Nehemiya 6 - Emakhuwa Bible

Sooweerera sa amwiittana wooceeliha muteko

¹ Sanibalata, Tobiya, Gexemi, ngwArabi ni amwiittanaahu akina esuwelakaru weera miyo koorasela exiri ni weera khayaahanleru ekhato (kaarimweeraru kihihenle masele mmapuronimwaya ehuhuweene yeele),

² vano Sanibalata ni Gexemi yaakirumihela mutthenga ola: “Nrowe nathukumane mmuttettheni mmoha, onghawalawani wa wOno.” Wa soothesene, awosa yaahuupuwela okipakela yoonanara.

³ Vanonto, kaahaarumihela anamitthenga ni yoowaakhula ela: “Kiri oowaakameleyeene ni muteko mutokotoko ni nkinrowawo. Nkineemexera muteko ola weera kootthareeni.”

⁴ Yaakirumihela imaara ixexe mutthenga mmoharu ni imaara sootheene iyo kaawaakhula moota mmoharu.

⁵ Vano emaara yanaathanu Sanibalata aakirumihela mmoha a atthwaawe oororomeleya akunxeene ekaratta yoohuleya

⁶ elempwaleenemo masu ala: “Yeeriwa variyari wa miloko weera nyuwo ni aYuda mumvaanela ovaanya. Tivawo munraselaanyu exiri. Mpaka Gexemi oneera weera ti hiiho. Ohiya toko yeeyo, yeeriwatho weera nyuwo munookhala mwenaaya

⁷ ni mpaka mohaakhaliha maprofeeti weera yoothoonyeni oYerusaleemu, yeeraka: ‘Ookhala mwene oYuda!’ Vano mwene onkela wiiwa sa masu ala. Nrowe nitthekulele.”

⁸ Kaamurumihela yoowaakhula ela: “Kheewo munghimaanyu eneera yeereiye. Eyo ti yoopakelelaanyu.”

⁹ Awo ootheene, yanneerera onitteengula yuupuwelaka: “Awosa anootteenguwa moota wooweera khaammaliha muteko.” Wa soothesene, kaavekela: “Mulipihe murimaaka.”

¹⁰ Nihuku nimoha kaarowa vaate wa Xemaya, mwaana mulopwana a Delaya, mwaana mulopwana a Mehetabeli iiwalenle mpaanimwawe. Owo aaheera: “Nithukumane Mpaani mwa Muluku, mpuwa, ni niwaleke masele a Empa ya Muluku, niwoko atthu akina animoowa weera ewiiveeni ohiyuweene yoola.”

¹¹ Wa soothesene, kaamwaakhula: “Weeraka miyo kinootthawa? Mukina ntoko miyo onoovolowa Mpaani mwa Muluku weera iivuluxe? Hoye! Miyo nkinrowa!”

¹² Kaasuwela weera Muluku khaamuruminghe, mene weera aakihima miyo, niwoko Tobiya ni Sanibalata yaamuttiyasa makhwaankwa wa yeeyo.

¹³ Aattiyeliwe makhwankwa weera ekitutuxase ni weera ekitthekihe kapaka hiiho. Vano kapaka yeeyo, yaarwa okaaluxa ni atthwaaka khayaarwa okaakhulela.

¹⁴ Ii! Mulukwaaka mmuupuwelele Tobiya ni Sanibalata niwoko na yeeyo apankaaya. Mmuupuweleletho mprofeeti muthiyana Nowadeya ni maprofeeti makina aneerera okoopopiha.

Ommaleloni wa orasela

¹⁵ Vano, exiri yaamalihiwe vanihukuni nanaamiloko miili ni mathanu na mweeri Eluli, mmahukuni miloko mithanu ni meeli.

¹⁶ Amwiittanaahu ootheene esuwelakaru yeeyo, miloko soowaattamana sootheene saahoova sihovelaka, niwoko saasuwela weera muteko wootheene ole waamalihiwe ni ekhavihero ya Mulukwaahu.

¹⁷ Mahukweene yaaletho maneethi a oYuda yannamurumihela Tobiya ikaratta sincipale ni owo aarumihela soowaakhulasawe.

¹⁸ Vano ancipale a oYuda yaaroromelihasiwa ni yoowo munlipeloni, eenre akhala nkamwenaawe Xekaneya, mwaana mulopwana a Ara, ni mwanawe mulopwana, Yehokanani, aathelana ni mwaana muthiyana a Mexulami, mwaana mulopwana a Berekiya.

¹⁹ Awosa yannamuttapahera Tobiya vamaithoniwaka, emuthaliheraka yeeyo kaakhulaaka. Ni Tobiya annapwaherera okirumihela ikaratta sookoopopiha.