Matheyo 21 - Emakhuwa Bible

Ovolowa oYerusaleemu

¹ Ekhuveelaka oYerusaleemu ni ephiyaka oBetefage, omwaakoni Sooliveira, Yeesu aahaarumiha oohusera eeli

² aweerelaka: “Murowe omuttettheni ori ohoolowanyu, ni munoomphwanya buuru muthiyana atthukiweene ni buuru muxaana mukerekheremwawe; mwaataphule ni mukiwiihere.

³ Mutthu ookohani, mwamuleele weera Apwiya anaatthuna ni eniyaahokoloxe.”

⁴ Seiyo seereiye weera sikwaniheriwe seiyo saahimmwale ni mprofeeti:

⁵ “Munleele mwaana a Siyoni: Mmoone, Mwenaanyu onimoowa wa nyuwo, iiyevihaka ni angwenleene buuru muthiyana, buuru muxaana, mwaana a buuru.”

⁶ Oohusera yaarowa ni yaapaka yeeyo Yeesu aalamulenlaawe.

⁷ Yaangwiiha buuru muthiyana ni buuru muxaana, yaahiikaathi mikaandyosaya vasulu wa buuru, ni Yeesu aahaakilaathela yaawo.

⁸ Atthu ancipale yaahaatala mikaandyosaya mphironi. Akina yaathikila iphandi sa nyiri ni yaamwaramwaxa mphironi.

⁹ Atthu yaari ohoolowawe ni ottuliwawe yaahiipa ni ohakalalaxa yeeraka: “Hosana* wa Mwaana a Davide! Ooreelihiwa ti Yoowo ongwa mwa Nsina na Apwiya! Hosana* musulusulu!”

¹⁰ Yeesu avolowaka oYerusaleemu, atthu ootheene a esidade ele yaasesereiya ni yaakohana: “Ola taani?”

¹¹ Atthu ancipale yaavolongwe yaahaakhula: “Ola ti Yeesu, mprofeeti a oNasarete, elapo ya oGalileiya.”

Yeesu ontteeliha Empa ya Muluku

¹² Yeesu aavolowa Empa ya Muluku, ni aawoomola ootheene yaale yaathumiha ni yaathuma. Aapittula meesa a anamaceendya musurukhu ni ihice sa anamathumiha a ikhunda,

¹³ ni aaweerela: “Yoolempwa: ‘Empaaka eniyiitthaniwe empa ya nivekelo,’ mene nyuwo mumpaka nikhuku na anamwiiya!”

¹⁴ Atthu oohoona ni atthu oorakala yaamwaattamela Yoowo Mpaani mwa Muluku, ni Owo aahaalamiha.

¹⁵ Yoonakatho ahooleli a asaserdoti* ni anamawera a nlamulo* itthu sootikhiniheiya Yeesu aapankaawe, ni anamwane ekhuwelaka Mpaani mwa Muluku: “Hosana* wa Mwaana a Davide,” yaanyoonyiwa

¹⁶ ni yaamukoha: “Nyuwo khamuniiwa anamwane anghimaaya?” Yeesu aawaakhula: “Aani, khamunatoko osoma: ‘Wa iyano sa ooyariwa vaanaano ni anamwane oottuli mohiirehererela ottottopela?”’

¹⁷ Vano, aahiyaka, aavenya wa esidade arowaka oBetaniya, aavirihalaawe ohiyu wootheene.

Efiigu yoowuuma

¹⁸ Oyaaka ni oxa, ahokolowaka osidade, Yeesu aavoliwa etala.

¹⁹ Oonaka mwiri wa efiigu mukerekhere ephiro, aahaattamela, mene khaaphwannye etthu, ehikhanle makukhu. Vano aaheerela: “Ohiime mahuku ootheene!” Woowaakuveya mwiri ole waahuuma.

²⁰ Yoonaka yeeyo, oohusera yaatikhina ni yaakohana: “Heeni mwiri wa efiigu wuumalaaya moota woowaakuveya ola?”

²¹ Yeesu aawaakhula: “Kinoororomelihani weera mwakhalano nroromelo ni mwaahihovela, nyuwo munoowera opaka, ohikhanle paahi yeeyo opakiwaaya mwiri ola wa efiigu, menetho munoowera weerela mwaako ola: ‘Ovenye ni wamorele mphareiyani,’ ni hiiho eniipakeiye.

²² Sootheene muneeraanyu muvekele ni mavekelo, mwaroromela, nyuwo mmwaakhele.

Yookoha mwaha wa ikuru sa Yeesu

²³ Yeesu aavolowa Empa ya Muluku ni axuttihaka, yaamwaattamela ahooleli a asaserdoti* ni asitokweene a muloko wa atthu ni yaamukoha: “Ni ikuru heeni mumpakaanyu itthu iya? Ni taani yoovangheni ikurusene seiya?”

²⁴ Yeesu aawaakhula: “Miyo kinimookohanitho; mwakaakhula, kinimooleelani ni ikuru heeni kimpakelaaka itthu iya.

²⁵ Opatiso wa Yohaane, waari wa wiirimu, hoye hoye wa atthu?” Awo yaakohana yaaworu: “Neera ‘wa wiirimu,’ ola onoonikoha: ‘Vano, niwoko heeni nyuwo mwahaamuroromenlaanyu?’

²⁶ Menetho neera ‘wa atthu’ – ninoova muloko wa atthu, niwoko ootheene aneera weera Yohaane ori mprofeeti.”

²⁷ Awo yaamwaakhula Yeesu: “Hiyo khanisuwenle.” Vano Owo aaweerela: “Hata Miyo nkinooleelani ni ikuru heeni kimpakelaaka itthu iya.

Yoolikanyiha ya anamwane eeli

²⁸ Munuupuwela hai? Aakhala mulopwana mmoha aarino anamwane eeli. Aphiyaka oopacera, aamweerela: ‘Mwanaka, oroweke wavareke muteko olelo mmattamwaka mwa iwuuva*.’

²⁹ Ni owo aamwaakhula: ‘Nkintthuna.’ Vahoolotho vakhaani aaceendya soowuupuwelasawe ni aarowa.

³⁰ Atiithi yaaphiya wa mwaana mukina ni yaamweerela mooteene yoowo. Owo aawaakhula: ‘Aani, Apwiya,’ mene khaarongwe.

³¹ Wa eeli ale, taani aapanke otthuna wa atithaya?” Awo yaamwaakhula: “Oopacera.” Yeesu aaweerela: “Miyo kinooleelani ekhaikhai: anamaliviha a musoko ni mapuuta anoovolowa moomweneni wa Muluku muhinaaye nyuwo,

³² niwoko Yohaane aarweenle owooniherani ephiro ya waakhuleliwa ni Muluku, mene khamunroromenle, vano anamaliviha a musokotho ni mapuuta aamuroromela. Nyuwo, hata moonakaru seiyo, khamurukunxale murima, hata khamunroromenle yoowo.

Yoolikanyiha ya anamalima ematta ya iwuuva*

³³ Mwiiwe yoolikanyiha ekina. Aakhala mwaneene aaphatteiye ematta ya iwuuva*. Aapaka mukuso arukureerihaka ematta ele. Aapakatho nipuro noovotta iwuuva* ni aateka nipuro na anamalipelela. Vano aawooliha ematta ele anamalima akina ni aarowa mukwahaawe.

³⁴ Yaattamelaka ehuhu ya ohepha, aahaarumihela arumeiyaawe anamalima weera yaakhele soowiimasaya.

³⁵ Anamalimatho yaahaavara arumeiyaawe: Mmoha yaammana, mukina yaamwiiva ni anaararu yaamvonya maluku.

³⁶ Vanonto aahaarumihela arumeiyi akina oopwaha oopacera, ni anamalima yaahaapakela mooteene yoowo.

³⁷ Woomalihera aamurumiha mwanawe eeraka: “Awo eniimuttittimihe mwanaka.”

³⁸ Emoonakarutho, yaaheerelana: ‘Ola ti namahiyeriwa a muneene. Nrowe, nimwiive weera naakhele ematta eeraawe aakhele.’

³⁹ Hiiho, awo yaamvara, enamvonyera vaate wa ematta ya iwuuva*, enamwiiva.

⁴⁰ Aawaaka mwaneene a ematta ya iwuuva* ele, anaapakele eheeni anamalima ale?”

⁴¹ Awo yaamwaakhula: “Owo anaawiive moota woowoopiha atthu ootakhala ale, ni anaawoolihe ematta ya iwuuva* anamalima akina eneera emvahe mpattaawe wa soowiima ehuhu ya ohepha.”

⁴² Yeesu aaweerela: “Khamunasome Yoolempwa*: ‘Nluku anamateka yaakhoonttaaya, naathatuwa nluku noottittimiheyaxa. Apwiya yaapanke yeeyo ni ti yootikhinihaxa mmaithonimwahu?’

⁴³ Tivawo, Miyo kinooleelani weera omwene wa wiirimu onuuvenxiwe wa nyuwo ni onuuvahiwe muloko omvaha soowiima sa omwene.

⁴⁴ Yoowo anuuwele nluku nna, anaanyakatteiye, ni yoowo aneera amoreliwe ni nna anaattikittheiye ntoko ntthupi.”

⁴⁵ Yiiwalaaya ahooleli a asaserdoti* ni aFarisi* soolikanyiha sa Yeesu, yaasuwela weera Owo uulumale mwaha wa yaawo.

⁴⁶ Vano yaasaasa moota woomvara, mene yaawoova atthu ancipale, niwoko yaamweerela weera Yeesu ori mprofeeti.