Nehemiya 1 - Emakhuwa Bible

Mwaha wa Nehemiya

¹ Masu a Nehemiya, mwaana a Hakaliya ti ala: Mmweerini oniitthaniwa Kisilevi, muyaakhani yanaamiloko miili, miyo kireene musidadeni yoolipaxa oSusa,

² Hanani, mmoha a axunnaka, aarweenle oYuda vamoha ni asilopwana akina. Vano kaahaakohakoha mwaha wa aYuda yaahanlewo vahoolo wa ehuhu yaavariwaaya ancipale eroihiwaka oBabiloniya ni mwaha wa oYerusaleemu.

³ Awo yaakaakhula: “Yaawo ahanle vahoolo wa ehuhuweene yeele annahaawa vancipale ni annayevihiwa. Exiri ya oYerusaleemu yookurumuliwa ni maselaaya aahisiwa.”

⁴ Kiiwakaru itthusene seiye kaathanana, kiinlaka. Wa mahuku makina kaalalamika, kitthukaka ni kivekelaka vamaithoni wa Muluku a wiirimu.

⁵ Vano kaaheera: “Ii! Yave, Muluku a wiirimu, Nyuwo ti Mutokotoko ni Oowoopiha ni munttittimiha wiiraanawanyu wa osivela ni yaale anoosivelani ni aniiwelela malamulowaanyu.

⁶ Maaruwaanyu ewiriyaneke ni maithwaanyu ehuleyeke wa mavekelo murumeiyaanyu ompakaawe ohoolowanyu othana ni ohiyu aweerelaka arumeiyaanyu, aYixrayeli. Kinlapa soottheka hiyo, aYixrayeli, nootthekenlaahuni. Aani, miyo ni mulokwaaka noottheka.

⁷ Noheetta ntoko attiyamaaru woowuuliheya muru wa Nyuwo. Khaniiwelenle ikano, malamulo ni soonyesereriwa mwaamvanghaanyu murumeiyaanyu, Moisesi.

⁸ Vano, muupuwelele mwaamweerenlaanyu murumeiyaanyu Moisesi: ‘Nyuwo mwaahiroromeleya, Miyo kinimoomwaramwaxelani variyari wa miloko.

⁹ Vaheera, mwakihokoleela mwiiwelelaka malamulowaaka mweettelaka yaawo, vano Miyo kinimoothukumanyasani naari nyuwosa mmwaramwareiyeene mmapuroni oorakamela. Aani, kinimooruuhasani nipuro kithanlalaaka weera nimakewo Nsinanaka.’

¹⁰ Awo ti arumeiyaanyu ni mulokwaanyu, mwa yaawo ngwooponlaanyu ni ikurusanyu sitokotoko ni Ntatananyu noolipaxa.

¹¹ Ii! Yave, Maaruwaanyu ewiriyaneke nivekelo na murumeiyaanyu ni mavekelo a arumeiyaanyu anoova Nsinananyu. Mweerihe weera murumeiyaanyu ola olelo arandeliwe nnenesene areereliwaka murima wa mwene.” Vano ehuhuweene yeele miyo kaari namarumeela a soowura a mwene.