Matheyo 17 - Emakhuwa Bible

Otatuxiwa vamwaakoni

¹ Amalihaka mahuku mathannamosa, Yeesu aamukuxa Pedru, Yakobe, ni Yohaane, munneiye Yakobe ni aahaarongha meekhaaya vamwaako woorakama.

² Vale Owo aatatuxiwa ohoolowaya. Ekhovaawe yaahaara ntoko nsuwa ni ikuwosawe saathatuwa sootteela ntoko waara.

³ Wa ehuhuweene yeele yahiixoonihera ohoolowaya Moisesi ni Eliya, emutthekulakano Yeesu.

⁴ Vano Pedru aamweerela Yeesu: “Apwiya, ti wooreera hiyo okhala vaava. Mwatthuna, kipake mikottha miraru: mmoha wawinyu, mukina wa Moisesi, ni mukinatho wa Eliya.”

⁵ Alokololaka, nihutte nootteelaxa nahaakhuneela, ni mwa nenno naakhuma nsu nimoha neeraka: “Ola ti Mwanaka oosiveleyaxa. Owo onkisiveliha vancipale. Mmwiiwe Yoowo.”

⁶ Yiiwaka yeeyo, oohusera yaahuuramela vathi ni yaahoova vancipale.

⁷ Yeesutho aawaattamela ni aahaatava yaawo aawerelaka: “Muvenye, muhoove.”

⁸ Awo ewehaka osulu, khayaawoonne akina, ahikhanle Yeesu paahi.

⁹ Ekhuruwaka vamwaako, Yeesu aahaalamulela eeraka: “Muhaaleele akina yeeyo moonnaanyu mpaka Mwaana a mutthu aneeraawe avenyererihiwe mookhwaani.”

¹⁰ Oohusera yaamukoha: “Niwoko heeni anamawera a nlamulo* aneeraaya weera ontthuneya aweeke toko Eliya?”

¹¹ Yeesu aawaakhula: “Ettiitthu, Eliya onimoowa ni anaareherere itthu sootheene.

¹² Mene Miyo kinooleelani weera Eliya aahoowa, ni yaawo khaamusuwenle yoowo, mene yaampakela sootheene yaatthunaaya. Mooteene yoowo Mwaana a mutthu anaahaawe mmatatanimwaya.”

¹³ Vano oohusera yaahiiwexexa weera Owo uulumale sa Yohaane mpatisa.

Olamihiwa wa mmiravo aarino munepa woonanara

¹⁴ Ephiyakaru yaaraaya atthu ancipale, mulopwana mmoha aamwaattamela Yeesu, anakokhora vahoolowawe, anamweerela:

¹⁵ “Apwiya, mummorele ikharari mwanaka. Owo onnakomokasa ni onnahaawa vancipale. Imaara sincipale onnimorela mmooroni, hoye hoye mmaahini.

¹⁶ Miyo kaangwiiha wa oohuseraanyu, mene awo khaawenre omulamiha.”

¹⁷ Yeesu aahaakhula: “Ekhapira yoohiroromela ni yoonanara! Mpaka yaakhani kineeraaka kikhale ni nyuwo? Mpaka yaakhani kineeraaka koovileleni? Mukiruuhele mmiravo.”

¹⁸ Yeesu aahiiha munepa woonanara. Owo waavenya wa mmiravo, ni okhuma ehuhuweene yeele mmiravo ole aalamihiwa.

¹⁹ Vano oohusera yaamwaattamela Yeesu vakhwipi ni yaamukoha: “Nihiwerenle heeni woomola?”

²⁰ Owo aawaakhula: “Niwoko na nroromelo vakhaani nyuwo murinaanyu. Miyo kinooleelani vekhaikhai weera, mwakhalano nroromelo ntoko enuku ekhaani, munoowera weerela mwaako ola: ‘Muvenye vaava mpaka vale,’ ni ole onoorowa. Kheewo eneera ekhale yoohiwereya wa nyuwo!

²² Awo ethukumanaka oGalileiya, Yeesu aaweerela: “Mwaana a mutthu anaavahereriwe mmatatani mwa atthu.

²³ Awo eniimwiive, ni nihuku nanaararu anaavenyerere.” Ni oohusera yaathanana vancipale.

Oliva musoko

²⁴ Yeesu ni oohuseraawe yaaphiyalaaya oKafarnawu, yaamwaattamela Pedru anamaliviha a musoko wa Empa ya Muluku, ni yaamukoha: “Muhusihaanyu khanliva musoko wa Empa ya Muluku?”

²⁵ Pedru aahaakhula: “Onooliva.” Avolowakaru Pedru mpaani, Yeesu aari oopacera omuulumano, amukohaka: “Munuupuwela hai Simeyoni? Wa taani mamwene a vathi anaakhelelaaya soovahiwa ni misoko: wa anamwanaaya, hoye hoye wa akina?”

²⁶ “Wa akina,” aamwaakhula Pedru. Yeesu aamweerela: “Vano, anamwane ari maneethi.

²⁷ Weeratho nihaakwattulihe yaawo, murowe ophareiya, mwavonyere nimeso, mwavenxe ehopa muneeraanyu mwapacere owarula, mwahule eyanowaaya ni mmwaphwanyemo nikhoobiri na indarama* ixexe. Mwakuxe nno ni mwakilivele Miyo ni mwiiliveletho nyuwo.”