Matheyo 27 - Emakhuwa Bible

Wiixiiva wa Yudasi

¹ Oyaaka ni oxa, ahooleli a asaserdoti* ootheene ni asitokweene a muloko wa atthu yaaphiya woovaanelani weera emuthorihele Yeesu okhwa.

² Emutthukaka, yaamukuxa ni yaamvaherera wa Pilatu, guvernadori.

³ Yudasi, yoole aamvarihale Yeesu, oonakaru weera Yeesu oothoriheliwa okhwa, murimaawe waathananaxa ni aahaahokoloxera ahooleli a asaserdoti* ni asitokweene a muloko makhoobiri miloko miraru a eparatha*,

⁴ ni aaweerela: “Koottheka, niwoko koovariha ephome yoohikhala ni milattu.” Ni awo yaamwaakhula: “Hiyo khanimwaha. Ikuru ti sawinyu.”

⁵ Vano Yudasi aavonyera musurukhu mpuwa mwa Empa ya Muluku ni iivenxaka, aarowa ni aahiixiiva iitthukelelaka.

⁶ Ahooleli a asaserdoti* yaathukumanya makhoobiri a musurukhu ni yaaheera: “Nlamulo ninkhootta weera musurukhu ola waandyeereriwe vamoha ni mukina wa Empa ya Muluku, niwoko woothuma ephome.”

⁷ Yaalakela ovarela muteko musurukhu ole weera yathume ematta ya nanyaapu, weera anamarwa evithiwe mwemmo.

⁸ Niwoko nenenenno, ematta ele eniitthaniwa mpaka vaanaano vaava ematta ya ephome.

⁹ Hiihotho yookwaniheriwa yeeyo yaahimmwale, ni mprofeeti Yeremiya: “Yaakuxa makhoobiri miloko miraru a eparatha*, mutteengo yiiwanannaaya ni muloko wa aYixrayeli olivela okumaawe,

¹⁰ ni waavarela muteko ole weera othume ematta ya nanyaapu, ntoko Apwiya akiruminghaaya.”

Yeesu ohoolo wa Pilatu

¹¹ Yeesu aakuxiwa mpaka vamaithoni wa guvernadori, ni owo aamukoha: “Nyuwo muri Mwene a aYuda?” Yeesu aamwaakhula: “Ti ntoko muneeraanyu.”

¹² Ootheriwaka ni ahooleli a asaserdoti* ni asitokweene a muloko, Yeesu khaakhunle.

¹³ Vano Pilatu aamukoha: “Khamuniiwa soowootheriwa awo anoopakaayani Nyuwo?”

¹⁴ Yeesutho khaakhunle hata nsu nimoha, moota wooweera guvernadori aatikhina vancipale.

¹⁵ Vanonto, ehuhu ya efesta yaari ekhovelelo ya guvernadori omtaphula namatthukiwa mmoha oothanliwa ni atthu ancipale.

¹⁶ Ehuhuweene yeele awo yaakhalano namatthukiwa oosuwanyeya iitthaniwa Baraba.

¹⁷ Vano, woothukumanani atthu ancipale, Pilatu aahaakoha: “Taani a yaale muntthunaanyu weera miyo kimutaphule: Baraba, hoye hoye Yeesu oniitthaniwa Kristu?”

¹⁸ Owo aasuwela weera awo yaamvaherera Yeesu niwoko na nrima.

¹⁹ Pilatu akilaantheene nipuro noowuuluma milattu, amwaariye yaarumiha mutthenga ola: ‘Muhivolowe mulattweene yoola wa Yoole ohikhanleno mulattu, niwoko olelo moolohani koohaawaxa niwoko na Mulopwana Owo.’

²⁰ Vaheera ahooleli a asaserdoti* ni asitokweene a muloko yaahaasesera atthu ancipale weera emvekele omtaphula Baraba ni emvaherere okhwa Yeesu.

²¹ Guvernadori aahaakoha: “Taani a eeli awo muntthunaanyu weera miyo kimutaphule?” Awo yaamwaakhula: “Baraba!”

²² Pilatu aahaakoha: “Keereke hai ni Yeesu oniitthaniwa Kristu?” Ootheene yaamwaakhula: “Munkhomele!”

²³ Pilatu aahaakoha: “Niwoko heeni? Yoonanara heeni opankaawe?” Awo yaatepaxa okhuwelatho: “Munkhomele!”

²⁴ Oonaka Pilatu weera khaawera etthu, menetho weera waahanle vakhaani opacera onyakuleleiya, aahiitthaniha maahi. Vano aanyawa matata vamaithoni wa atthu ancipale eeraka: “Miyo nkinono mulattu ni ephome ya Mulopwana Ola. Ikuru ti sawinyu.”

²⁵ Atthu ootheene yaamwaakhula: “Ephomaawe Ola eniriheele hiyo ni anamwanaahu.”

²⁶ Pilatu aamutaphula Baraba, ni aahaalamulela weera engwaxule Yeesu ni aamvaherera weera akhomeliwe.

Anakhotto animutheiya Yeesu

²⁷ Anakhotto a guvernadori yaamurongha Yeesu owannyawe, ni yaathukumana anakhotto ootheene emurukurenreene.

²⁸ Yaamurula ikuwosawe ni yaangwariha mukaandyo wooxeera.

²⁹ Yaapaka ecireemba ya nyiiwa ni yaangwariha mmurumwawe. Yaamvareliha muttontto mmatatani, ni emukokhorelaka, yaamutheiya yeeraka: “Salaama Mwene a aYuda!”

³⁰ Yaamusenyela, ni emwaakhaka muttontto yaammanela mmurumwawe.

³¹ Emutheiyakaru, yaamurula mukaandyo, ni yaangwariha ikuwosawe. Vano yaamukuxa weera emukhomele.

Othomeiwa wa Yeesu

³² Evenyaka, yaamphwanya mulopwana a oSireene iitthaniwa Simeyoni, ni yaamunyesereriha okuxa muttanda.

³³ Yaaphiya nipuro niitthaniwa Golgota, entaphulela nipuro na nikarakasa.

³⁴ Iwe yaamvaha eviinyu yootakansiwa ni eviinyu yoonyuunya weera awure. Alawihakarutho, Owo aakhootta owura.

³⁵ Emukhomelakaru, yaakawana ikuwosawe epakaka macitta.

³⁶ Vano, ekilaantheene vaavaale, yaamulipelela.

³⁷ Vasulu wa muruwaawe yaahiikaathi yoolempwa yoomoothera yoole yeeraka: ‘Ola ti Yeesu, Mwene a aYuda.’

³⁸ Anamwiiya eeli yaakhomeliwa ni Yoowo, mukina moonowaawe mulopwana, mukina muthiyana.

³⁹ Yaawo yaavira yaamuruwana, yiinihaka nyurusaya

⁴⁰ yeeraka: “Weyo weera ophwate Empa ya Muluku ni oteke mmahukuni mararu – wiivuluxe! Okhuruwe vamuttandani, Weyo waari Mwaana a Muluku!”

⁴¹ Mooteene yoowo ahooleli a asaserdoti*, anamawera a nlamulo*, ni asitokweene a muloko yaamutheiya

⁴² yeeraka: “Aahaavuluxa akina, khangweratho wiivuluxa. Ori mwene a aYixrayeli? Akhuruwa vamuttandani, hiyo nnoomuroromela.

⁴³ Owo aamuroromela Muluku, vano Muluku amvuluxe amutthuna, niwoko Owo eenre: ‘Miyo ti Mwaana a Muluku.’”

⁴⁴ Hiihotho anamwiiya yaakhomeliwe ni Yoowo yaamuruwana.

Okhwa wa Yeesu

⁴⁵ Yaakhala epiphi mweelaponi yootheene wa iwoora tthaaru okhuma nsuwa vamuru.

⁴⁶ Siviraka iwoora tthaaru iye, Yeesu aakhuwela ni nsu ntokotoko: “Eloyi, Eloyi, lama sabaktani,” entaphulela: “Mulukwaaka, Mulukwaaka, niwoko heeni mukihingyaanyu?”

⁴⁷ Akina yaari weiwe yiiwalaaya yeeyo, yaaheera: “Owo onimwiitthana Eliya.”

⁴⁸ Woowaakuveya mmoha a yaale aatthimaka weera akuxe nttapwatta, aaruweiya mviinyuni yoonyuunya, aahiikaathi okhwipi wa ekopo, anamvaha Yeesu weera awure.

⁴⁹ Akinatho yaamweerela: “Munghiye, noone Eliya arwa omvuluxa.”

⁵⁰ Aakhuwenlaawetho ni nsu ntokotoko, Yeesu aahookhwa.

⁵¹ Ehuhuweene yeele ekuwo etokotoko ya Empa ya Muluku yaahaahuwa, ekawanyeyaka okhuma vasulu mpaka vathi. Etthaya yaatetereiya ni nyala saaphweeya.

⁵² Mahiye yaahuuhuwa, ni mittembo sa atthu ootteela ancipale yaakhwiiye saavenyererihiwa.

⁵³ Yaakhuma mmahiyeni, ni Yeesu avenyerenreene, yaavolowa musidadeni yootteela ni yaahooniwa ni atthu ancipale.

⁵⁴ Oonakaru kenturiyoni* ni yaawo yaamulipelenle Yeesu ni yoowo otetereiya ni sootheene seiye seereiye, yaahoova vancipale yeeraka: “Vekhaikhai, Ola aari Mwaana a Muluku.”

⁵⁵ Athiyana ancipale yaari weiwe, ewehaka ereene ottaiwene. Awo yaamutthara Yeesu okhuma oGalileiya weera emurumeeleke.

⁵⁶ Variyariwaya aari Mariya oMagadalene, Mariya amayawe Yakobe, ni Yoseefe ni amayaya anamwane a Zebedeyo.

Ovithiwa wa Yeesu

⁵⁷ Wiilaka, aaphiya namapuha mmoha a wArimateiya, iitthaniwa Yoseefe, aari oohusera a Yeesu.

⁵⁸ Arowaka wa Pilatu, aamvekela muttembo wa Yeesu, ni Pilatu aalamula weera avahiwe.

⁵⁹ Yoseefe aakuxa muttembo, anavitikelela musaandani yooreera,

⁶⁰ ni aniikaathi mmahiyeni manyowani owo aaruminghaawe othipiwa vamwala. Aahiikaathi nluku ntokotoko vamulako ni aavenya.

⁶¹ Mariya oMagadalene ni Mariya mukina yaakilaathi weiwe ohoolo wa nihiye.

Olipeleliwa wa nihiye

⁶² Oxaawaya naari nihuku naattharelana nihuku na orehereriwa, ahooleli a asaserdoti* ni aFarisi* yaarowa wa Pilatu ni

⁶³ yaamweerela: “Apwiya, ninuupuwelela weera areene mukumi, namalokottha Ole aaheera: ‘Kinoovenyerera yamala mahuku mararu.’

⁶⁴ Vano mwaalamulele anakhotto weera nihiyenawe nilipeleliwe mpaka nihuku nanaararu, weera ehiwe oohuseraawe ni yiiyaka muttembwaawe, anooleela muloko wa atthu weera Owo oovenyerera mookhwaani. Olokottha wu wanaaveeli onuukhale woonanaraxa opwaha woopacera.”

⁶⁵ Pilatu aawaakhula: “Mukuxe mpatta wa anakhotto. Muroweke ni mwalipeleleke nihiye ntoko muupuwenlaanyu.”

⁶⁶ Awo yaarowa ni yaalipiha nihiye ni mpatta wa anakhotto, ehelakatho vanlukuni eneneero ya ewalelo*.