Miteko 23 - Emakhuwa Bible

¹ Pawulo, awehexexaka eSineedriyu*, aaheera: “Axunnaka, mpaka olelo koheetta vamaithoni wa Muluku ni murima wooreera wootheene.”

² Vahoolowaya, mutokweenexa a asaserdoti* Ananiya aahaalamulela yaawo yaamwaattamenle Pawulo weera emane eyanowaawe.

³ Vano Pawulo aamweerela: “Muluku anoovulaliheni, exiri yootteelihiwa! Mukilaathiye vawo weera mukithorihe ni malamulo, mene mulamulelaka weera kivulalihiwe, munkhootta malamulo.”

⁴ Yaawo yaamwaattamenle Pawulo yaamweerela: “Nyuwo muntthuna omuruwana mutokweenexa a asaserdoti*?”

⁵ Pawulo aawaakhula: “Axunna, nkaasuwenle weera owo ti mutokweenexa a asaserdoti*, niwoko yoolempwa: ‘Muhimuulumele yoonanara mutokweene a mulokwaanyu.’”

⁶ Vano Pawulo, asuwelaka weera akina a yaawo yaari aSaduki* ni akinatho aFarisi*, aakhuwela eriyari ya eSineedriyu*: “Axunna, miyo ti muFarisi*, mwaana a muFarisi*. Miyo kinthorihiwa niwoko kinroromelaaka mwa ovenyerera wa akhwiiye!”

⁷ Eeraka hiiho, waakhuma onyakulihana otokotoko variyari wa aFarisi* ni aSaduki*, ni muthukumano waakawanyeya.

⁸ Vano, aSaduki* anxuttiha weera khoowowo ovenyerera, hata andyelo, hata minepa, mene aFarisi* annaakhulela itthusene seiya sootheene.

⁹ Waakhala onyakuleleya otokotoko, ni akina a anamawera a nlamulo* yaari aFarisi* yaaheemela ni yaapacera waakhulana: “Khanimphwanya etthu yoonanara mwa mulopwana ola. Taani asuwenle – apaale munepa, hoye hoye ndyelo uuluma ni yoowo?”

¹⁰ Waakhulana waatepaxa, moota wooweera mutokweene a anakhotto aahoova weera Pawulo aarowa omeyanyiwa ni yaale. Aalamulela weera anakhotto erowe ni emuvenxe ni ikuru variyariwaya ni emuronghe mukwarteli.

¹¹ Ohiyu wa oxaawaya Apwiya emwaattamelaka yoowo yaamweerela: “Mulipihe murimaanyu! Ntoko mwaakhalenlaanyu onamoona mwaha wa Miyo oYerusaleemu, hiihotho ontthuneya okhalela onamoona oRooma.”

Ovaanela omwiiva Pawulo

¹² Oxawaaya, aYuda yaamvaanelela Pawulo ni yaalipelaxa weera khayaarwa eca, naari ewura, ehinaaye omwiiva Pawulo.

¹³ Yaari woopwaha asilopwana miloko mixexe yaavaanenle yeeyo.

¹⁴ Vano, erowaka wa ahooleli a asaserdoti* ni asitokweene a aYuda, yaaweerela: “Noolipelaxa weera khaninrowa oca nihimwiivale Pawulo.

¹⁵ Vanonto, nyuwo ni eSineedriyu* mumvekele mutokweene a anakhotto weera owo aruuhiwetho ohoolowanyu, munleelaka weera muntthuna wiiwa nnenesene itthu sootheene sa makhalelowaawe. Hiyo nnikhale oolikaneene weera nimwiive ahinaaye ophiya va.”

¹⁶ Vano musuluwaawe Pawulo, mwaana a murokoriye, iiwalaawe sa ovaanela iwe, aarowa mukwarteli ni aamuthalihera sootheene iye Pawulo.

¹⁷ Owo aamwiitthana mmoha a kenturiyoni* ni aamweerela: “Munronghe mmiravo ola wa mutokweene a anakhotto, owo ookhalano etthu yoomuleela.”

¹⁸ Hiiho owo aamurongha wa mutokweene a anakhotto, ni kenturiyoni* aamweerela: “Pawulo namatthukiwa ookiitthana ni ookivekela weera kooruuheleni mmiravo ola niwoko ola ookhalano etthu yoowooleelani.”

¹⁹ Mutokweene a anakhotto aamvara mmiravo ni ntata, aamurowano wiiphiini ni aamukoha: “Ontthuna okileela eheeni?”

²⁰ Owo aamwaakhula: “aYuda aavaanela weera yoovekeleni waaronghela Pawulo, awo yiixeeraka antthuna waasaasa osuwela nnenesene nthowa na makhalelowaawe.

²¹ Muhiviriyeliwe, niwoko woopwaha asilopwana miloko mixexe aniireherera weera emwiipithele Pawulo. Awo aalipela weera khaanrowa oca, hata owura ehinaaye omwiiva Pawulo. Vano awo ahiireherera, ewehereraka weera mwaakhulele nivekelonaya.”

²² Mutokweene a anakhotto aamulaxera mmiravo ni aamweerela: “Ohimuleele mukina weera weyo wookileela yeeyo.”

Pawulo onthaamiheriwa oSesareya

²³ Owo aawiitthana eeli a kenturiyoonaawe* ni aahaalamulela: “Mwaareherere anakhotto macira meeli ni anamweettiha ikavalu* miloko mithannamiili ni anakhotto a mavaka macira meeli, weera erowe oSesareya ohiyuweene yoola epiphi ekumanneene.

²⁴ Mureherere ikavalu* weera Pawulo awele ni akuxiwe ari mukumi aronghiwaka wa guvernadori Felisi.”

²⁵ Mutokweene a anakhotto aalepa ekaratta ni masu ala:

²⁶ ‘Klawudiyu Lisiya wa guvernadori oosuwanyeyaxa Felisi: Salaama.

²⁷ Mulopwana owo aavariwa ni aYuda ni yeera emwiive, miyo ni anakhottwaaka naatthimakenlaahuwo, nnamvuluxa, niwoko kaasuwela weera owo ti muRooma.

²⁸ Kitthunaka osuwela heeni yaamootheraaya, kaamurongha oSineedriyuniwaya*.

²⁹ Kaahoona weera owo aahootheriwa mwaha wa malamulowaaya, mene khayaakhanle etthu yooreera omoothera yoophwanela okhwa, naari okaliposo.

³⁰ Kileeliwaka weera aYuda akina yaavaanela omwiipithela, kohoorumihelani woowaakuveya nyuwo oottittimiheyaxa. Koolamulelatho weera anamootheraawe yooleeleni yeeyo araayano ni yoowo.’

³¹ Anakhotto, ekwaniheraka otthunawawe, yaamurongha Pawulo ohiyuweene yoole, ni yaaphiya wAntipatride.

³² Oxaawaya, yaahaahiya anamweettiha a ikavalu* emuhoolaka ni yaawo, akina yaahokoleela mukwarteli.

³³ Ephiyaka oSesareya anamweettiha a ikavalu*, yaamvaha ekaratta guvernadori ni yaamvahereratho Pawulo.

³⁴ Guvernadori aasoma ekaratta ni aamukoha weera aari a elapo heeni. Aleeliwaka weera aari a oSilisiya,

³⁵ aamweerela: “Etthweene yeela nkireherere anamootheraanyu yaarwaaka.” Vano aalamulela weera Pawulo alipeleliwe empa etokotoko ya Herodi.