Matheyo 13 - Emakhuwa Bible

Yoolikanyiha ya namwaala

¹ Nihuku nenenenne Yeesu aavenya owaani ni aakilaathi mukerekhere wa ephareiya.

² Yaathukumana mukhwipimwawe atthu ancipale, moota wooweera Owo aavolowa munikulani ni aakilaathi atthu ootheene ereene mukhwipi mwemmwe.

³ Vano Owo aahuuluma itthu sincipale ni soolikanyiha, eeraka: “Namwaala aarowa waala.

⁴ Aalaka, mpatta wa mmiso waamorela mukerekhere wa ephiro, ni ipalame saahoowa ni saahooca.

⁵ Mpatta mukina waamorela vamasorosoroni wahaakhanlewo etthaya yincipale, ni waamela woowaakuveya, niwoko etthaya yeeyo khayiixenre.

⁶ Naakhumalaaya nsuwa, mmiso ole waamenle waahoosa ni waahuuma niwoko khawaarino mikwankhwaari.

⁷ Mpatta mukina waamorela vanyiiwani, saahunnuwa ni saavuvura mmiso ole.

⁸ Mukinatho waamorela vatthayani yooreera ni waavaha soohepha sooreera: mmiso mmoha soowiima imaara ncira, mmiso mukina soowiima imaara miloko mithannamosa, ni mukinatho imaara miloko miraru.

⁹ Yoowo orino maaru, iiwe.”

¹⁰ Oohusera yaamwaattamela ni yaamukoha: “Heeni Nyuwo munuulumaanyu ni atthu ni soolikanyiha?”

¹¹ Owo aahaakhula: “Wa nyuwo moovahiwa osuwela ixiiri sa omwene wa wiirimu, mene wa yaawo, naari.

¹² Yoowo okhalanne, onoovahiwatho, ni owo anaakhalane yincipale. Yoowo ohikhalanne, mpaka yeeyo orinaawe, enoovenxiwa.

¹³ Niwoko na yeeyo Miyo kinimwaaleela ni soolikanyiha: ‘Niwoko yoonaka, khaanoonexexa, ni yiiwaka, khaniiwa, hata khaaniiwexexa.’

¹⁴ Mwa yaawo aakwaniheriwa masu a mprofeeti Yesaya owo eenraawe: ‘Nyuwo mahuku ootheene muneera mwiiwaka, mene khamurwa mwiiwexexa, mahuku ootheene muneera moonaka, mene khamurwa moonexexa.’

¹⁵ Vano mirima sa muloko ola saathatuwa soohipwattha, waakhalano maaru oolipa ni maitho ookhuneeleya. Wahaari hiihaawo, yaahereke woona ni maitho, wiiwa ni maaru, wiiwexexa ni murima ni orukunxa murima, ni Miyo kaamwaalamiha.’

¹⁶ Ooreelihiwatho ti maithwaanyu niwoko animoona, ni ooreelihiwa maaruwaanyu niwoko animwiiwa.

¹⁷ Vano Miyo kinooleelani ekhaikhai: maprofeeti ni atthu oororomeleya ancipale yaatthunaxa woona yeeyo munoonaanyu, mene khayoonne. Awo yaatthunaxa wiiwa yeeyo muniiwaanyu, mene khayiiwale.

¹⁸ Tivawo, mwiiwe etaphulelo ya yoolikanyiha ya namwaala:

¹⁹ Mutthu iiwa mutthenga wa omwene ni aahiiwexexa mutthenga ole, mutakhali onimoowa ni onoomwaakha mmiso waaliwe mmurimanimwawe. Ola ti mmiso waaliwe mukerekhere wa ephiro.

²⁰ Mwaha wa mmiso ole waaliwe vamasorosoroni, owo ti yoole mutthu oniiwa masu ni woowaakuveya onaakhelela ni ohakalala.

²¹ Wa soothesene, woonaka weera khanono mukwankhwaari mwaneenaawe, onoopwaherera ehuhu vakhaani paahi. Saakhumelelaka soohooxa, hoye hoye ottharatthariwa niwoko na masu ala, woowaakuveya onoohiya.

²² Mwaha wa mmiso ole waaliwe vanyiiwani, owo ti mutthu yoole oniiwa masu, mene weeteteiya wa okumi ola ni olokottha wa opuha onimvuvura omutatuxaka oohiima.

²³ Woomalihera, mmiso ole waaliwe vatthayani yooreera, owo ti mutthu yoole oniiwa masu ni oniiwexexa. Onnavaha yoohepha: mmiso mmoha sinimwiima imaara ncira, mmiso mukina imaara miloko mithannamosa ni mukinatho imaara miloko miraru.”

Yoolikanyiha ya nakhwali

²⁴ Yeesu aahaathalihera yoolikanyiha ekina eeraka: “Omwene wa wiirimu ori ntoko mulopwana aanle mmiso wooreera mmattamwawe.

²⁵ Vaheera ootheene ekonaka, aahoorwa mwiittanaawe ni aamwaala nakhwaali variyari wa etrigu, ni aapwaha.

²⁶ Etrigu yaathapuruwaaya ni ekhalanaka nyiiwa, nakhwaalitho aamela.

²⁷ Anamiteko a muneene yaahoorwa wa yoowo ni yaaheera: ‘Khamwaanle mmiso wooreera mmattamwanyu? Vano, ongweela woowi nakhwali?’

²⁸ Aawaakhula: ‘Mwiittanaaka opanke yeeyo.’ Anamiteko yaamukoha: ‘Apwiya, muntthuna weera nimuvenxe?’

²⁹ Owo aawaakhula: ‘Hoye! Woomvenxa nakhwali, mmwivenxetho etrigu.

³⁰ Muhiye weera sunnuwe vamoha mpaka ehuhu ya ohepha. Vano, miyo nkiweerele anamahepha weera epacere omuukela nakhwali, emutthukaka irecesene weera sihisiwe. Vahoolowaya nkiweerele weera ethukumanye etrigu ni ethokorore vatathaniwaka.’”

Soolikanyiha sa enuku ya emostarda* ni sa eferementu

³¹ Vano aahaathalihera yoolikanyiha ekina: “Omwene wa wiirimu ori ntoko enuku ya mwiri wa emostarda* mulopwana aakuxalaawe ni aanlaawe mmattamwawe.

³² Erookhalaru ekhaaneene yoopwaha inuku sikina, yunnuwa, onookhala mwiri mutokotoko moota wooweera apalame animoowa ni ampaka ipuurusaya mphandinimwaya.”

³³ Aahaathaliheratho yoolikanyiha ekina: “Omwene wa wiirimu ori ntoko eferementu muthiyana aakuxalaawe ni aatakansenraawe ni ephepa yincipale mpaka yootheene enanyaruwa.”

³⁴ Yeesu aahima itthu sootheene seiya wa atthu ancipale ni soolikanyiha. Kheewo aahimaawe woohikhala ni yoolikanyiha,

³⁵ akwaniheraka hiiho yeeyo aaleeliwaawe ni mprofeeti: “Nkuulume ni soolikanyiha, nkihime itthu saavithiwe okhuma ephattuwelo ya elapo ya vathi.”

Etaphulelo ya yoolikanyiha ya nakhwali

³⁶ Vano Owo aahaahiya atthu ancipale ni aarowa owaani. Oohuseraawe yaamwaattamela Yoowo ni yaamweerela: “Munithalihere yoolikanyiha ya nakhwali mmatta.”

³⁷ Owo aawaakhula: “Owo aanle mmiso wooreera ti Mwaana a mutthu.

³⁸ Ematta ti elapo ya vathi, ni mmiso wooreera ti anamwane a omwene. Nakhwali ti anamwane a mutakhali.

³⁹ Mwiittana aamwaanle nakhwali ti Diyabu* . Ohepha ti emalihero ya ehuhu, ni anamahepha ti andyelo.

⁴⁰ Hiiho ntoko nakhwali onkuxiwaawe ni onghisiwaawe mmooroni, hiihotho eniyeereiye emalihero ya ehuhu.

⁴¹ Mwaana a mutthu anaarumihe andyelowaawe, ni awo eniikhumihe sa omwenaawe sootheene sinaakwattula akina ni ootheene yaawo ampaka sootakhala.

⁴² Awo eniyaavonyere mmooroni, weiwo oneeraaya okhale wiinla ni okhuuriha maino.

⁴³ Vano, atthu oororomeleya eniyaare ntoko nsuwa moomweneni wa Atithaya. Yoowo orino maaru, iiwe!

Soolikanyiha sa muhakhu ovithiwe ni sa nluku noowaaraxa

⁴⁴ Omwene wa wiirimu ori ntoko muhakhu woottittimiheyaxa ovithiwe mmatta. Mutthu mmoha aaphwannyaawe, aavitha emaara yanaaveeli, anarowa ni ohakalala anathumiha sootheene aarinaawe. Vano aathuma ematta ele.

⁴⁵ Omwene wa wiirimu ori ntoko nanakoso onaasaasa maluku oowaaraxa oottittimiheyaxa.

⁴⁶ Aphwanyaka nluku noowaaraxa noottittimiheyaxa, aarowa, anathumiha sootheene aarinaawe, anathuma nluku nne.

Yoolikanyiha ya ntthavi na nikoka

⁴⁷ Omwene wa wiirimu ori ntoko ntthavi na nikoka nimvonyeriwa mphareiyani ni nimvara moota woohiyanahiyana wa ihopa.

⁴⁸ Nisaraka, anamakoka anoopurula ntthavi mpaka mukerekhere wa ephareiya. Vano, anookilaathi ni anoothukumanya ihopa sooreera mmipaparani, mene anooriha seiyo soonanara.

⁴⁹ Hiiho eniyeereiye emalihero ya ehuhu. Andyelo animoowa ni eniyaamwalamwaxe anamatakhala ni oororomeleya.

⁵⁰ Eniyaavonyere anamatakhala mmooroni, weiwo oneeraaya okhale wiinla ni okhuuriha maino.

⁵¹ Nyuwo mohiiwexexa itthu sootheene iya?” Awo yaamwaakhula: “Aani!”

⁵² Owo aaweerela: “Tivawo namawera a nlamulo* ootheene ooxuttihiwa mwaha wa omwene wa wiirimu, onoolikana ntoko mwaneene a vaate onkhumiha mmuhakhunimwawe itthu sooreeraxa sinyowani ni itthu sa khalayi.”

Mprofeeti oohikhalano nttittimiho

⁵³ Amalihaka wuuluma soolikanyiha seiye, Yeesu aavenya vaavaale.

⁵⁴ Aphiyaka esidadaawe, aapacera oxuttiha muloko wa atthu muSinagogani*. Ootheene yaatikhina ni yaakohana: “Singweela woowi mirukusawe ni ikuru seiya sootikhiniheiya?

⁵⁵ Khahiyono Ola Mwaana a kalipinteiro? Khanihiyono nsina na amayawe ole Mariya? Axunneiye khahiyono Yakobe, Yoseefe, Simeyoni ni Yudasi?

⁵⁶ Khaakhanle vamoha ni hiyo axirokoriye ootheene? Woowi Ola ophwannyaawe itthu seiya?”

⁵⁷ Niwoko nenenenno awo yaamuhovela Yoowo. Yeesutho aaweerela: “Mprofeeti ori oottittimihiwa mapuro ootheene, ohikhanle elapwaawe ni vaatevawe.”

⁵⁸ Vano, khaapankewo sootikiniha sincipale niwoko na ohiroromelawaya.