Matheyo 6 - Emakhuwa Bible

Waakhavihera oohaawa

¹ Mwiipasoope weera muhipake mitekosanyu sa ororomeleya mwaatthuni weera mooniwe ni atthu. Mwapaka seiyo, khamurwa mwaakhela ntthuvelo wa Atiithi ari wiirimu.

² Vano, mwaavahaka samahala, muhikhuweleleke yeeyo ni mapalapatta ntoko ampakaaya anamwiixeera muSinagogani* ni mmuseweni weera ettottopeliwe ni atthu. Kinoororomelihani weera awo ahaakhelela ntthuvelonaya nootheene.

³ Mene nyuwo mwaavahaka yamahala, nihisuwele ntata na moono muthiyana yeeyo nimpakaaya na moono mulopwana,

⁴ weera yamahalaanyu ekhale muxiirini. Atithinyu anoona yeeyo empakiwa muxiirini, eniyootthuveleni.

Nivekelo

⁵ Nyuwo mwaavekelaka, muhikhale ntoko anamwiixeera. Awo antthuna ovekela yeemenleene muSinagogani* ni mapuro oowooneya, weera yooniweke ni atthu. Miyo kinooleelani vekhaikhai weera ahaakhelela ntthuvelonaya nootheene.

⁶ Nyuwotho mwaavekelaka, murowe munkonaanyumo, mwawale mulako ni mwaavekele Atithinyu ari muxiirini. Vano, Atithinyu ari muxiirini eniyootthuveleni.

⁷ Mwaavekelaka, muhitipure ntoko ampakaaya amalapo. Awo anuupuwela weera eniyiiwiwe niwoko na masu mancipale.

⁸ Muhilikane ni yaawo, niwoko Atithinyu ansuwela yeeyo muntthunaanyu muhinaaye ovekela.

⁹ Vanonto nyuwo muvekeleke ha: ‘Atithihu ari wiirimu, Nsinananyu ntteelihiwe,

¹⁰ omwenaanyu orwe; otthunawanyu opakiwe vathi va, hiiho ntoko wiirimu.

¹¹ Munivahe yoocaahu ya khula nihuku.

¹² Munilevelele sootthekasahu ntoko nnaalevelelaahu yaawo annitthekela.

¹³ Muhinihiye nivolowaka ngweereriwani, mene munivuluxe mwa soonanara.’

¹⁴ Mwaalevelela akina anootthekelani, Atithinyu ari wiirimu eniyoolevelelenitho nyuwo.

¹⁵ Mwaahaalevelelatho akina, Atithinyu ari wiirimu kheerwa yoolevelelani.

Sa otthuka

¹⁶ Mwaatthukaka, muhikhale ni ekhalelo yoothanana ntoko anamwiixeera, niwoko awo anooceendya ekhovaaya weera atthu akina ewoone weera aatthuka. Miyo kinooleelani vekhaikhai weera ahaakhelela ntthuvelonaya nootheene.

¹⁷ Mwaatthukaka, muttikitthele makhura muruwaanyu ni musuusule,

¹⁸ weera atthu ehisuwele weera nyuwo mootthuka, ehikhanle Atithinyu paahi anoona muxiirini. Atithinyu anoona muxiirini eniyootthuveleni.

Mihakhu sa wiirimu

¹⁹ Muhithukumanye mihakhu sa elapo ya vathi annanarihaayawo atthumpwiha ni murawa, nitho weiwo anamwiiya amvolowaaya ni aniiyaaya.

²⁰ Muthukumanye toko mihakhusanyu wiirimu, weiwo ahinnanarihaayawo atthumpwiha ni murawa, ni weiwo anamwiiya ahimvolowaaya ni ahiniiyaayamo.

²¹ Vano, sinkhalaayawo mihakhusanyu, murimaanyutho onuukhale weiwo.

²² Maithwaanyu ti onyaari wa erutthu. Maithwaanyu yakhala ooreera, erutthwaanyu yootheene enoosareya waara.

²³ Maithwaanyu yakhala oonanara, erutthwaanyu yootheene enoosareya epiphi. Vano, waara ori mpuwamwanyu waari epiphi, epiphi ele eniikhale etokotoko!

²⁴ Khaawo angwera waarumeela asineene eeli, niwoko mmoha onoomuthanya ni mukina onoomusivela, naari oopacera onoomurumeela ni nthiti, mene anaaveeli onoomuramusa. Nyuwo khamungwera omurumeela Muluku nitho musurukhu.

Sookacamiha sa okumi

²⁵ Vano Miyo kinooleelani: muhiixeeteteele ni okumi: eheeni muneeraanyu muce; muwure, naari eheeni muneeraanyu ngwarihe erutthwaanyu. Khoohiyono okumi wootthuneyaxa opwaha yooca, ni erutthu yoopwaha ikuwo?

²⁶ Ngwehe ipalame sa wiirimu. Khasinaala, hata khasinghepha, naari khasinthata, wa soothesene, Atiithi ari wiirimu anoociha. Vano, nyuwo khamuhiyono ootthuneyaxa opwaha ipalame?

²⁷ Taani a nyuwo, iixeeteteelaka, anaawere waandyeerera ehuhu vakhaani okumaawe?

²⁸ Niwoko heeni muneeteteyaanyu ni ikuwo? Ngwehe moota sinunnuwaaya ithutu sa ntuphini. Seiyo khasimvara muteko, hata khasintthava.

²⁹ Wa soothesene, Miyo kinooleelani weera, naari Salomoni ni ovuwawawe wootheene, aawara ntoko emoha ya seiyo.

³⁰ Muluku awariha hiiha malaxi a ntuphini ari olelo ni omaalo anoovonyeriwa omooroni, Owo kharwa atepaxa woowarihani nyuwo, atthu a nroromelo vakhaani?

³¹ Tivawo, muhiixeeteteele mweeraka: ‘nnice eheeni?’ hoye hoye ‘nniwure eheeni?’ naari ‘nniware eheeni?’

³² Amalapo ti yaawo anghaawano itthusene seiyo. Atiithitho a wiirimu ansuwela weera nyuwo muntthuna seiyo.

³³ Mwaasaase toko omwene wa Muluku ni opaka otthunawawe, ni itthu seiyo sootheene mmwivahiwe nyuwo.

³⁴ Tivawo, muhiixeeteteele ni omaalo, niwoko nihuku na omaalo nnikhaleno sooweeteteelasaya nneenaaya. Khula nihuku nookhalano soonanarasaya soowaatta.