaniinyu asilopwana ni emusi ya atithinyu, munookhalano nthowa na wakhalaru moota wa oveihiwa Nipuro Nootteela*. Nyuwo ni anamwaniinyu munookhalano nthowa mwa sakhalaru sooveiha sipakeiye mmutekoni wa esaserdoti.

² Mwaaruuhetho axunninyu aLeevi ari a epuumba ya makholowaanyu, weera ethukumane ni nyuwo ni yookhavihereni nyuwo ni anamwaniinyu mwaarumeelaka ohoolo wa Eheema enthokorora itthaabwa sa wiiraana.

³ Awosa yoovarelasekeni muteko ni ekhapeleleketho muteko wa Eheema, mene ehaattameleru ikaruma sa Nipuro Nootteela* hoye hoye altaari*, niwoko yapaka hiiho, animookhwa okhuma awosa mpaka nyuwosa.

⁴ Awosa ethukumaneke ni nyuwosa, ni mutekwaaya onuukhale wookosoopa Eheema ya Muthukumano*, evaraka miteko sootheene sintthuneya. Ahikhaleru anaawaattamelaseni.

⁵ Nyuwosa munookhalano muteko wookosoopa Nipuro Nootteela* ni altaari*, weera sihaamoreletho aYixrayeli isara sa Yave.

⁶ Miyo muneenaaka kohaathanla axunninyu aLeevi eriyari ya aYixrayeli ntoko yoowoovahani; etteeliheriweene Yave weera evare muteko Muheemani mwa Muthukumano.

⁷ Vaheera nyuwo ni anamwaniinyu paahi murumeeleke ntoko asaserdoti* mwa sootheene sa valtaarini* siri wiithela eluttu. Kinoovahani nyuwo muteko wa esaserdoti ntoko yoovaha. Akhalaru mutthu ohitthuniheriwe anaattamele Nipuro Nootteela* iiviweke.”

Sooveleela wa asaserdoti* ni aLeevi

⁸ Vano Yave aamweerela Aharoni: “Miyo muneenaaka kohookhalihani namawehaweha a micaango kinruuheliwaaka. Vano sooveleela sootteela sootheene aYixrayeli eneeraaya ekivahe, Miyo kinimoovahani ntoko mpattaanyu ni wa anamwaniinyu.

⁹ Wa sooveleela sootteelaxa nyuwo munookhalano mpatta onuureliwa vayikho. Eriyari ya soovaha ankiruuhelaaya ntoko sooveleela sootteelaxa – sikhalaka sa irooro, hata sa soottheka, naari sa nthowa, mipatta iyo ti sawinyu ni wa anamwaniinyu.

¹⁰ Muceeke ntoko etthu yootteelaxa; asilopwana ootheene eceeke. Mooneleke okhala sootteelaxa.

¹¹ Kinoovahanitho nyuwo, ni anamwaniinyu asilopwana ni asithiyana, micaango sootheene ankhumihaaya aYixrayeli sa sooveleela soowiinainihiwa, ntoko ekano yoohimala. Ootheene a emusaanyu eneera ekhale ootteeleene, eceeke.

¹² Kinoovahani nyuwo makhura ooreerela, eviinyu enyowani yooreerela ni etrigu yooreerela aYixrayeli eneeraaya emveleeleleke Yave ntoko soowiima soopacera sa ohepha.

¹³ Soowiima soopacera sootheene sa mulaponi eneeraaya emuruuhele Yave, ti sawinyu. Ootheene a emusaanyu eneera ekhale ootteeleene, eceeke.

¹⁴ Sootheene sa aYixrayeli sineera sitteeliheriwe Yave ti sawinyu.

¹⁵ Matthaara ootheene eneera eveleeleliwe Yave, akhalaka mutthu, hata mwaamunama, anaakhale awinyu. Vaheera nyuwo mmoopoleke akhalaru mwaana mulopwana a ntthaara, mpakatho matthaara ootheene a mihuwo soohitteela.

¹⁶ Yaakhalanaka mweeri mmoha wa oyariwawaya, nyuwo ngwoopoleke ni nlivo noowoopolela nri igrama* miloko mithannamosa sa eparatha* ettharaka moota wa exekeli* ya Nipuro Nootteela* enlemela igrama* muloko ni piili.

¹⁷ Wa sootheene, muhoopole ntthaara na emombe, ekhondoolo hoye hoye na epuri, niwoko ti ootteela. Muyeehere ephomaaya valtaarini* ni muhise makhuraaya ntoko yooveleela yoorehereriwa vayikho, yoowunkhela yoomusiveliha Yave.

¹⁸ Enama ya axinama awo ti yawinyu, mpakatho ehoce ya yooveleela yoowiinainihiwa ni vatakhwini yoolopwana.

¹⁹ Sootheene sineera simwalamwaxiwe eriyari ya soovaha sootteela aYixrayeli eneeraaya emveleelele Yave, Miyo kinoovahani nyuwo ni anamwaniinyu asilopwana ni asithiyana ntoko ekano yoohimala. Ti wiiraana woohimala wa maakha ohoolo wa Yave, wa nyuwo ni ekhapiraanyu.”

²⁰ Yave aamweerelatho Aharoni: “Nyuwo khamukhalano yoohiyeriwa mulaponimwaya, hata khamukhalano ettima eriyaraayasa; Miyo ti ettimaanyu ni yoohiyeriwaanyu eriyari ya aYixrayeli.

²¹ Kinaavaha aLeevi sanaamuloko sootheene sa aYixrayeli ntoko ntthuvelo na muteko amvaraaya woorumeela Muheemani ya Muthukumano*.

²² Okhuma vaanaano va mpaka ohoolo, aYixrayeli ehaattameleke Eheema ya Muthukumano*. Yaattamela, anoohaawa makacamiho a sootthekasaya ni animookhwa.

²³ Ti yootthuneya ya aLeevi ovara muteko Muheemani ya Muthukumano* ni anookhalano nthowa na yakhalaru yoonanara eneera yeereiyemo. Ela ekano yoohimala wa ikhapira sootheene sineera sirwe. Awosa khayaakhelaru yoohiyeriwa eriyari ya aYixrayeli.

²⁴ Ohiya yeeyo, yoohiyeriwa kinaavahaaka aLeevi ti sanaamuloko aYixrayeli eneeraaya eveleeleke ntoko mucaango wa Yave. Tivawo Miyo keenraaka weera awosa kheekhalanoru yoohiyeriwa eriyari ya aYixrayeli.”

²⁵ Vahoolowaya, Yave aamweerela Moisesi:

²⁶ “Mwaaleele ha aLeevi: ‘Mwaakhelaka wa aYixrayeli sanaamuloko kinoovahasaakani ntoko yoohiyeriwa, nyuwosa mveleeleke yanaamuloko emoha sa sanaamuloko iyo ntoko yooveleela wa Yave.

²⁷ Eyo eniyooneliwe ntoko mpatta wanaamulokwaanyu, ntoko ereene ya etrigu mumveerelaanyuwo hoye hoye munaamelaanyuwo eviinyu.

²⁸ Hiiho nyuwo mumveleeleleketho yooveleela Yave ya sanaamuloko sootheene saakheliwe wa aYixrayeli. Mwa sanaamuloko iyo, nyuwosa mvaheke mucaango wa Yave wa musaserdoti* Aharoni.

²⁹ Eveleeleke ntoko yooveleela wa Yave mpatta wooreerela, aani mpatta wootteelihiwa wa sootheene muneeraanyu mvahasiweke.’

³⁰ Mwaaleele aLeevi: ‘Mwaaveleelaka mpatta wooreerela, mpatta owo oniwooneliwe wooreerela wa yoohepha ya waneepettheliwa ni wanaamiwa iwuuva*.

³¹ Nyuwosa ni imusisanyu muceeke mpatta owo ohanle nakhalaru nipuro, niwoko ti nlivo wa mutekwaanyu Muheemani ya Muthukumano*.

³² Wooveleela mpatta wooreerela, nyuwosa khamukhalano nthowa ni khamuhiiriha sooveleela sootteelihiwa sa aYixrayeli, weera muhikhwaase.’”