Matheyo 18 - Emakhuwa Bible

Mutokweene moomweneni wa wiirimu

¹ Ehuhuweene yeele oohusera yaaphiya wa Yeesu ni yaamukoha: “Mutokweene taani oopwaha sootheene moomweneni wa wiirimu?”

² Amwiitthanaka mwaana mmoha, aamwiikaathi variyariwaya

³ eeraka: “Miyo kinoororomelihani weera nyuwo muhiiceendye ni muhiitatunxe ntoko anamwane, vekhaikhai khamumvolowa moomweneni wa wiirimu.

⁴ Tivawo, yoowo oniiyeviha ntoko mwaana ola, owo ti mutokweene moomweneni wa wiirimu.

⁵ Yoowo onimwaakhela mmoha a anamwane ala, onkaakhelatho Miyo.

⁶ Mukinatho amutthekiha mmoha a anamwane ala ankiroromela Miyo, waari fataari omutthukelela nxilo muxiko ni ovonyeriwa mphareiyani moowiixa!

⁷ Ii! Enoohaawa elapo ya vathi niwoko na itthu sintthekiha! Khasinsembeiya weera itthu iyo sikhumelele, mene Ii! Ohaawa wa yoowo ontannyera seiyo!

⁸ Matataanyu, hoye hoye nnaawonanyu nootthekihani, muthikile ni muvonyere okerekhere. Fataari ovolowa mookumini oorakaleene, naari oovulaleene, ohikhanle oreeneno matata meeli, hoye hoye inaawo soopiili ovonyeriwa mmooroni woohimala.

⁹ Niithonaanyu nootthekihani, muzoole ni muriheleke okerekhere. Fataari ovolowa mookumini ni niitho nimoha paahi, ohikhanle oreeneno maitho oomeeli ovonyeriwa mmooroni woohimala.

Yoolikanyiha ya ekhondoolo yoothweelela

¹⁰ Mwiipasoope weera muhimuramuse hata mmoha a yaala asikhaani! Miyo kinooleelani weera andyelowaaya a wiirimu annoona ekhove ya Atithaka ari wiirimu.

¹² Munuupuwela hai? Mukina akhalanneene ikhondoolo ncira, ni emoha ya seiyo enathweelela, khanghiya toko miloko mithannamixexe niithaniixexe omwaako, arowaka waasa yeeyo ethweelenle?

¹³ Miyo kinoororomelihani weera aphwanya, owo onoohakalalela ekhondoolo eyo ohiya iyo miloko mithannamixexe niithaniixexe sahaathweelenle.

¹⁴ Mooteene yoowo, Atithinyu ari wiirimu khaantthuna weera hata mmoha a asikhaani ala ariheiyeene.

Oreherera yoottheka ya munna

¹⁵ Munninyu ootthekelani nyuwo, murowe okhwipi ni yoowo ni mwamoonihere yoottheka. Owo iiwa, nyuwo moongwina munninyu.

¹⁶ Owo aahiwiiwanitho, munkuxe ni nyuwo mmoha mukinatho, hoye hoye eeli. Hiiho, ni iyano sa anamoona eeli, hoye hoye araru, milattu sootheene sikhale soomalihiwa.

¹⁷ Akhootta wiiwelela, mwaleele ekerexa, ni owo aahiiwelelatho ekerexa, akhale ntoko mmalapwaanyu, naari namaliviha a musoko.

¹⁸ Kinooleelani ni ekhaikhai: sootheene muntthukaanyu vathi, sinootthukiwatho wiirimu, ni sootheene munghulaanyu vathi, nsihuliwetho wiirimu.

¹⁹ Ni kinooleelanitho weera, eeli a nyuwo yaakhulela vathi mwaha wa wakhalaru mulattu muneeraanyu muvekele, yeeyo Atithaka ari wiirimu anoowaakhulani.

²⁰ Vano, weiwo anthukumanaayawo eeli, naari araru mwa Nsinanaka, vawo Miyo kiri variyariwaya.”

Murumeiyi oohimoriwa ikharari

²¹ Pedru aamwaattamela Yeesu ni aamukoha: “Apwiya, imaara ihayi kineeraaka kimulevelele munnaka akitthekela? Mpaka imaara ithannapiili?”

²² Yeesu aamwaakhula: “Miyo kinooleelani weera khasihiyono imaara ithannapiili, mene mpaka imaara soothesene.

²³ Tivawo omwene wa wiirimu ori ntoko mwene aatthunne waalikela ikoongori sa arumeiyaawe.

²⁴ Aapacenraawe waalikela, aaruuheliwa mmoha vamaithoniwawe aakoongonre italento* macira macireene muloko.

²⁵ Hapo Okhala khaawenre oliva, apwiya yaamulamulela weera owo, amwaarawe, anamwanaawe ni sootheene yaarinaaya sithumihiwe weera elive ekoongoraawe.

²⁶ Murumeiyi ole aahuuramela ohoolowaya ni aahaadyoonttelela eeraka: “Mukivilele. Miyo kinimoolivani sootheene.”

²⁷ Apwiya a murumeiyi ole yaammorela ikharari, aamaliha ekoongori ni aamuhiya weera arowe.

²⁸ Murumeiyi ole avenyaka, aamphwanya murumeiyi mukhwaawe mmoha aamukoongorenle idinaariyu* ncira. Aamvara ni aapacera omunyooka eeraka: “Mukilive yeele mukikoongorenlaanyu!”

²⁹ Vano murumeiyi mukhwaawe ole aamukokhorela ni aamudyoonttelela eeraka: “Mukivilele! Miyo kinimoolivani sootheene.”

³⁰ Mene owo khaatthuna. Aarowa waalamula atthu akina weera engwalele mukaliposo mpaka aneeraawe alive ekoongori.

³¹ Vano arumeiyi asikhwaawe akina, yoonnaaya yeele yeereiye, yaathanana vancipale ni yaarowa waaleela apwiyaawe sootheene seiye seereiye.

³² Apwiya yaamwiitthana murumeiyi ole ni yaamweerela: “Murumeiyi oonanara murima! Koomaliha ikoongorisawo sootheene niwoko waakidyoonttelela.

³³ Khawaatthuneya weera weyo ommorele ikharari murumeiyi mukhwaawo ntoko miyo kaaweerihalaaka weyo?

³⁴ Enyoonyiweene, apwiyaawe yaamvaherera anamahooxa mpaka eeraawe alive sootheene aakoongonraawe.

³⁵ Hiihotho animoopakani Atithaka ari wiirimu nyuwo ootheene mwaahimulevelela munninyu ni murima wootheene.”