Nuumeru 11 - Emakhuwa Bible

Ottaandawula onikareni

¹ Waaheereya weera muloko waapacera wiikhupanyera niwoko na sookacamihasaya, emuleelaka Yave. Owo awiiwakaru, isarasawe saapatta ni mooro wa mpatta wa Yave waahaahisa eriyaraaya onalaliha mukhwipi mukina wa waakonelingwe.

² Vano muloko waamukhuwelela Moisesi ni owo aamvekela Yave, mooro onacipha.

³ Tivawo nipuro nne niitthaniwaaya oTabera, niwoko mooro wa mpatta wa Yave waahisa eriyaraaya.

⁴ Mukuttula mmoha wa anamarwa waari eriyaraayasa waasareya ohaawela sooca sa mulaponimwaya, ni aYixrayeli yaapacera wiikhupanyeratho, yeeraka: “Eya! Mano naarino enama yookhuura!

⁵ Hiyo nnuupuwelela ihopa naakhuuraahu mahaleene wExipitu, mpakatho mixiri, mwiirukule, aaliyu*, isebola ni iporawu*.

⁶ Vaheera vano munkhela woonimalela; seenre sootheene iyo sihooneyaka, ehikhanle emana* paahi!

⁷ Emana* yaalikana ni etthapweene ni ekhalelo mattonyo a otothowa wa nnyoma.

⁸ Muloko wannarowa ottottattotta emana* mukhwipimwaya, ni yaaxila vaxiloni hoye hoye yaatthipula muraweni. Vahoolowaya ti yaapeyaaya emana*, enapakela iboolu. Saasiva ntoko iboolu sooweetheeliwa makhura a sooliveira*.

⁹ Ohiyu nikame niimaaya waakonelingwe, ti yaamoraayatho emana*.

¹⁰ Moisesi aawiiwa atthu a imusi sootheene ettaandawulaka, khula mutthu vamulako wa eheemaawe. Vano isara sa Yave saapatta, ni Moisesi aahitta.

¹¹ Moisesi aamukoha Yave: “Munruuhelenleni yoonanara ela murumeiyaanyu? Ti niwoko na ohoosivelihaniwaka Nyuwo mukithanlalaanyu owehaweha muloko wootheene ola?

¹² Weeraka ti miyo kirupanle muloko ola? Ti miyo kiyanre? Munkivekelela heeni weera kihele vayaawani ntoko naamwaana onimukuxaawe mwaana ooyariwa vaanaano weera kironghe elapo mwaaroromelinghaanyu ni nlipelo makholowaaya?

¹³ Kaphwanye woowi enama wa muloko wootheene ola? Awosa ankikhupanya miyo yeeraka: ‘Munivahe enama weera nikhuure!’

¹⁴ Miyo nkingwera okuxa meekhaaka muloko wootheene ola; muteko ola wookivikana.

¹⁵ Mwakipakela hiiha, mukiive vaanaano va; mwakisivela, muhikihiye koonaka oheleyawaka nthala.”

¹⁶ Yave aamweerela Moisesi: “Mwaathukumanyihe asitokweene miloko mithannamiili a aYixrayeli mwaasuwenlaanyu ntoko ahooleli ni angwehaweha eriyari ya muloko. Mwaaronghe Muheemani ya Muthukumano* weera yakhalewo ni nyuwo.

¹⁷ Miyo kinookhuruwa ni kinimuulumawo ni nyuwo; kinoovenxa mpatta wa munepa ori mwa nyuwo kiheleke mwa yaawosa. Awosa animookhaviherani muteko wooviha woohoolela muloko, moota wooweera nyuwo khamwaaholeela meekhiinyu.

¹⁸ Muleele muloko: ‘Mwiitteeliherase omaalo, niwoko nyuwosa munookhuura enama. Yave oowiiwani mwaamukhupanyaanyu, mweeraka: ‘Eya! Mano naarino enama weera nikhuure! Fataari naaraahu wExipitu! Vano Yave onimoovahani enama, ni nyuwosa munookhuura.

¹⁹ Nyuwosa khamukhuura enama nihuku nimoha paahi, hoye hoye mahuku meeli, naari mathanu hata miloko miili,

²⁰ mene mweeri wootheene, mpaka enama owunkhani ni oweettihani murima, niwoko moomukhootta Yave ori variyariwanyusa, ni moomukhupanya, mweeraka: Nivenyenreni wExipitu?”

²¹ Wa soothesene, Moisesi aamweerela: “Miyo kiri va yeemelelo eriyari ya asilopwana 600 000, ni muneera: Kinimwaavahasa enama weera ekhuure mweehuhuni ya mweeri wootheene!”

²² Weeraka siiviwe mihuwo sootheene yaamukhala yookwanela yaawo? Weeraka ihopa sootheene sa mphareiya saawaruliwe yaamukhala yookwanela yaawo?

²³ Yave aamwaakhula Moisesi: “Weeraka onookota owera wa Yave? Vano nyuwo munimoona maswaaka yakwanihereya hoye hoye yaahikwanihereya.”

²⁴ Vano Moisesi aakhuma, anathalihera muloko yeeyo Yave aahimalaawe. Aahaathukumanyiha asitokweene miloko mithannamiili a eriyaraaya ni vahoolowaya aaweemexasa mukhwipi wa Eheema.

²⁵ Yave aakhuruwa munihutteni anamuulumano, anakhumiha mpatta wa munepa waari mwa Moisesi, anahela mwa asitokweene miloko mithannamiili. Munepa waakhuruwelakaru yaawosa, yaathalihera otthuna wa Muluku, mene khayaahokoleenletho opaka yeeyo.

²⁶ Vanonto asilopwana eeli yiitthaniwa Eldadi ni Medadi, yaahanle waakonelingwe. Ooweeli yaari munkuttulani wa asitokweene, mene khayaarongwe oHeemani. Munepa waahoorwatho wa yaawosa, enathaliherasa otthuna wa Muluku waakonelingwe.

²⁷ Vano mmiravo mmoha aatthimaka, anamuthalihera Moisesi: “Eldadi ni Medadi anthalihera otthuna wa Muluku okonelingwe.”

²⁸ Yoxuwa, mwaana mulopwanana a Nuni aari namakhaviheraawe Moisesi okhuma emiravowaawe aahuuluma, eeraka: “Apwiyaaka, Moisesi, mwaahiihase awo!”

²⁹ Vaheera Moisesi aahaakhula: “Nyuwo munkikhalela nthiti? Kinghaawelaxa weera Yave ahele munepa muloko wootheene ola ni ootheene ekhale maprofeeti!”

³⁰ Vano Moisesi ni asitokweene a aYixrayeli yaahokoleela waakonelingwe.

Yave onaaruuha anapiri

³¹ Vahoolowaya, yaahoopa epheyo ya mpatta wa Yave, enaaruuha anapiri a mphareiya anaamoroxela waakonelingwe wootheene, othataanyeranawaya wookwanaka emeetru* emoha, aamwaraxelaka mipatta sootheene ettima yookwana weetta nihuku nenenenno.

³² Nihuku nootheene nne, ohiyu ole ni nihuku naattharelana nootheene, muloko waavenya onaattottattotta anapiri. Khaawo aattontte woohiphiyera mirindi muloko.

³³ Vaheera ekhuuraka nlelo enama ni ehinaaye omira, isara sa Yave saapattela eriyari ya muloko, ni owo aavulaliha ni nihooxo noowoopiha.

³⁴ Tivawo nipuro nne niitthaniwaaya oKiberoti-Hataava, niwoko yaavithiwawo yaawo yaahaawela sooca sikina.

³⁵ oKiberoti-Hataava muloko waattimula orowaka oHazeroti, onakhalawo.