Mikeyasi 1 - Emakhuwa Bible

Ovolowa

¹ Masu Yave uulummaawe mwa Mikeyasi a oMorexeti mweehuhuni ya olamula wa Yotami, Ahazi ni Hezekiya, mamwene a oYuda. Nyoonelo owo oonnaawe singhima sa oSamariya ni oYerusaleemu.

² Mwiiwe, miloko sootheene; ngwiriyane, Ii! Elapo ni ootheene amankemo! Yave onlamula sootheene ori Mpaanimwawe yootteela, onimookhalelani onamoona.

³ Moone! Yave oneera avenyaka woomakawawe; Owo onkhuruwa, ananyikala mapuro a mulaponi oorakamelaxa osulu.

⁴ Vathivawe, nyaako sintothowa ntoko nnyooma nreene vayikho, ni nyala sinookurukunduwela vathi ntoko maahi mancipale ekhuruwaka vamwaako.

⁵ Sootheene iyo sineereela mwaha wa ovaanya wa Yakobe ni soottheka sa muloko wa oYixrayeli. Ovaanya heeni wa Yakobe? Weeraka khoohiyono oSamariya? Mapuro heeni a miluku sikina sa aYuda? Weeraka khoohiyono oYerusaleemu?

⁶ “Tivawo kineeraaka kipake oSamariya ittuxo soowuukeliwa vanlakani, nipuro noophatteiwa ivideira; malukwaaya kinoovonyera mureyareyani koonihereke mathipelowaaya.

⁷ Icaambulosaya soopatthiwa sootheene, sinoonyaanyiwa ni soovaha sootheene sa impa sa milukusaya sinoolalihiwa ni mooro; kinoophwata icaambulosaya sootheene. Seenre seiyo iwo othukumanyinghaaya sakhala ntoko soowina mooraruwani, icaambulo iyo sinoovareleyatho muteko ntoko nlivo na mooraruwani.”

⁸ Mwaha wa yeeyo, kinimwiinla ni kinoolalamika; kinimweetta woohiwararu ikwakwaatta ni pwitipwiti. Kinookhuwela ntoko khwatte kiipuleleke ntoko mwaaxaana a esiisi.

⁹ Vano nikhwatta na Samariya ti nankoxo ni noomphiyera Yuda. Noophiya mpaka vamulako wa mulokwaaka, aani, noophiya mpaka mmilakoni sa oYerusaleemu.

¹⁰ Muhithalihere yeeyo oGate, ni muhiinle. oBeti-Ofera mwiixuupuruxe vantthupini.

¹¹ Mvenyase pwitipwiti ni oowuulihiheyeene muru, nyuwosa munkhala oXafiri. Amaki a oZaanani, kheekhuma musidademwaya. oBeti-Ezeli onimwiikhupanyera; yoovenxiwa yoowiixaakiheraaya.

¹² Yaawo ankhala oMarote, ampirituwasa moovoreiwani, ewehereraka okhurunuwa, niwoko erisa erweenle mpatta wa Yave mpaka mmilakoni sa oYerusaleemu.

¹³ Amaki a oLakixi, mutthukelele mukavaluni* ikaaro sa ekhotto. Soottheka sa mwaana muthiyana a oSiyoni saapacenre mwa nyuwo, niwoko ovaanya wa aYixrayeli, oxutteriwe ni nyuwo.

¹⁴ Tivawo nyuwo muneeraanyu mvahe soovaha sooraxelela oMoreseti-Gati. Esidade ya wAkizibe eniikhale etthu yoohisaambwaneya wa mamwene a oYixrayeli.

¹⁵ Kinimooruuhelasani oowoowinasani nyuwo munkhala oMarexa. Owo ori ovuwa wa oYixrayeli onoorowa wAdulami.

¹⁶ Mmetthe mayihaanyu mooniheraka wiikhupanyera mwaha wa anamwane mwa yaawo munaahakalalelaxaanyu; mmetthe mputu moli ntoko mwaaxaana a nrepo, niwoko awosa aaronghiwa wootthukiwani.