Masu a Miruku 27 - Emakhuwa Bible

¹ Muhiikuxerereno nihuku na omaalo, niwoko nyuwo khamusuwenle yeeyo ehuhu ya muhoolo eneeraaya eruuhele.

² Akina yoottapaherekeni, ohikhale ni eyanowaanyu; aani atthu akina, ohikhanle nyeenyuweene.

³ Nluku ti noolemela, ni muhaava ti murindi, vaheera onyoonyiwa ontannyiwa ni mulolo ti woolemelaxa opwaha soopiili iyo.

⁴ Onyoonyiwa ti woowuuma murima, ni isara ti soophwata, vaheera taani ongwera ovilela nrima?

⁵ Fataari ohiiha ompakiwa woohikhuwanyeya ohikhanle osivela woowiipithiheya.

⁶ Yoowo omvulaliha moosivelani onoonihera ekhaikhai, vaheera mwiittana onaandyeera ibeecu.

⁷ Yoowo ovonne khanoonelamo oravo, vaheera ovolingwe – mpaka yoowaawa enoomucoocowela.

⁸ Ntoko mwaapalame onxoraxora ottai wa epuuru, ti mulopwana onxoraxora ottai wa etthokwaawe.

⁹ Yoowiixunkheliha ni erubani* singhakalaliha murima; soolaka sa ekhaikhai sa nthamwene sinkhaliha onthamwene wooreera.

¹⁰ Muhimuhiye nthamwenaanyu naari nthamwene a atithinyu; muhirowe vaate wa munninyu munihukuni namakacamiho; fataari mwaattamanaanyuxa ohikhanle wa munna oorakamela.

¹¹ Okhale musuweli mwanaka, ni ohakalalihe murimaaka; hiiho kinoowera omwaakhula yoowo onkinyoosa.

¹² Namiruku onsuwela yoowoopiha anaasaasa wootthawelawo; oohisuwela onrowa ohoolo anakhala moohaawani.

¹³ Mukuxe mukaandyo wa yoowo onimukhavihera namarwa oolinge, ni muthokorore yoowo, owo akhala namakhavihera a muthiyana mmalapo.

¹⁴ Nreeliho nimvahiwa mookhuwelani oxeexeloxa nnaakheliwa ntoko nlapho.

¹⁵ Mwaara ooxupa onlikana ni mattonyo oohihiyerera vanihukuni na epula;

¹⁶ ommaaliha yoowo ori ntoko omaaliha epheyo hoye hoye orika makhura ni matata.

¹⁷ Ntoko eyuuma ennonaaya eyuuma, mutthu onimvoleiha mukhwaawe.

¹⁸ Yoowo onkosoopa mwiri wa ifiigu onimooca soowiimasaya, ni yoowo onimpakela nnene pwiiyaawe, onoopwatthiwa munttittimihoni.

¹⁹ Ntoko ekhove enooneyaaya mmaahini, murima onoonihera okhalawawe mutthu.

²⁰ Okhwa ni ophwata khoomvona, ti hiihotho ahimvonaaya maitho a mutthu.

²¹ Eyuuma yoorikaxa ni eparatha* sinrehereriwa vayikho, vaheera yeeyo onootaawe murima wa mutthu ti ottapaheriwawawe.

²² Naari nyuwo munxilaka mulolo ntoko etrigu muraweni, ololo khoomurakamelaru.

²³ Mwiilipihere weera musuwele nnenesene moota siraaya ikhondoolosanyu, ngwehawehaka nnenesene muhuwaanyu,

²⁴ niwoko mihakhu khasinkhala mahuku ootheene, ni kheewo enroromeliha weera ecireemba ya emwene epwaherere wa ikhapira sootheene.

²⁵ Yaalimmwaka malaxi, enaphuwa makina ni malaxi a mmattumuxani yapheliwa,

²⁶ iputtiputthi sinimoovahani yoowara ni anapunci animoowinihani mutteengo wa ematta.

²⁷ Onoosareya mukaka wa epuri woowoocihani nyuwo ni emusaanyu mpakatho arumeiyaanyu asithiyana.