Matheyo 3 - Emakhuwa Bible

Yohaane mpatisa onreherera ephiro

¹ Vamahuku ale aahoowa Yohaane mpatisa munikareni na oYudeiya, alaleiyaka:

² “Murukunxe mirima, niwoko omwene wa wiirimu wookhuveela.”

³ Waari mwaha wa yoowo mprofeeti Yesaya uulumalaawe eeraka: “Nsu na mutthu onlaleiyaawe munikareni: ‘Mwaarehererele ephiro Apwiya. Ngwookolele ephiro Yaawo.’”

⁴ Ikuwosawe Yohaane saari soopakiwa ni ixapala sa ekamelu*, ni aangwara laamba a exapala. Soocasawe saari misoope ni oravo wa ntuphini.

⁵ Yaarowa wa yoowo atthu a oYerusaleemu, awo a ilapo sootheene sa oYudeiya nitho soowaattamana ni oYordanu.

⁶ Elapaka sootthekasaya, yaapatisiwa ni yoowo mmoolokoni Yordanu.

⁷ Aawoonnaawe Yohaane afarasi* ni aSaduki* ancipale ewaaka weiwo aapatisaawewo, aaweerela: “Inowa! Aweerenleni taani weera mutthawe isara sa Muluku sinkhuveela?

⁸ Muruwere soowiima sinoonihera orukunxa murima!

⁹ Muhuupuwele weera nyuwo munoowera wiixeerela: ‘Nookhalano Abrahaamu ntoko atiithi.’ Vano miyo kinooleelani weera Muluku ongwera otatuxa maluku ala anamwane a Abrahaamu.

¹⁰ Epaso eri yoolikaneene weera ethikile mikwankhwaari sa nyiri. Nyiri sootheene sihiniima soowiima sooreera, sinoothikiliwa ni sinoovonyeriwa mmooroni.

¹¹ Miyo kinoopatisani ni maahi mpaka orukunxa murima. Ottuliwaka onimoowa Mukina ooweraxa ookipwaha miyo. Nkiphwanenle okuxa ikwakwaattasawe. Yoowo anoopatiseni ni Munepa Wootteela, nitho ni mooro.

¹² Yoowo ookhalano ethelo mmatatanimwawe weera amveere namwaali a etrigu. Anaathokorore etrigu vatathani, ni anaamuhise namwaali mmooroni woohimala.”

Opatisiwa wa Yeesu

¹³ Vano Yeesu aarowa oGalileiya mpaka mooloko Yordanu weera apatisiwe ni Yohaane.

¹⁴ Yohaanetho aaheerera omukhoottiha, eeraka: “Ontthuneya weera miyo kipatisiwe ni Nyuwo, vano Nyuwo mungwa wa miyo?”

¹⁵ Yeesu aamwaakhula: “Muhiye hiiho! Ontthuneya weera nikwanihere yeeyo Muluku ontthunaawe.”Yohaane aamwaakhulela.

¹⁶ Apatisiwakaru, Yeesu aakhuma mmaahini. Wa ehuhuweene yeele, wiirimu waahuleiya ni aahoona Munepa wa Muluku omukhuruwelaka Yoowo ntoko ekhunda.

¹⁷ Vano nsu nimoha wiirimu naaheera: “Ola Mwanaka oosiveleyaxa mwa Yoowo kinnahakala.”