Namalaleiya 7 - Emakhuwa Bible

Yoole orino miruku

¹ Fataari nsina nooreera ohikhanle makhura oowunkhela oorikaxa, ni nooreerela ti nihuku na okhwa ohikhanle oyariwa.

² Fataari orowa omarironi ohikhanle ofestani, niwoko okhwa ti ommaleloni wa ootheene; akumi ehikuxereke matheela yeeyo!

³ Fataari othanana ohikhanle otheya, niwoko ekhove yoothanana enreeriha murima.

⁴ Murima wa musuweli ori vaate ori olalamika, vaheera murima wa mulolo ori vaate onghakalaliwa.

⁵ Fataari wiiwa ohiiha wa musuweli, ohikhanle wiiwelela icipo sa alolo.

⁶ Otheya wa mulolo ori ntoko nivisi na nyiiwa vathi wa esupuriya; eyotho kheentaphulelaru etthu.

⁷ Ewinelo yoohiroromeleya enimutatuxa musuweli okhala mulolo, ni makhwankwa annanariha murima.

⁸ Fataari ommaleloni wa itthu ohikhanle ompacereroniwaya, ni fataari ovilela ohikhanle wiikuxerera.

⁹ Muhitthunihere otannyereya isara woowaakuveya okumaanyu, niwoko isara sinkilaathi vaciroroni wa alolo.

¹⁰ Muheere: “Yaareerenle heeni mahuku a khalayi opwaha oolelo?” Vano, makoheroweene yaawo khaanrweela mmirukuni.

¹¹ Miruku ti sooreera – ntoko yoohiyeriwa; sinaakhaliha nnenesene yaawo ankhala mulaponi.

¹² Miruku waakiha, ntoko onaakihaaya musurukhu, vaheera mureerelo wa esuwelo ti ola: Miruku sinuurela okumi wa yoowo orino seiyo.

¹³ Moonelemo yeeyo Muluku ompakaawe: Taani ongwera wookola yeeyo Owo opankaawe yookhoromaneene?

¹⁴ Mahuku yaakhalaka ooreera, mweettihe nnenesene; vaheera yaakhalaka oonanara, moonele ha: Muluku opanke yaawo ntoko nikhwaaya, asembihaka weera mutthu ahoonelele etthu ya muhoolomwawe.

Ethale ya okumi

¹⁵ Mookumini ola ohintaphulela etthu, miyo kohoona sootheene: Oororomeleya akhwaaka aarookhalaru oororomeleyeene, ni mutakhali akhalakano okumi mwincipale aarookhalaru mootakhalani.

¹⁶ Muhikhalaxe oororomeleya hata muhaattanaxe miruku; mmwiiphwatele heeni?

¹⁷ Muhitepaxe okhala mutakhali ni muhikhale mulolo; mmwikhweleni ehinaaye ophiyera ehuhuwaanyu?

¹⁸ Fataari ovarexexa olakiwa omoha muhihiyaka okina, niwoko yoowo ommova Muluku onootthara soopiili.

¹⁹ Miruku sinimukhaliha musuweli mmoha ooweraxa waapwaha alamuli muloko musidadeni.

²⁰ Vanonto, khawoworu naari mmoha mulaponimu oororomeleya ompaka yooreera, ahinatthekaru.

²¹ Muhiwiriyane masu ootheene anghimmwa ni muloko; ohiyanawaya, onoowereya omwiiwa mpaka murumeiyaanyu awuulumelakani soonanara;

²² niwoko vamurimaniwanyu moosuwela weera nyuwotho imaara sincipale moowuulumela soonanara akina.

²³ Sootheene iyo miyo kaawehaweha mmirukuni, keeraka: “Koolakela okhala musuweli;” vaheera eyo nkiwenreru.

²⁴ Ekhaikhai eri ottaiwenexa ni ti yoowiixeraxa; vano taani anaawere woonelela?

²⁵ Tivawo kikhalenlaaka nthiti wiiwexexa, waasaasera ni waasaasa miruku ni osuwela moota siraaya itthu, ni weera kiiwexexe ohimiruku wa otakhala ni ololo wa ohimiruku.

²⁶ Kohoonelela weera yootepaxa owaawa opwaha okhwa ti muthiyaya ori muraakho, mwa yoowo murimaawe ti ntapha ni matataawe ti onyooro. Vano mulopwana onimusiveliha Muluku, onimoopowa mwa yoowo, vaheera namattheka onoovariwa ni yoowo.

²⁷ “Moone,” onghima muhusiha, “koonelenlaaka ti ela: Kaalikanxaka ekina ni ekhwaaya weera koonelele moota eraaya,

²⁸ aani mweehuhuni ya waasaasawaka iwo nlelo ohikonte, kimoonne mulopwana oororomeleya mmoha paahi eriyari ya asilopwana macira muloko, vaheera eriyari ya asithiyana, nkimphwannyeru naari mmoha.

²⁹ Yeeyo koonelenlaaka ti ela paahi: Muluku ohaapaka atthu oororomeleya, vaheera awosa yaasaanse mikhalelosaya sincipale.”