Miteko 27 - Emakhuwa Bible

Mukwaha wa Pawulo wa oRooma

¹ Waalakeliwaaya weera naarowa olapuwa wookela wItaliya, Pawulo ni ootthukiwa akina yaavahereriwa wa kenturiyoni* mmoha iithaniwa Yuliyo, aari a anakhotto a Seesari.

² Naavolowa munikulani na wAdramito neera nirowe mapuro makina a elapo ya wAsiya, ni naapacera mukwaha areene ni hiyo Aristarko, mutthu a oTesalonika, a elapo ya oMasedoniya.

³ Oxaawaya naaphiya oSidoni, ni Yuliyo, amooniheraka Pawulo murima wooreera, aamutthunihera weera akumane ni asinthamwenaawe weera awo emvahe soohaawelasawe.

⁴ Nivenyaka iwe, naavira ottuttuwani wa oKipro, niwoko epheyo yaanivirikanyiha.

⁵ Nilapuwaka ephareiya ya oSilisiya ni ya oPanfiliya, naaheemexa oMira, elapo ya oLisiya.

⁶ Weiwo kenturiyoni* aaphwanya nikula ntokotoko na wAlesandriya neera nipwahe nirowaka wItaliya, ni mwa nenno aaniwelihamo.

⁷ Naalapuwa vakhaani vakhaani, eviraka mahuku mancipale, ni naaphiya ni ohaawa oKnido. Woonaka weera epheyo yaanooceeliha opwaherera mpattaahu, naavira ohitto wa oKreta, okhopela wa oSalmona.

⁸ Naalapuwa okerekherewaya ni ohaawa, ni naaphiya nipuro niitthaniwa Mixelo Sooreera, vakhiviru wa esidade yiitthaniwa oLaseya.

⁹ Naayeleela ehuhu yincipale, ni weettawahu waathatuwa woopiha niwoko yaaviratho ehuhu ya otthuka. Tivawo Pawulo aawooperenraawe:

¹⁰ “Atthu nyuwo, kinoona weera mukwahaahu eniikhumelele yoothananiha, khoohiyono paahi wa nikula ni mirindi, mene wa okumaahutho.”

¹¹ Vaheera Kenturiyoni* aahiiwelela olaka wa namweettiha ni wa mwaneene a nikula, akhoottaka olaka wa Pawulo.

¹² Woonaka weera khawaawereya ovira mulaala vamuxeloni vale, atthu ancipale yaalakela weera waatthuneya opwaherera, eroromelaka ophiya oFeniki, weera nakhale weiwe ehuhu ya mulaala wootheene. Owo waari muxelo wa oKreta, waaweha ninkela nsuwa osulu vakhaani ni ohitto vakhaani.

Ettheku

¹³ Epaceraka woopa vakhaani epheyo okhuma ohitto, awo yaahuupuwela weera yoophiya ehuhu yaahaawelaaya; tivawo yaataphunlaaya soolipano nikula ni yaapacera weettiha erowaka mukerekhere wa oKreta.

¹⁴ Vahoolo vakhaani, epheyo etokotoko yiitthaniwa Eurokloni, ekhumaka mpatta wa ecirumba, yaamana nikula.

¹⁵ Nikula naavariwa ni ettheku ele, nihiweraka weettiha mpatta naarowaahu, ni hiiho naahiya weerera ni naapacera okakheliwa okerekhere.

¹⁶ Niviraka ohitto wa ecirumba ekhaani yiitthaniwa Kawuda, naawera otthukelela ni ohaawa nikula noowoopola*.

¹⁷ Evoleihaka munikulani, yaalipihera nikula ntokotoko, evitikelelaka ni mikoyi. Vano, yoovaka weera nikula nnikhitte muhaava wa oSirti, yaakuruxa iveela sa nikula, ni hiiho naaheettihiwa ni epheyo.

¹⁸ Oxaawaya, nimaniweene vancipale ni ettheku, yaapacera ovonyera mirindi mphareiyani.

¹⁹ Nihuku nanaararu yaapacera ovonyera ni matataaya itthu soolemelaxa sikina saari munikulani.

²⁰ Nihooneyaka nsuwa, hata ithenyeeri wa mahuku mancipale ni epwahereraka onimana ettheku etokotoko, ommaleloni waanimalela ororomela wa ovuluxiwa.

²¹ Hapo asilopwana yaaviriha ehuhu yincipale ehicaaka, Pawulo aaheemela ohoolowaya ni aaweerela: “Atthu, nyuwo waatthuneya weera mwiiwelele olakawaka weera nihivenye oKreta, niwoko hiiho saano musembeene onanariheya ni ohoononeya wu.

²² Mene vano kinoolakani weera mulipihe murima, niwoko khaawo mmoha a nyuwo aneera akhwe; nikula paahi nniphwateiye.

²³ Ohiyu wa osilo, aakirweela ndyelo mmoha a Muluku mwa Yoowo miyo kiraaka awawe ni mwa Yoowo kinimulapaka, ni ndyelo owo aakeerela:

²⁴ ‘Pawulo, muhoove. Ontthuneya weera nyuwo muphiye ohoolo wa Seesari. Muluku aahoovahani mmahalanimwawe okumi wa ootheene anlapuwa ni nyuwo.’

²⁵ Hiiho mukhale ni murima woolipa! Kinimuroromela Muluku weera eniikhumelele mooteene yoowo kileeliwaaka.

²⁶ Ontthuneya weera hiyo nikakheliwe ecirumba ekina.”

Okakhiwa wa nikula

²⁷ Siviraka isimana piili okhuma ovenyawahu, ohiyu owo hiyo nikuxiwaka nlelo mpatta mukina ni mukina mphareiyani ya wAdriya, oreene ohiyu eriyari anamiteko a nikula yaahuupuwela weera naahaattamela vakhiviru wa etthaya.

²⁸ Evonyeraka mmaahini eyuuma yooringa wiixa, yaahoona weera wiixawaya waari imeetru* miloko miraru niithannapiili. Vahoolo vakhaani, yaavonyera veeli eyuuma ni yaaphwanya wiixawaya wa imeetru* miloko miili niithannapiili.

²⁹ Noovaka weera nnikakheliwe vamalukuni, yaavonyera ottuli wa nikula iyuuma ixexe sooweemexa* nikula, ni naahaawela weera waaxiiye.

³⁰ Anamiteko a nikula yaatthuna otthawa munikulani ntokotoko, ni yaakuruxela nikula noowoopola* mphareiyani, yiixeeraka weera yaatthuna ovonyera ohoolo wa nikula iyuuma sooweemexa* nikula.

³¹ Vano Pawulo aamweerela kenturiyoni* ni anakhotto: “Alopwana ala yaahikhala munikulani, nyuwo khamungwera ovuluwa.”

³² Tivawo anakhotto yaapansaaya mikhoyi saatthukeleliwe nikula noowoopola* ni yaahiya nimoraka.

³³ Ohanleene vakhaani oxa, Pawulo aahaanyesereriha weera ootheene ece, eeraka: “Olelo nimmala mahuku muloko ni maxexe nyuwo mureene munnaweherera muhicaaka etthu.

³⁴ Vano miyo kinoolakani oca etthu, niwoko hiiho, munoowera okhala ni okumi. Khaawo mmoha a nyuwo aneera ayeleele naari niihi nimoha na muruwaawe.”

³⁵ Ahimaka yeeyo, aakuxa epaawu ni aamutthapela Muluku ohoolo wa ootheene. Aameyanya ni aapacera okhuura.

³⁶ Ootheene yaalipa murima ni yaakhuuratho etthu.

³⁷ Yaari munikulani atthu macira meeli ni miloko mithannamiili niithannamosa.

³⁸ Emalihaka oca mpaka ovona, yaavukula olemela wa nikula, evonyeraka etrigu yootheene mphareiyani.

³⁹ Oxaakaru, khayaasuwenle elapo ele, mene yaahoona muxelo ni mukerekheremwaya weiwo yaalakenlaaya weettiha nikula wawereya.

⁴⁰ Ethikilaka iyuuma sooweemexa nikula, yaahiya mphareiyani, ni ehuhuweene yeele yaataphula mikhoyi sa etthaabwa eneettiha mpatta wa nikula*. Yaaheemexa ohoolo wa nikula ekuwo etokotoko opheyoni ni yaaheettiha wookela mukerekhere wa ephareiya.

⁴¹ Nikulatho naakhitta nipuro na muhaava ni naakhalawo niheettaka. Mpatta wa ohoolo wa nikula waavara wa muhaavani, weemelakawo, ni mpatta wa ottuli waaphweeya niwoko na ikuru sa mitekuteku.

⁴² Anakhotto yaalakela owiiva ootthukiwa weera ahitthawe naari mmoha a yaale, iivonyeraka mphareiyani.

⁴³ Vaheera kenturiyoni* aatthuna wuurela okumi wa Pawulo ni aawooceeliha opaka ovaanelawaya. Vano aahaalamulela yaawo yaawera orapela weera ekhumbwele toko mphareiyani mpatta wa mukerekhere.

⁴⁴ Akina waatthuneya wiixoopola evarelaka itthaabwa, naari itthu sikina sa nikula. Moota ole, ootheene yaavuluwa, ephiyaka mukerekhere.