Miteko 13 - Emakhuwa Bible

Yoorummwa ya Barnaba ni Sawuli

¹ Mukerexani ya wAntiyokiya yaakhalawo maprofeeti ni anamahusiha: Barnaba, Simeyoni iithaniwa Nigeri, Lusiyo oKireene, Manayeni aahuwiwe vamoha ni namalamula Herodi, ni Sawuli.

² Yaalapaka Apwiya ni etthukaka, Munepa Wootteela waaweerela: “Mukimwalamwalihere Barnaba ni Sawuli wa muteko Miyo kiwiitthanenlaaka.”

³ Hiiho, emalihaka otthuka ni ovekela, yaawiikaathera matata ni yaahaarumiha.

Barnaba ni Sawuli oKipro

⁴ Erumihiweene ni Munepa Wootteela, awo yaarowa oSeleusiya, ni evenyaka vaavaale, yaalapuwa munikulani erowaka oKipro.

⁵ Ephiyaka oSalamina, yaalaleiya masu a Muluku muSinagogani* mwa aYuda. Yohaane aari ni yaawo ntoko oowaakhavihera.

⁶ Yaaheetta eviraka ecirumba yootheene mpaka yaaphiya oPafo. Weiwo yaamuphwanya muYuda namacitta ni mprofeeti oolokottha iitthaniwa Baryesu.

⁷ Aakhala ni guvernadori Sergiyu Pawulo, mulopwana a miruku. Guvernadori aarumiha wiitthaniwa Barnaba ni Sawuli, niwoko aatthuna wiiwa masu a Muluku.

⁸ Elimasitho, namacitta (ntoko nintaphulelaaya nsinanawe) ahiixiittaniha, ni aaheerera omooceeliha guvernadori weera ahiroromele.

⁹ Vano Sawuli, iitthaniwatho Pawulo, oosareya Munepa Wootteela, aamuwehexexa nnenesene Elimasi, ni aamweerela:

¹⁰ “Mwaana a Diyabu* ni mwiittana a sootheene seiyo siri sa ekhaikhai! Nyuwo moosareya mikhalelo sootheene sa olokottha ni otakhala. Mmuhiye yaakhani onanariha iphiro soowookowa sa Apwiya?

¹¹ Musuwele vano weera Apwiya ti mwiittanaanyu, ni nyuwo mmwikhale oohoona, muhiweraka woona waara wa nsuwa wa ehuhu ekina.” Woowaakuveya yaamukhuruwela ewiriphi, ni owo, aapapelaka, aamwaasa mukina weera amuhoole ni ntata.

¹² Guvernadori oonaka yeeyo, aaroromela ni aatikhinaxa ni nihusiho na Apwiya.

Barnaba ni Sawuli wAntiyokiya oPisidiya

¹³ Pawulo ni yaawo yaamuhoonle, yaavenya oPafo ni yaalapuwa munikulani erowaka oPerge oPanfiliya. Weiwo, Yohaane aahaahiya yaawo ni aahokoleela oYerusaleemu.

¹⁴ Ekhumaka oPerge, yaapwaherera mpaka wAntiyokiya oPisidiya. Nihuku na eSaabadu yaavolowa muSinagogani* ni yaakilaathi.

¹⁵ Emalihaka osoma wa nlamulo ni wa maprofeeti, asitokweene a eSinagoga* yaahaarumiha atthu weera emweerele Barnaba ni Sawuli: “Axunna, mwaarino masu oolipiha murima wa muloko wa atthu, muulume.”

¹⁶ Eemelaka, Pawulo aahaathoonyihera ni ntata ni aaweerela: “aYixrayeli ni nyuwo mummoova Muluku, mukiiwe miyo!

¹⁷ Muluku a muloko wa aYixrayeli aathanla makholowaahu, ni aareeliha muloko wa atthu ehuhu yootheene waamankaaya wExipitu. Ni ikuru sitokotoko aavenxa wa elapo ele,

¹⁸ ni aavilela munikareni woophiyera ehuhu ya iyaakha miloko mixexe.

¹⁹ Owo aaphwata miloko sa atthu mithannamiili oKanaani, ni aavaha elapwaaya wa mulokwaawe ntoko yoohiyeriwa*.

²⁰ Sootheene iye saakhumelela woomalaka ehuhu ya iyaakha 450. Vahoolowaya, owo aahaavaha aphuki mpaka ehuhu ya Samuweli.

²¹ Vano muloko wa atthu waamvekela Muluku mwene, ni Muluku aavaha muloko Sawuli, mwaana a Kixi, a epuumba ya Benyamini aalamula iyaakha miloko mixexe.

²² Vahoolo wa omukhootta Sawuli, aamukhaliha Davide ntoko mwene, mwa yoowo Muluku aamukhalenlaawe onamoona eeraka: ‘Koompwhanya Davide, mwaana a Yixai, mulopwana a vamurimaniwaka. Owo anaapake sootheene seiyo siri sa otthunawaka.’

²³ Muluku aahaaruuhela aYixrayeli Mvuluxa Yeesu, akhumaka ekhapira ya Davide, ntoko aaroromelihalaawe.

²⁴ Ahinaaye ophiya Yeesu, Yohaane aalaleera muloko wootheene wa aYixrayeli opatiso wa orukunxa murima.

²⁵ Aakwanihaawe mutekwaawe, Yohaane aaheera: ‘Munuupuwela weera miyo taani? Nkihiyono Yoowo mummuupuwelaanyu. Moonetho, anaarwe ottuliwaka Yoole ikwakwaattasawe kihiphwanenlaaka otaphula.’

²⁶ Axunna, anamwane a Abrahaamu ni nyuwo mummoova Muluku, wa hiyo noorumiheliwa mutthenga ola wa ovuluxiwa,

²⁷ muloko wa atthu a oYerusaleemu ni asitokweenaaya khayaamusuwenle Yeesu ntoko Mvuluxa, mene emuttaruxaka Yoowo, yaakwanihera masu a maprofeeti ansommwa iSaabadu sootheene.

²⁸ Naamwi ehiphwanyaka mulattu woomwiivela, yaamvekelatho Pilatu weera alamule omwiiva.

²⁹ Ekwaniheraka sootheene saalempwale mwaha wa Yoowo, yaamvenxa vamuttandani ni yaamvitha mmahiyeni.

³⁰ Mulukutho aamvenyereriha mookhwaani,

³¹ ni wa mahuku mancipale aahooniwa ni yaale yaarongwe vamoha ni Yoowo oYerusaleemu ekhumaka oGalileiya. Vano awo ari anamoonaawe wa muloko wa atthu.

³² Hiyo ninoolaleerani nyuwo masu ooreeraxa ala: yeeyo Muluku aaroromelihalaawe makholowaahu,

³³ oonikwaniherela hiyo, anamwanaawe, amvenyererihaka Yeesu ntoko elempwalaaya ecipo yanaaveeli: ‘Weyo ti Mwanaka. Olelo kohooyara.’

³⁴ Muluku aamvenyereriha mookhwaani weera Owo ahihokoleeletho muyuntteloni. Eyo Muluku aahima ni masu ala: ‘Miyo kinoovahani mareeliho ootteela ni oororomeleya yaaroromelihiwe wa Davide.’

³⁵ Tivawo yoolempwa mpatta mukina: ‘Khamurwa muntthunihera Ootteelaanyu weera untte.’

³⁶ Amalihaka waarumeela atthu a ekhapiraawe ntoko Muluku aatthunaawe, Davide aahookhwa. Owo aavithiwa ni makholowaawe ni erutthwaawe yaahuntta.

³⁷ Yooletho Muluku omvenyererihalaawe, khunttale.

³⁸ Tivawo, axunna, kintthuna woosuwelihani weera ti mwa Yeesu munlaleeriwaanyu elevelelo ya soottheka.

³⁹ Niwoko na Yoowo, khula mutthu onroromela, ohooniwa weera khanono nthowa wa sootheene seiyo nlamulo na Moisesi nahaaweraaya onilevelela.

⁴⁰ Mwiipasoope weera ehookhumeleleni yeeyo maprofeeti yaahimalaaya, yeeraka:

⁴¹ ‘Moone, nyuwo mumveiha, mutikhine ni muriheye, niwoko nkipake etthu mmahukunimwanyu nyuwo mwahaaroromelaanyu mukina ooleelani.’

⁴² Pawulo ni Barnaba evenyaka muSinagogani*, muloko wa atthu waahaalattula weera yuulumetho sa itthusene seiyo eSaabadu enrwa.

⁴³ Woomwareyani wa mmuthukumanoni, aYuda ancipale ni anamarwa a murima wa omuluku antthara ediini ya aYuda, yaamutthara Pawulo ni Barnaba. Awo yaatthekula ni yaawo, yaalipiheraka weera epwaherere mwa mahala a Muluku.

⁴⁴ eSaabadu yaattharelanne, wookwanaka atthu ootheene a esidade yaathukumana weera yiiwe masu a Apwiya.

⁴⁵ aYuda, ewoonaka atthu ancipale, yaasareya nrima ni eveihaka, yaavaanyiha yeeyo Pawulo aahimaawe.

⁴⁶ Vano Pawulo ni Barnaba yaawaakhula ni murima woolipa, yeeraka: “Waatthuneya woolaleerani toko nyuwo masu a Muluku, mene mweenre mukhoottaka masu ala, ni hiiho munoonihera weera khamuphwanenle okumi woohimala, vano hiyo ninoohokoleela wa amalapo.

⁴⁷ Vano, hiiho Apwiya aanilamulela yeeraka: ‘Miyo kohookhalihani waara wa amalapo, weera mukuxe ovuluwa mpaka ekotenle elapo.’”

⁴⁸ Yiiwaka yeeyo amalapo yaahakalala ni yaavuwiha masu a Apwiya, ni ootheene yaawo yaathanliwe ophwanya okumi woohimala, yaaroromela.

⁴⁹ Masu a Apwiya yaamwaramwaxeya wa elapo yootheene.

⁵⁰ aYudatho yaahaasesera asithiyana oosuwanyeya oomoova Muluku ni asitokweene a esidade. Etannyeraka omttharatthara Pawulo ni Barnaba, awo yaawoomola mweelaponimwaya.

⁵¹ Awo ooweeli yaatatha ntthupi na inaawosaya ntoko eneneero ya waakhootta yaale, ni yaapwaha erowaka wIkoniyo.

⁵² Oohusera yaapwaherera esareiyeene ohakalala ni Munepa Wootteela.