Nuumeru 13 - Emakhuwa Bible

¹ Yave aamweerela Moisesi:

² “Mwaarumihe asilopwana akina akina weera yahottele elapo ya oKanaani, mwa yeeyo kinaavahaaka aYixrayeli. Munrumihe muhooleli mmoha a khula epuumba ya makholowaaya.”

³ Hiiho Moisesi aahaarumiha munikareni na oParani, ntoko aalamulenlaawe Yave. Ootheene awo yaari mapwattapwattha a aYixrayeli.

⁴ Masinaaya ti ala: A epuumba ya Rubeni, Xamuwa, mwaana mulopwana a Zakuri;

⁵ a epuumba ya Simeyoni, Xafati, mwaana mulopwana a Hori;

⁶ a epuumba ya Yuda, Kalebi, mwaana mulopwana a Yefune;

⁷ a epuumba ya Isakari, Igali, mwaana mulopwana a Yoseefe;

⁸ a epuumba ya Efrayimi, Hoxeya, mwaana mulopwana a Nuni;

⁹ a epuumba ya Benyamini, Palti, mwaana mulopwana a Rafu;

¹⁰ a epuumba ya Zebulomi, Gadiyeli, mwaana mulopwana a Sodi;

¹¹ a epuumba ya Yoseefe, eyo tiiyo, a epuumba ya Manaxe, Gadi, mwaana mulopwana a Susi;

¹² a epuumba ya Dani, Amiyeli, mwaana mulopwana a Gemali;

¹³ a epuumba ya Axeri, Seturi, mwaana mulopwana a Mixayeli;

¹⁴ a epuumba ya Naftali, Nahebi, mwaana mulopwana a Vofesi;

¹⁵ a epuumba ya Gadi, Geyuweli, mwaana mulopwana a Maki.

¹⁶ Ti yaala masina a asilopwana aarumihalaawe Moisesi weera yahottele elapo. Moisesi aamutteha Hoseya, mwaana mulopwana a Nuni nsina na Yoxuwa.

¹⁷ Moisesi aarumihaawe weera yahottele oKanaani, aaheera: “Mvire oNegebe ni mwapwaherere mpaka elapo ya mmanyaakoni.

¹⁸ Moone moota ekhanlaaya elapo ni muloko onkhalawo waareene woolipa hoye hoye woohilipa, yaareene ancipale hoye hoye vakhaani.

¹⁹ Moone elapo ankhalaaya yaareene yooreera hoye hoye yoonanara; isidade ankhalaaya saahitekeleliwe hoye hoye saareene soolipihiwa.

²⁰ Moone etthaya eyo yaareene ya ethaadyira hoye hoye yookhwelakhwela; waakhanleenewo othako hoye hoye naari. Mwiilipihere weera muruuhe soowiima sikina sikina sa mulaponi. Vano eyo yaari ehuhu saapaceriwaaya ohephiwa iwuuva*.

²¹ Awosa yaarowa, enahottela elapo, okhuma munikareni na oZini mpaka oRehobi, mpatta wa oLebo-Hamati.

²² Awosa yaavinre oNegebe, enaphiya oHebroni, aakhalaawewo Ahimoni, Xexai ni Talemayi a ekhapira ya Enaki. Vano, oHebroni waatekiwe ottuli wa iyaakha ithannapiili ohinaaye oZowani mulaponi mwa wExipitu.

²³ Ephiyaleene mureyareyani na wEskoli, yaathikila ephandi mwa yeeyo yaarino ekhuce ya iwuuva*. Eeli a yaawosa yaakuxa ekhuce etthukelenleene mukoponi. Yaarukulatho irooma* ni ifiigu.

²⁴ Nipuro nne niitthaniwa nreyareya na wEskoli niwoko na ekhuce ya iwuuva* yaathikinlaayawo.

²⁵ Evinreene mahuku miloko mixexe, awosa yaahokolowa yaarummwalaayawo ohottela elapo ele.

²⁶ Vano awosa yaahokoleela wa Moisesi, Aharoni ni muloko wootheene wa oYixrayeli elapo ya oKadexi, munikareni na oParani, yaathalihenraayawo sootheene yoonnaayawo ni yaawoonihera soowiima sa mulaponi.

²⁷ Yaamuthalihera Moisesi yoonnaaya: “Noovolowa mulaponi mwaanirumihenlaanyu, ni yoosareyawo emana*, mukaka ni oravo! Moone soowiima iya sa weiwo.

²⁸ Vaheera muloko onkhalawo ti woolipaxa ni isidade ti soolipihiwa ni sitokotoko. Noowoonatho akina a ekhapira ya Enaki.

²⁹ awAmaleki ankhala oNegebe; aHiti, aYebusi ni awAmori ankhala mmanyaakoni; aKanaani ankhala vakhiviru wa ephareiya muxerexere Yordanu.”

³⁰ Vano Kalebi aamaaliha muloko ohoolo wa Moisesi, aneera: “Nrowe nakuxe elapo ni hiyo nnoowera yeeyo!”

³¹ Vaheera asilopwana yaarongwe ni yoowo yaaheera: “Nihiwanane muloko owo, niwoko ti woolipaxa onipwaha hiyo.”

³² Vano awosa yaamwaramwaxa eriyari ya aYixrayeli mutthenga wookhootteya mwaha wa elapo ele. Awosa yaaheera: “Elapweene yeele naarongwaahu ohottela enaanyaanya yaawo ankhalamo. Ootheene niwoonnaahu ti oorakamaxa.

³³ Noowoonatho aNeefili* – ekhapira ya Enaki, moota wooweera hiyo niixoona ntoko misoope, ni awosatho yaanoona hiiho.