Nahumi 1 - Emakhuwa Bible

Isara soowoopiha sa Muluku mwaha wa oNinive

¹ Masu a Muluku mwaha wa oNinive ti ala. Ela ti elivuru ya moonelo wa Nahumi, ngwElekoxi.

² Yave ti Muluku a ehace ni nakukuttula. Aani Yave onrulela ikukuttula onyoonyiwawawe ti woowoopiha. Yave onaarulela ikukuttula amwiittanaawe ooniheraka isarasawe wa yaawo.

³ Yave ti oopixaxa murima ni a ikuruxa; Owo khanimuhiya woohimuttaruxa nanthowa. Ephirowaawe eri muyuupuruni ni mutthekuni; mahutte ti ari ntthupi na inaawosawe.

⁴ Owo onghiiha ephareiya ni eyo enuuma; ongweleliha nyooloko sootheene. Owo onnyaaliha muncihiwamo inama oBaxani ni oKaremeli vamoha ni ithutu sa oLibanu.

⁵ Nyaako sintetereya ohoolowawe ni mattumuxa anootothowa. Elapo enimoopopiheya ohoolowawe ni ootheene arimo.

⁶ Khaawo angwera ovilela onyoonyiwawawe hata isarasawe. Onyoonyiwawawe omvarela ntoko mooro ni nyala simphweeya ohoolowawe.

⁷ Yave ti ooreera murima; wootthawelawo mweehuhuni ya ohaawaxa. Owo ongwaakiha yaawo animuroromela.

⁸ Vaheera onoomaliha oNinive ni mirupi; onoowoomolela amwiittanaawe mpiphini.

⁹ Yave onoomaliha sakhalaru soomvaanelela; khoonrwatho osomelana emaara yanaaveeli.

¹⁰ Amwiittanaawe animwaanga munyiiwani esareiyeene nluma; anoohisiwa ntoko malaxi oowuumaxa.

¹¹ Mwa weyo Ninive, ookhumelela mukina ni soowuupuwela sooriheya amvaanelelaka Yave.

¹² Yeeyo Yave onghimaawe ti ela: “Arookhalaru oolipa ni oowaatta, anoophwatiwa, elakaseyeke. Vaheera wa nyuwo, Yuda, kaari mooyevihaniru, nkinooyevihanitho.

¹³ Kinoovenxa soolemelasanyu muxikomwanyu kootaphulakani aliceemaanyu.”

¹⁴ Wa weyo, Ninive, Yave ongweerela ha: “Khookhalano ekhapira eniipwahererihe nsinananawo. Kinoophwata icaambulo sa nyiri ni miluku sa iyuuma siri mpaani mwa milukusawo. Kinimoorehererela nihiyenawo, niwoko weyo ti oothanyeya.”

¹⁵ Woone oYuda! Siriwo vamwaako inaawo sa yoole onruuha mutthenga wooreeraxa ni onlaleiya murettele! Opakeke ifestasawo oYuda ni okwanihere soororomelihasawo. Anamariheya kheerwatho ehonona; awo anoophwataxiwa.