Miteko 22 - Emakhuwa Bible

¹ “Axunna ni asitiithi, mwiiwe vano wiixaakihawaka.”

² Yiiwaka weera uuluma ni nuulumo na eHeberi, yaamaala vancipale. Vano Pawulo aaweerela:

³ “Kiri muYuda kiyariwe oTarso, elapo ya oSilisiya, mene kihuwiwe musidadeni yeela. Kaaxuttihiwa nnenesene ni Gamaliyeli munlamuloni noolipaxa na makholowaahu, kimukhalelaka nthiti Muluku ntoko muraanyu nyuwo ootheene olelo.

⁴ Kaahaattharatthara anamatthara a Ephiro ela mpaka okhwa kaatthukaka alopwana ni athiyana, kaavonyeraka mukaliposo.

⁵ Mwa yeeyo mutokweenexa a asaserdoti* ni muthukumano wootheene wa asitokweene onoowera okhalela onamoona. Wa yaawo kaaphwanya ikaratta wa axunna a oDamasku, ni kaarowa mpaka wu weera kaaruuhe atthu awo ntoko ootthukiwa oYerusaleemu weera ettaruxiwe.

⁶ Vano, wookwana nsuwa vamuru, keera kaattamelaka oDamasku, ni woowaakuveya, waara otokotoko waarweenle wiirimu waamwaleela mukhwipimwaka.

⁷ Kaamorela vatthayani ni kaahiiwa nsu nimoha naakeerenle: ‘Sawuli, Sawuli, heeni munkisoondaanyu?’

⁸ Vano kaakoha: ‘Apwiya, Nyuwo taani?’ Ni Awo yaakaakhula: ‘Miyo ti Yeesu a oNasarete, mwa Yoowo nyuwo munimusoondaanyu.’

⁹ Yaawo yaakihoolale yaahoona waara iwe, mene khayiiwexenxe nsu na Yaale yuulumale ni miyo.

¹⁰ Hiiho kaahaakoha: ‘Keereke hai, Apwiya?’ Vano Apwiya yaaheera: ‘Muvenye ni mwavolowe oDamasku, ni weiwo mmuleeliwe yeeyo entthuneya opaka.’

¹¹ Yaawo yaari vamoha ni miyo yaakeettiha ekivarenleene moono mpaka oDamasku, niwoko nkaawera woona mwaha wa otutha wa waara.

¹² Mulopwana mmoha iitthaniwa Ananiya, mulopwana oneetta moota woororomeleya mwaha wa nlamulo ni oottittimihiwa ni aYuda ootheene ankhala weiwe,

¹³ aahoorwa wa miyo, ni akaattamelaka, aakeerela: ‘Munna Sawuli, moonetho.’ Ehuhuweene yeele kaawera woona.

¹⁴ Vano owo aakeerela: ‘Muluku a makholowaahu aahoothanlani nyuwo weera musuwele otthunawawe, mmoone Oororomeleya ni mwiiwe masu a eyanowaawe.

¹⁵ Nyuwo mmwikhale namoonaawe wa atthu ootheene, mukhalelaka onamoona sa itthu seiya moonnaanyu ni mwiiwalaanyu.

¹⁶ Vano, heeni mumpisaanyu? Muvenye, mupatisiwe ni murapihe sootthekasanyu, mwiitthanaka Nsinanawe.’

¹⁷ Ni yaakikhumelela miyo kihokolowaka oYerusaleemu ni keera kivekelaka Mpaani mwa Muluku, kaakomoka mMunepani,

¹⁸ ni kaawoona Apwiya yaakeerenle: ‘Mwaakuveke! Mukhume oYerusaleemu woowaakuveya, niwoko atthu a wenno kheerwa yaakhulela onamoonaanyu mwaha wa Miyo.’

¹⁹ Kaaweerela: ‘Apwiya, alopwana awo ansuwela weera kaakhovelela orowa muSinagogani* sootheene weera kaatthuke ni kaawaxule ootheene yaaroromenle mwa Nyuwo.

²⁰ Nitho yaariheyaaya ephome ya namoonaanyu Stefano, miyo kaari weiwe kaakhulelaka wiiva iwe, kithokororaka ikuwo sa yaale yaamwiivale.’

²¹ Vano Apwiya yaakeerela: ‘Murowe, Miyo nkoorumiheni ottaiwene, wa amalapo.’”

Pawulo muRooma

²² Atthu ancipale yaamwiiwa Pawulo mpaka aahimmaawe yeeyo. Vano yaakhuwela: “Mumvenxe mulopwana ola wa elapo ya vathi! Khaphwanenle okhala ni okumi!”

²³ Ekhuwelaka, yaarula soowarasaya evonyeraka ntthupi osulu,

²⁴ ni mutokweene a anakhotto aalamulela weera Pawulo aronghiwe mukwarteli, awaxuliwe ni akohakohiwe weera amusuwelihe niwoko na heeni atthu yaamukhuwelelaaya moota ole.

²⁵ Emutthukaka yoowo weera awaxuliwe, Pawulo aamweerela kenturiyoni* aari weiwe: “Munnatthuniheriwa ongwaxula muRooma ahinaaye owo othorihiwa?”

²⁶ Iiwaka yeeyo, aarowa ni aamuleela mutokweene a anakhotto eeraka: “Mmweere hai? Mulopwana ola ti muRooma.”

²⁷ Vano aarowa wa Pawulo, anamukoha: “Mukileele nyuwo muRooma?” Owo aamwaakhula: “Aani, ti miyo.”

²⁸ Mutokweene aamweerela: “Miyo kaaliva musurukhu mwincipale weera kikhale muRooma.” Pawulo aamwaakhula: “Kaakhenle okhalawaka muRooma okhuma oyariwawaka.”

²⁹ Yaawo yeera emukohakohe, yaamuhiya woowaakuveya. Mutokweene yoole aahoopihiwa aasuwenlaawe weera aamutthuka muRooma.

Pawulo ohoolo wa eSineedriyu*

³⁰ Oxaawaya, woonaka weera mutokweene a anakhotto aatthuna osuwela nnenesene nthowa Pawulo ootheriwaawe ni aYuda, aamutaphula ni aalamulela waathukumanyiha ahooleli a asaserdoti* ni eSineedriyu* yootheene. Vano, amuruuhaka Pawulo, aamoonihera wa yaawo.