Mikeyasi 4 - Emakhuwa Bible

Murettele ni olipihiwa niwoko na wiiwelela

¹ Mmahukuni ookisera, mwaako wa Empa ya Yave onookhalihiwa ntoko mutokweene eriyari ya nyaako; onoorakama opwaha mattumuxa, ni miloko sinootthimakelawo.

² Miloko sincipale sinimoorwa, seeraka: “Nrowe, niwele mwaako wa Yave, Mpaani mwa Muluku a Yakobe. Owo onoonixuttiha iphirosawe weera neette mphironimwawe.” Vano Nlamulo nnoorweela oSiyoni, masu a Yave oYerusaleemu.

³ Owo onoothoriha eriyari ya miloko sincipale ni onuuluma minyakunyaku eriyari ya miloko sooweraxa ni soorakamela. Awosa anootatuxa ikatanasaya ixaruwa ni mavakaaya icikwaakhwa. Muloko mmoha khookuxaru ikapwitthi soowanelano muloko mukina hata khasiirehererelatho owana.

⁴ Khula mutthu onoowera okilaathi vathi wa ivideirasawe ni wa nyirisawe sa ifiigu, ni khakhalaru mutthu anaamuxupe, niwoko uulumale hiiho ti Yave a ikuru sootheene.

⁵ Miloko sootheene seetteleke mwa nsina na milukusaya, vaheera hiyo nnimweetta mwa Nsina na Yave, Mulukwaahu, wa mahuku ootheene.

⁶ “Nihuku nno,” Onghima Yave, “kinimwaathukumanyiha ooheetta; yaawo atthukeliwe elapo ekina, ni yaale Miyo kaathananinghaaka.

⁷ Ooheetta kinimwaakhaliha ephuwela, ni oowoomoliwa, muloko woolipa. Yave onimwaalamulasa vamwaako Siyoni okhuma nihuku nno woorowa ohoolo ni wa mahuku ootheene.

⁸ Ii! Etoore* ya muhuwo, wa nyuwo muri woolipawo wa mwaana muthiyana a oSiyoni, munoohokoloxeriwa olamulawanyu wa khalayi; omwene onoohokoleela wa esidade ya oYerusaleemu.”

⁹ Munkhuwelelaxani vano? Khamunono mwene? Weeraka namalakaanyu ori mookhwa, weera ovoreya wootepelaxeni ntoko ovoreya wa muthiyana ayaraka?

¹⁰ Ii! Mwaana a muthiyana a oSiyoni, mpirituwase, ntoko muthiyana ayaraka, ni mweettiwe murima, niwoko vano ontthuneya ohiya ixirisanyu weera mwakhale vanlakani. Nyuwo munoorowa oBabiloniya, ni wu munootapuxiwawo. Wu Yave onoowoopolaniwo mmatatani mwa amwiittanaanyu.

¹¹ Vaheera vano, miloko sincipale sohoothukumanelasani. Iyo sineera: “oYerusaleemu ohiirihiwe. Hiyo nooneke ophwatiwa wa oSiyoni.”

¹² Vaheera iyo khasisuwenle soowuupuwela sa Yave; khasiniiwexexa soovaanela sa Yoowo onthukumanyiha mulokwaawe ntoko ihupu sinronghiwa oneepettheliwa.

¹³ “Ii! Esidade ya oSiyoni, mvenye ni mukokhole, niwoko Miyo kinimoovahani manyaka a eyuuma ni itthottopwa sa ebronze* weera munyaanyeno miloko sincipale.” Nyuwo munoomutteelihera Yave mwa Yoowo onlamula elapo yootheene, soowinasaya soohireerela ni mihakhusaya sootheene.