Mikeyasi 3 - Emakhuwa Bible

Ahooleli ni maprofeeti oonanara murima

¹ Vano miyo kaaheera: “Mwiiwe, nyuwosa muri ahooleli a Yakobe, alamuli a muloko wa oYixrayeli. Nyuwosa waatthuneya osuwela ekhaikhai.

² Vaheera nyuwosa munthanya yeeyo eri yooreera, munasivela yoonanara, mumpera exapala ya mulokwaaka ni ethayi ya mmakhuvanimwaya.

³ Nyuwosa munkhuura enama ya mulokwaaka, mumpera exapalaaya, munapwexakasa makhuvaaya muthikilelaka ntoko enama enaapeiwa mmwaapuni.”

⁴ Muhoolommo anoomwiitthana Yave, mene Owo khawaakhula. Ehuhu eyo Owo onimwaahuluwa niwoko na yootakhala apankaaya.

⁵ Yave oneera ha: “Nyuwosa maprofeeti oowootha munghapuxa mulokwaaka! Mukina oovahakani yooca, munlaleiya, murettele, vaheera yaahoovahani yooca, munaalaleerela ekhotto.

⁶ Mwaha wa sootheene iyo, ohiyu onimoorweelani, aani, ohiyu woohikhala nyoonelo; enookhala epiphi woohikhala sootthoma. Nsuwa nnimwaaneelela maprofeeti, ni othana onimwaariipela yaawosa.

⁷ Anamoonihera* anooyevihiwa ni anamatthoma animuulihiheya muru. Ootheene awo anookuttelela ekhove, niwoko Muluku khawaakhula.”

⁸ Vaheera wa miyo, koosareya ni ikuru, ni Munepa wa Yave, ekhaikhai ni owera, weera kimuleele Yakobe opahulawawe, ni wa aYixrayeli otthekawaya.

⁹ Mwiiwe yeela, nyuwosa muri asitokweene a ekhapira ya Yakobe, alamuli a muloko wa aYixrayeli anthanya ekhaikhai ni amvirikanyiha yeeyo eri yoororomeleya;

¹⁰ anteka oSiyoni ni oyeeha ephome, ni Yerusaleemu ni sootakhala.

¹¹ Ahoolelaaya anlakela yeerelaka makhwankwa, asaserdotaaya anxuttiha yeerelaka owina, ni maprofeetaaya antthoma yeerelaka musurukhu. Eyo eri hiiho, aniikhaviherano Yave, yeeraka: “Yave ori eriyaraahu. Kheenikhumelelaru erisa.”

¹² Tivawo niwoko na nyuwosa, oSiyoni oneeraaya ottipuriwe ntoko ematta, oYerusaleemu onoothatuwa ettuxo, ni nttumuxa na Empa ya Muluku nnoosareya maphuwa.