Matheyo 23 - Emakhuwa Bible

Wiixeera wa aFarisi* ni anamawera a nlamulo*

¹ Vano Yeesu aaweerela atthu ancipale ni oohuseraawe:

² “Anamawera a nlamulo* ni aFarisi* anookilaathi vahiceni ya Moisesi.

³ Ngwiiwelele ni mupake sootheene awo angweerelaayani. Muhipaketho yeeyo awo ampakaaya, niwoko khaampaka yeeyo anlaleiyaaya.

⁴ Awo antthuka mirindi soolemela, anaathateliha atthu, mene awo asineenaaya khaantthuna ovarela muteko hata ekathaaya emoha weera esusihe mirindi iyo.

⁵ Sootheene ampakaaya, ampakela weera yooniwe ni atthu. Awo ampaka sitokotoko ikaxoottisaya sa mipatta sa Yoolempwa* vayuucini*, ni miramba sa soowarasaya soorakama.

⁶ Awo antthuna nipuro noottittimiheya na ofestani, ni ihice soottittimiheyaxa muSinagogani*.

⁷ Antthunatho wuulumihiwa omerekadu ni wiitthaniwa ‘Muhusiha.’

⁸ Nyuwotho muhiitthaniweke muhusiha, niwoko mmoha paahi ori Muhusihaanyu, ni ootheene nyuwo muri axunna.

⁹ Muhimwiitthane mukina vathi atiithi, niwoko murino Atiithi amoharu paahi – Awo ari wiirimu.

¹⁰ Hata vakhaani nyuwo muhiitthaniwe muhusiha, niwoko murino Muhusiha mmoha: Kristu.

¹¹ Mutokweenaanyu akhaleke murumeiyaanyu.

¹² Vano, khula mutthu oniivuwiha, anaakhale ooyevihiwa, ni khula mutthu oniiyeviha, anaakhale oovuwihiwa.

¹³ Ii! Munoohaawa nyuwo, anamawera a nlamulo*, aFarisi*, anamwiixeera! Nyuwo mungwala nsele na omwene wa wiirimu ohoolo wa atthu. Nyuwo muneenaanyu khamumvolowa, hata khamunaahiya evolowaka yaawo antthuna.

¹⁵ Ii! Munoohaawa nyuwo, anamawera a nlamulo*, aFarisi*, anamwiixeera! Niwoko munimweetta mapuro mancipale weera mumviriyele mutthu okhala oohuseraanyu, ni mwawera, munoomutatuxa mwaana a mooro ootepaxa woopwahani nyuwo.

¹⁶ Ii! Munoohaawa nyuwo, oohoona anamweettiha oohoona. Vano, nyuwo muneera: ‘Mukina alipela ni Empa ya Muluku, eyo kheentaphulela etthu, mene mukina alipela ni eyuuma yooreeraxa ya Empa ya Muluku, owo onoonyesereriwa ni olipelawawe.’

¹⁷ Atthu oohoona ni alolo! Ti heeni yootthuneyaxa? Eyuuma yooreeraxa, hoye hoye Empa ya Muluku entteeliha eyuuma eyo?

¹⁸ Nyuwo muneeratho: ‘Mukina alipela ni altaari*, eyo kheentaphulela etthu, mene mukina alipela ni yoovaha eri vasulu wa nenno, owo onoonyesereriwa ni olipelawawe.’

¹⁹ Atthu oohoona! Ti heeni yootthuneyaxa? Yoovaha, hoye hoye altaari* antteeliha yoovaha eyo?

²⁰ Tivawo, yoole onlipela ni altaari*, onlipela ni nenno nitho ni sootheene siri vasuluwaya,

²¹ ni yoole onlipela ni Empa ya Muluku, onlipela ni yeeyo nitho ni Yoowo onkhala mwemmo.

²² Yoole onlipela ni wiirimu, onlipela ni ehice ya Muluku nitho ni Yoowo onkilaathelawo.

²³ Ii! Munoohaawa nyuwo, anamawera a nlamulo*, aFarisi*, anamwiixeera! Nyuwo mumvaha mpatta wanaamuloko wa sooreerela sooreeraxa, endro*, ni kominyu*, mene munnattiwala iyo sinnyesereriwa sa nlamulo: ekhaikhai, ikharari, ni ororomeleya. Ontthuneya nyuwo opaka itthusene seiya muhihiyakatho soopacera.

²⁴ Anamweettiha oohoona! Nyuwo munseefa ececema, mene mummira ekamelu*.

²⁵ Ii! Munoohaawa nyuwo, anamawera a nlamulo*, aFarisi*, anamwiixeera! Nyuwo munrapiha omokoni wa ekoomixi ni wa esasaani, mene mpuwa yoosareya ni ohaawelaxa ni milili.

²⁶ aFarisi* oohoona! Murapihe toko mpuwa mwa ekoomixi ni esasaani, weera omokoni orapiheiyetho.

²⁷ Ii! Munoohaawa nyuwo, anamawera a nlamulo*, aFarisi*, anamwiixeera! Munlikana ntoko mahiye ootteelihiwa: anreera omokoni, mene mpuwamwaya ansareya makhuva ni itthu soohitteela.

²⁸ Nyuwotho muri hiiho. Mwaatthuni munlikana ntoko oororomeleya, mmirimanimwanyutho woosareya wiixeera ni sootakhala.

²⁹ Ii! Munoohaawa nyuwo, anamawera a nlamulo*, aFarisi*, anamwiixeera! Nyuwo munaatekela mahiye maprofeeti ni munreeriha mahiye a atthu oororomeleya

³⁰ mweeraka: ‘Naakhanle ehuhu ya makholowaahu, saano nihiwiivale maprofeeti vamoha ni yaawo.’

³¹ Hiiho nyuwo muniikhalela onamoona weera muri ekhapira ya yaale yaawiivale maprofeeti.

³² Vano, mukwanihere muringo wa soottheka sa makholowaanyu!

³³ Inowa! Ekhalelo ya evili! Moota heeni muneeraanyu moopowe wa nthorihelo mmooroni?

³⁴ Tivawo Miyo kineeraaka koorumiheleni maprofeeti, asuweli ni ahusiha. Akina a yaawo mmwiwiive ni mmwaakhomele, akina mmwaawaxule muSinagoganimwanyu ni mmwaasoonde esidade ni esidade.

³⁵ Ni hiiho, ephome yootheene yoororomeleya evuuviheriwe vatthayani, eniyoothoonyereni nyuwo, okhuma ephome ya Abeli oororomeleya mpaka ephome ya Zakariya, mwaana a Barakiya, yoole nyuwo mmwiivalaanyu eriyari ya Empa ya Muluku ni altaari*.

³⁶ Miyo kinoororomelihani weera sootheene seiyo nsikhuruwele ekhapira ela.

³⁷ Yerusaleemu, Yerusaleemu, weyo ongwiiva maprofeeti ni onaavonya maluku yaawo onrumiheliwaawo! Hapo kaatthuna waathukumanya anamwanaawo ntoko nttehi nnaathukumanyaaya axaanaaya vathi wa mapuphaaya, mene khawaatthuna!

³⁸ Woone, empaawo eniithaamiwe.

³⁹ Vano Miyo kinooleela weyo weera khoorwa okoonatho okhuma vaanaano va mpaka oneeraawo weere: ‘Ooreelihiwa ti Yoowo ongwa mwa Nsina na Apwiya.’”