Masu a Miruku 3 - Emakhuwa Bible

Wooperera weera onimuroromela ni onimuttittimiha Muluku

¹ Mwanaka ohittiwale oxuttihawaka, mene othokorore malamulowaaka vamurimani,

² niwoko awo animwaandyeerera okumaawo wa iyaakha sincipale ni animoovaha weetteleya nnene ni murettele.

³ Osivela ni ororomeleya ohoohiyeru; otthukelele muxikomwawo, ni olepe vatthaabwani wa murimaawo.

⁴ Hiiho, weyo onoophwanya murima wooreera wa mpatta wa Muluku ni wa atthu, ni epili yooreera.

⁵ Omuroromele Yave ni murimaawo wootheene ni ohiikhavihereno muupuwelowaawo.

⁶ Omusuwelihe Yave iphirosawo sootheene, ni Owo onimookolela iphirosene seiyo.

⁷ Ohiihelane okhala musuweli; omoove Yave ni osembe yoonanara.

⁸ Eyo enoovaha okumi erutthwaawo elipihaka makhuva.

⁹ Omuttittimihe Yave ni mihakhusawo sootheene ni soowiima soopacera sa soophatteyasawo sootheene

¹⁰ vano matathaawo anoosareiya, ni moosungamwawo eviinyu enoosareiyamo yeeyo.

¹¹ Mwanaka ohinyoose olaka wa Yave naari ohiramuse ohiihawawe,

¹² niwoko Yave onimulaka yoowo onimusivelaawe, hiiho ntoko tiithi ompakaawe wa mwaana onimuhaawelelaawe mpuha.

¹³ Ooreelihiwa ti mutthu omphwanya miruku, mutthu orino mwiiwexexo,

¹⁴ niwoko miruku ti soophureleyaxa opwaha eparatha* ni sinoowineleyaxa opwaha eyuuma yoorikaxa.

¹⁵ Ti sootthuneyaxa opwaha rubi*; sootheene munghaawelaanyu khasinlikanano seiyo.

¹⁶ Moono woolopwana wa miruku wookhala okumi woowaatta; moonowaaya woothiyana sookhala mihakhu ni ottittimiheya.

¹⁷ Iphiro sa miruku ti soosiveleyaxa, ni iphirosaya sootheene ti murettele.

¹⁸ Miruku ti mwiri onimvaha okumi yoole onkhubaarela; ni yoowo omvarexexa onooreelihiwa.

¹⁹ Mmirukunimwawe Yave oopaka mathipelo a etthaya, mwaakhilinimwawe oolipiha erimu vanipuroniwaya;

²⁰ moosuwelanimwawe anaattuuttu oowiixera ampiluwa ni mahutte anttonya nikame.

²¹ Mwanaka, othokorore wuupuwela woorera ni olaka wooreerelaxa; iwo ohoorakamele;

²² niwoko onimooruuhela okumi ni onookhala yoophwaneliha muxikomwawo.

²³ Vano weyo onookuxera ephirowaawo oolipeene ni khookwattuliwa.

²⁴ Wiixaatalelaka, khawoova, ni olohawawo onookhala woomaaleleya.

²⁵ Khoontthuneya woova ehasara yootutuxereya hata ophwata onaaphwanya atakhali.

²⁶ Niwoko Yave onookhala yoororomelihiwaawo ni onoowooceeliha omorela munraakhoni.

²⁷ Wawereya wa weyo, ohihiye ompakela yooreera yoowo omphwanela.

²⁸ Ohimweerele mukhwaawo: “Ohokoloweke omaalo, koovaheke etthu, owereyaka omukhavihera olelo.

²⁹ Ohimvaanelele yoonanara mwaattamanaawo, onkhala moota woororomeleya vakhiviruwawo.

³⁰ Ohimoothere mutthu woohinthowa, owo ahoopakenleru yoonanara.

³¹ Ohihaaweleru sa namapuhera hata ohitakihe mweettelowaawe,

³² niwoko Yave onimuthanya oonanara murima, vaheera oororomeleya ti nthamwenaawexa.

³³ Nlapho na Yave nri mpaani mwa atakhali, vaheera owo onreeliha etthoko ya oororomeleya.

³⁴ Owo onaatthebwa anamatthebwa, mene onaavaha mahala oowiiyeviha.

³⁵ Nttittimiho ti yoohiyeriwa ya asuweli, vaheera Yave ohaasungera alolo wuulihiheya muru.