Matheyo 20 - Emakhuwa Bible

Yoolikanyiha ya anamiteko a ematta ya iwuuva*

¹ Vano, omwene wa wiirimu ori ntoko mwaneene aavennye ohinaxe arowaka owaasa anamiteko wa emattaawe ya iwuuva*.

² Owo aahiiwanana waaliva edinaariyu* emoha vanihukuni, ni aahaalamula wa emattaawe ya iwuuva*.

³ Siviraka iwoora tthaaru, owo aavenya veeli ni aawoona omerekadu akina yahaavara muteko.

⁴ Aaweerela: ‘Murowetho, mwavare muteko mmattamwaka ya iwuuva*, ni miyo kinimoolivani yeeyo eri yootthuneya.’

⁵ Ni awo yaarowa. Aavenyatho nsuwa vamuru, nitho oxekuwa apakaka mooteene yoowo.

⁶ Avenyaka iwoora muloko niithannapiili, aahaaphwanya akinatho yahaavanre muteko, ni aahaakoha: ‘Niwoko heeni nyuwo muhimvaraanyu muteko nsuwa nootheene?’

⁷ Awo yaamwaakhula: ‘Niwoko khaawo onilempe muteko.’ Vano, aaweerela: ‘Muroweke nyuwotho mmattamwaka ya iwuuva*.’

⁸ Wiilalaaya, mwaneene a ematta ya iwuuva* aamweerela namaawehaweha anamiteko: ‘Ngwiitthane anamiteko, ni mwaalive mwaapaceraka oomalihera olepiwa mpaka ophiyera oopacera.’

⁹ Yaahoowa anamiteko ale yaalempwe muteko iwoora muloko niithannapiili sooxekuwa, ni aahaakhela mutthu ti mutthu edinaariyu* emoha.

¹⁰ Yaaphiyalaaya ale yaapacenre olempwa, yuupuwela weera animwaandyeereriwa musurukhu. Mene khula mutthu a yaale aahaakhelatho edinaariyu* emoha.

¹¹ Yaakhelakaru, yaapacera omuttaandawula mwaneene a ematta ya iwuuva*

¹² emweerelaka: ‘Alopwana awo oomalihera olempwa avanre muteko ewoora emoha paahi, ni apwiya munaalikanxa ni hiyo nivilenle olemela wa muteko ni oviha wa nihuku.’

¹³ Vano owo aamwaakhula mmoha a yaawo eeraka: ‘Nthamwene, miyo nkinoopakela weyo yeeyo eri yoonanara. Weyo khaniiwananne ovara muteko wa edinaariyu* emoha?

¹⁴ Waakhele yeeyo eri yawawo ni oroweke. Miyo kintthuna waavaha yaawo oomalihera olempwa ntoko yeeyo miyo koovanghaaka.

¹⁵ Nkiphwanenle soovarela yeeyo kintthunaaka ni musurukhwaaka? Weyo nanrima niwoko nkinlipa mmatatanimwaka ni musurukhwaaka?’

¹⁶ Hiiho, oomalihera eniikhale oopacera, ni oopacera eniikhale oomalihera.”

Yeesu onuuluma veeli sa okhwawawe ni ovenyererawawe

¹⁷ Arowaka oYerusaleemu, Yeesu aawiitthana vakhwipi oohusera muloko neeli ni aaweerela:

¹⁸ “Ninrowa oYerusaleemu, ni Mwaana a mutthu anaavahereriwe wa ahooleli a asaserdoti* ni anamawera a nlamulo*. Awo eniimuthorihele okhwa

¹⁹ ni eniimveleele wa amalapo weera emuramuse, engwaxule ni emukhomele vamuttandani. Vanihukuni nanaararu Owo anaavenyererihiwe!”

Nivekelo na maayi mmoha

²⁰ Vano yaamwaattamela Yeesu amayaya anamwane a Zebedeyo, ehooliwaka ni anamwanaaya, ni yaahuurama vahoolowawe weera emvekele etthu.

²¹ Yeesu aamukoha: “Muntthuna eheeni nyuwo?” Awo yaamweerela: “Kinoovekelani weera, mwaaphiyaka moomwenenimwanyu, anamwanaaka ala eeli yakilaathi mmoha moonowaanyu mulopwana ni mukina moonowaanyu muthiyana.”

²² Yeesu aaweerela: “Nyuwo khamusuwenle etthu mumvekelaanyu. Nyuwo munoowera owura ekoomixi eyo Miyo kineeraaka kiwure?” Awo yaamwaakhula: “Ninoowera.”

²³ Yeesu aaweerela: “Vekhaikhai nyuwo mmwiwure ekoomixaaka, okilaathitho moonowaaka mulopwana, naari muthiyana khoohiyono otthuniherawaka. Mapuroweene yaawo ari a yaawo Atithaka yaarehererenlaaya.”

²⁴ Yiiwalaaya yeeyo muloko akina, yaahaanyoonyeriwa axunna eeli ale.

²⁵ Yeesu aawiitthana ni aaweerela: “Moosuwela weera anamalamula a ilapo animwaalamula, ni asitokweenaaya animwaalamula ni ikuru atthu ale a ilapo.

²⁶ Ohikhale hiihaawo variyariwanyu. Ohiyanawaya, yoole ontthuna okhala mutokweene variyariwanyu, akhaleke murumeiyaanyu,

²⁷ ni yoole ontthuna okhala oopacera, akhaleke epotthaanyu.

²⁸ Hiihotho Mwaana a mutthu khaaweenle orumeeliwa, mene weera arumeele, ni aveleele okumaawe ntoko yoowoopola ancipale.

Olamihiwa wa atthu eeli oohoona

²⁹ Woovenyani oYeriko, atthu ancipale yaamutthara Yeesu.

³⁰ Vano, atthu eeli oohoona yaakilaathi mukerekhere musewe. Yiiwalaaya weera Yeesu eera aviraka, yaapacera okhuwela, yeeraka: “Apwiya, Mwaana a Davide, munimorele ikharari hiyo!”

³¹ Muloko wa atthu waaheerera waahiiha, mene awo yannapwaherera okhuwela: “Apwiya, Mwaana a Davide, munimorele ikharari hiyo!”

³² Yeesu, eemelaka, aawiitthana ni aahaakoha: “Eheeni muntthunaanyu woopakani Miyo?”

³³ Yaamwaakhula: “Apwiya, hiyo nintthuna weera ehuleiye maithwaahu.”

³⁴ Yeesu aahaamorela ikharari ni aatava maithwaaya. Woowaakuveya yaawera woona ni yaamutthara.