Miteko 5 - Emakhuwa Bible

Ananiya ni Safira

¹ Mulopwana mmoha iitthaniwa Ananiya, vamoha ni amwaarawe Safira, yaathumihatho ematta.

² Owo aahalano mpatta wa musurukhu, ni mpatta mukina aakuxa ni aahiikaathi vanaawoni sa arummwa. Vano amwaariye yaasuwelatho sa mpatteene yoowo.

³ Pedru aamukoha: “Ananiya, heeni Satana osareiyaawe mmurimanimwanyu weera mulokotthe Munepa Wootteela, mwiithokororelaka mpatta wa musurukhu mwaakhenlaanyu wa ematta?

⁴ Eyo khayaahiyono yawinyu? Ni muthumihakaru yeeyo, musurukhutho waari wawinyu. Ewuupuwelingheni eheeni opaka etthuweene yeeyo? Nyuwo khamwaalokontthe atthu, mene Muluku.

⁵ Iiwakaru yeeyo, Ananiya aamorela vathi ni aahookhwa. Woova otokotoko wahaamorela yaawo ootheene yiiwale yeeyo yaakhumelenle.

⁶ Vano amiravo akina yaarowa, enawariha erutthwaawe, enakhumihera vaate ni yaavitha.

⁷ Siviraka iwoora tthaaru, amwaariye yaavolowa, ehisuwelaka yeeyo yaakhumelenle.

⁸ Pedru aamukoha: “Mukileele, mwaathumihale ematta ni mutteengweene yoola?” Owo aamwaakhula: “Aani, ti yoola.”

⁹ Pedru aamweerela: “Heeni nyuwo mwaavaanelaanyu weerera Munepa wa Apwiya? Moone, inaawo sa yaawo yaavithale aiyinyu siri vamulako, ni awo animookuxanitho.”

¹⁰ Ehuhuweene yeele emoharu owo aamorela vathi ni aahookhwa. Vano amiravo yaavolowa, ni ephwanyaka muttembo, yaakuxa ni yaavitha mukerekhere wa aiyawe.

¹¹ Woova otokotoko waasareya ekerexa yootheene ni wa yaawo ootheene yiiwale wuulummwa wa sookhumelela iye.

Arummwa anaalamiha atthu ancipale

¹² Arummwa yaapaka ineneero ni sootikhiniha sincipale variyari wa muloko wa atthu. Ootheene yaaroromenle, yannakhovelela othukumana muntthekoni wa Salomoni.

¹³ Wa akina, khaawo eerenre wiitakansa ni yaawo, naamwi muloko wa atthu wootheene waahima sooreera sa yaawo.

¹⁴ Asilopwana ni asithiyana Yaawo yaaroromela mwa Apwiya yannaandyeerereya,

¹⁵ moota wooweera muloko waakuxa aretta mmuseweni ni waawiikaathi mmabeettini ni mmarepani weera aaviraka Pedru, mano erungwaawe yaakhuneele akina a yaale.

¹⁶ Yaahoorwa atthu ancipale a isidade saattamenle oYerusaleemu, yaaruuhaka arettaaya ni yaawo yaahooxiwa ni minepa soonanara, ni ootheene yaalamihiwa.

Osoondiwa wa arummwa

¹⁷ Vano mutokweenexa a asaserdoti* ni ootheene yaawo yaamuhoola, yaale yaari mpatta wa aSaduki*, yaasareya nrima.

¹⁸ Yaahaavara arummwa ni yaahaawalela mukaliposo mwa ebooma.

¹⁹ Ehuhutho ya ohiyu, ndyelo mmoha a Apwiya aahula masele a okaliposo ni aahaakhumihera vaate,

²⁰ aweerelaka: “Murowe, mwiixoonihere Mpaani mwa Muluku, ni mwathalihere muloko mutthenga wootheene wa okumi ola.”

²¹ Oxaawaya, yaavolowa Mpaani mwa Muluku ntoko yaalamuleliwaaya, ni yaapacera oxuttiha muloko wa atthu. Aphiyakaru mutokweenexa a asaserdoti* ni yaawo yaamuhoola, awo yaahiitthana eSineedriyu*, eyo tiiyo muthukumano wootheene wa asitokweene a aYixrayeli, ni yaalamulela waarowela arummwa okaliposo.

²² Wa soothesene, ephiyakaru mukaliposo, anamalipelela khayaaphwannyemo. Vano yaahokolowa ni yaathaliha:

²³ “Noophwanya okaliposo olipihiweene nnenesene ni anamalipelela ohoolo wa milako, mene nihulakaru, khaawowo mutthu.”

²⁴ Yiiwalaaya ethalihero yeeyo, mutokweene a anakhotto a Empa ya Muluku ni ahooleli a asaserdoti* yaatikhina, yuupuwelaka yaari eheeni yeele.

²⁵ Wa yeeyo, aaphiya mukina ni aaheera: “Asilopwana nyuwo mwaawalenlaanyu okaliposo ari Mpaani mwa Muluku, exuttihaka muloko wa atthu.”

²⁶ Arowaka weiwo ni asitokweene akina a anakhotto, mutokweene a anakhotto aahaakuxa arummwa aaronghaka oSineedriyuni*, mene khayaakuxera ikuru, niwoko yoova weera muloko wa atthu oniwaavonye maluku.

²⁷ Yaakuxaka arummwa, yaahaarongha oSineedriyuni* weera ekohakohiwe ni mutokweenexa a asaserdoti*,

²⁸ mwa yoowo aaweerenle: “Nohoolamulelani nnenesene weera muhixuttihe mwa Nsina nne. Wa soothesene, nyuwo moosariha oYerusaleemu ni nihusihonanyu, ni muntthuna onoothera ephome ya Mulopwana Owo.”

²⁹ Pedru ni arummwa akina yaamwaakhula: “Ontthuneya omwiiwelela toko Muluku, ohikhanle wa atthu.

³⁰ Muluku a makholowaahu aamuvenyereriha Yeesu, mwa Yoowo nyuwo mwaamwiivalaanyu, munthomeyaka vamuttandani.

³¹ Muluku aamvuwiha, amwiikaathiki moonowaawe mulopwana ntoko Mutokweene ni Mvuluxa, weera aavahe aYixrayeli orukunxa murima ni elevelelo ya soottheka.

³² Hiyo nri anamoona a itthusene seiya, nitho Munepa Wootteela Muluku aavanghaawe yaale ammwiiwelela.”

³³ Yiiwaka yeeyo, awo yaanyoonyiwa vancipale ni yaatthuna owiiva.

³⁴ Vano muFarisi* mmoha iitthaniwa Gamaliyeli, namawera a nlamulo* ni oottittimihiwa ni muloko wootheene, aaheemela muSineedriyuni* ni aavekela weera arummwa ekhumihiwe wa ehuhu vakhaani.

³⁵ Vano aaweerela: “aYixrayeli, muupuwele nnenesene yeeyo nyuwo muntthunaanyu waapakela atthu awo.

³⁶ Wa ehuhu ya khalayi vakhaani, aahoorwa Theuda eeraka weera ti mutokweene mukina, ni wookwanaka asilopwana macira maxexe yaathukumana vamoha ni yoowo. Owo aahiiviwa, ni ootheene yaamutthara yaamwareiya, ni sootheene saamala siiyoweene.

³⁷ Vahoolowawe, wa mahukuni a namalepela aahoorwa Yudasi muGalileiya, aahoolenle atthu akina weera ewane. Owo aahiiviwatho, ni ootheene yaamutthara yaamwareiya.

³⁸ Tivawo, mwaha wa atthu awo ari vaate, miyo kinimoolakani: Mwaahiye ni murettele asilopwana awo, ni mwaataphule. Waari weera otthunawaya ni mitekosaya siri sa omutthu, sinoomala,

³⁹ mene sakhumelela wa Muluku, nyuwo khamungwera owooceeliha, ni munookhala ngwoopihani owana ni Muluku.”

⁴⁰ Awo yaaviriyeliwa ni masu a Gamaliyeli. Yaawiitthana arummwa ni yaalamulela weera ewaaxuliwe. Vahoolowaya yaahaalamulela weera ehuulume mwa Nsina na Yeesu, ni yaahaahiya erowaka.

⁴¹ Arummwa yaavenya oSineedriyuni*, ehakalanleene yaaphwanelihiwa oyevihiwa niwoko na Nsina na Yeesu.

⁴² Mahuku ootheene Mpaani mwa Muluku ni empa ti empa, awo khayaahiya oxuttiha ni olaleiya weera Yeesu ti Kristu.