Namalaleiya 1 - Emakhuwa Bible

Kheewowo eri yoowooneleya

¹ Masu a muhusiha, mwaana mulopwana a Davide, mwene a oYerusaleemu ti ala:

² Moota ohivareleiyaaya muteko! Moota ohivareleiyaaya muteko, onghima muhusiha. Ii!, moota ohivareleiyaaya muteko! Kheentaphulelaru etthu!

³ Etthu heeni ongwinaawe mutthu ni mutekwaawe woovihaxa wootheene mulaponimu?

⁴ Ikhapira singwa ni iyo sinoorowatho, vaheera elapo enoopwaherera mahuku ootheene.

⁵ Nsuwa ninkhuma ni nno nnooneelatho, ni woowaakuveya ninghokoleela weiwo naakhumalaayawo.

⁶ Epheyo enoopela ohitto enarukunuwela ottuttuwani; enrukureerasa erowaka enkelaayawo.

⁷ Nyooloko sootheene sinkela mphareiya, mene ephareiya kheensararu. Nyooloko singhokoleela ota weera siviremotho.

⁸ Itthu sootheene ti sookhulumula, mutthu khangwera othaliha; maitho khaankwaneya woona, hata maaru khaankwaneya wiiwa.

⁹ Yeeyo yeereiye, enimweereyatho, yeeyo epakingwe, enoopakiwatho. Kheewowo etthu enyowani vathi wa nsuwa.

¹⁰ Kheekhala etthu eneera yeeriwe: “Moone! Ela ti enyowani. Yaari yookhaleene okhuma khalayi, hiyo nihinaaye.”

¹¹ Khawoworu onuupuwelela seiye sooniwe khalayi, ni seiyo sineera seereiye, khasuupuweleliwaru ni yaawo eneera erwe muhoolomwaya.

Waasaasa miruku wa siiyo

¹² Miyo, muhusiha, kaari mwene a oYixrayeli, mulaponi mwa oYerusaleemu.

¹³ Kookhalela nthiti waasaasera ni woonelela miruku weera kisuwele nnenesene sootheene simpakiwa vathi wa nsuwa. Ela ti yoolemela yootepaxa Muluku ovanghaawe omutthu!

¹⁴ Kohoona sootheene simpakiwa vathi wa nsuwa; sootheene khasimvareleya muteko, ti woomola epheyo!

¹⁵ Yeeyo eri yookhoromana kheenookoleya; yeeyo enghaleela kheenaalikeleliwa.

¹⁶ Kuupuwela: “Miyo koothatuwa neepili kikhalanaxaka miruku waapwaha ootheene alamunle oYerusaleemu, miyo kihinaaye; vekhaikhai koophwanyaxa miruku ni esuwelo yincipale.”

¹⁷ Tivawo kiilipihenraaka weera kiiwexexe miruku, mpakatho ololo ni ohimiruku, vaheera kooxuttera weera iwotho ti woomola epheyo.

¹⁸ Vano okhalanaxa miruku, onaattaxa ohaawa; yaattaxaka esuwelo, ohaaweya.