Nehemiya 2 - Emakhuwa Bible

Nehemiya onrumiheliwa oYuda

¹ Mmweerini oniitthaniwa Nisani, muyaakhani yanaamiloko miili ya mwene Aritaxaxete, ehuhu yoomurumeela eviinyu, miyo kaamuronghela mwene. Nkinatoko othananaxa ohoolowawe.

² Tivawo mwene aakikonghaawe: “Heeni ekhovaawo eraaya yoohitteene weyo ohivoreiwaka? Ohitta wu okhalaka wa murima.” Miyo kaahoova vancipale,

³ kinamweerela mwene: “Mwene akhale ni okumi mahuku ootheene! Ekhovaaka enghittela, niwoko esidade, mwa weiwo makholowaaka avithingwaaya, eri mathala ni maselaaya aahisiwa.”

⁴ Mwene aakeerela: “Weyo ontthunani?” Vano miyo, kivekelaka wa Muluku a wiirimu,

⁵ kaamwaakhula mwene: “Wooreenreni amwene ni murumeiyaanyu aakhuleleya vamaithoniwanyu, mukitthunihere orowa esidade eri oYuda mwa mweiwo avithingwaayamo makholowaaka weera kateketho.”

⁶ Vano mwene ni pwiyamwene akilaantheene mukhwipimwawe, aakikoha: “Ommala mahuku mahai mukwaahaawo ni onghokolowa yaakhani?” Kaahaaleela amwene malekelelowaaka, ni awo yaakaakhula weera kiroweke.

⁷ Kaamweerela mwene: “Wooreenreni amwene, mukivaheke ikaratta wa maguvernadori ari okhopela mooloko Efratesi weera ekitthunihere ophiya oYuda.

⁸ Mukivahetho ekaratta wa Asafi, mutokweene a othako wa mwene weera akivahe itthaabwa soopakela masele a esidade yoolipaxa eri vakhiviru ni Empa ya Muluku, wa exiri ya esidade ni wa nipuro kineeraaka kakhale.” Weenre onnene wa Muluku wakhala ni miyo, mwene aakaakhulela soovekelasaka.

⁹ Vano kaarowa wa maguvernadori ari okhopela mooloko Efratesi, kinaavaherera ikaratta sa mwene. Vanonto, mwene aahaarumihatho asitokweene akina a anakhotto ni anamweettiha ikavalu* weera ekihoole.

¹⁰ Sanibalata, muHoroni ni Tobiya, ngwAmoni mutokweene mmoha, yiiwaka yeeyo, khayaahakalalanse woowoona weera mukina ohoorwa aasaasaka mpuha wa aYixrayeli.

Owehawehiwa wa ixiri

¹¹ Kaaphiya oYerusaleemu ni kiviringheenewo mahuku mararu,

¹² kaavenya ohiyu ni asilopwana akina vakhaani. Nkaamuthalihenre naari mutthu mmoha yeeyo Mulukwaaka iikaathenraawe mmurimanimwaka yoopakela oYerusaleemu. Nkaamukuxaleru mwaamunama mukina ahikhanle yoowo kaangwenlaaka.

¹³ Moohiyuni kaakhuma kiviraka Mulako wa Oreyareyani kirowaka oNaattuuttuni wa Khwatte ni Mulako wa Osalani, kiwehawehaka exiri ya oYerusaleemu yaakurumuliwe ni milakosaya saahisiwe.

¹⁴ Vahoolowaya kaarowa mpaka Mulako wa Naattuuttu ni ontthiyani wa mwene, mene khanaariwo nlaka noovira mwaamunamaaka.

¹⁵ Tivawo kaawelenlaaka oreyareyani ohiyu kiwehawehaka exiri. Vahoolowaya kaahokoleela kivoleelaka Mulako wa Oreyareyani.

¹⁶ Asitokweene khayaasuwenle weiwo kaarongwaaka hata yeeyo kaapankaaka, niwoko mpaka ehuhuweene yeele miyo nkaaleenle etthu aYuda naari asaserdoti*, hata maneethi naari asitokweene hoye hoye akhalaru mukina a yaawo yeera ekwanihere muteko ole.

¹⁷ Vano kaaweerela: “Moone mahooxo nraahuno: oYerusaleemu wooheleya nthala ni milakosaya soohisiwa. Nrowe, niteketho exiri ya oYerusaleemu weera nihipwahereretho mmukhaleloni ola woonyoorweya.”

¹⁸ Kaahaathaliheratho moota wa onnene Yave aaraaweno ni miyo ni yeeyo mwene aakeerenlaawe. Vano awo yaahaakhula: “Nrowe niteketho.” Vanonto yaasareyasa olipa murima woovara muteko wooreera ole.

¹⁹ Sanibalata, muHoroni, Tobiya, ngwAmoni mutokweene mmoha, ni Gexemi, ngwArabi yiiwaka yeeyo, yaanitheya, eninyemulaka yeeraka: “Mumpakani? Munimvaanya mwene?”

²⁰ Miyo kaawaakhulasa: “Muluku a wiirimu onooneettihera nnene. Hiyo, arumeiyaawe, nnoopacera otekatho. Vaheera nyuwo khamunono mpatta, hata nsu muYerusaleemu, niwoko khamumpatta nnyahanimwaya.”