Masu a Miruku 23 - Emakhuwa Bible

¹ Nyuwo mwaakilaathiki weera muce ni mutokweene, ngwehexexe yeeyo eri ohoolowanyu paahi,

² vano mwavolaxiwa mutheteerele mwaalo vammilo.

³ Muhihaawele sooca sooreerela onoovahaaweni, niwoko iyo okhalaka soolokottha.

⁴ Muhimalihe ikurusanyu mweerelaka okhala thadyiri; mukhaleno iseru soowiixumaaliherano!

⁵ Mihakhu sinoolakaseya hiiho nyuwo munoonaanyu; iyo sinkhalano mapupha ni simvavela osulu ntoko xaaka.

⁶ Muhaakhulele yooca ya muletto namilili, hata muhaakhulele sooca sooreerela onoovahaaweni,

⁷ niwoko owo onuupuwela paahi mutteengo wa seiyo. Owo ongweerelani: “Muceeke ni ngwureke!” Vaheera khanuuluma mweekhaikhaiyini.

⁸ Nyuwo munoorapheya yeeyo muciiyaanyu, ni munoonanariha maswaanyu oosiveleya.

⁹ Muulume ni mulolo, niwoko onoonyoosa miruku sa maswaanyu.

¹⁰ Muhiceendye ineneero sa nyiinaano sa khalayi, hata muhivoleele ittima sa akwaasuni,

¹¹ niwoko Yoowo onaakiha soophwanelasaya ti oolipa, Owo onimoowananani weera aakihe soophwanela sa akwaasuni.

¹² Mulake murimaanyu weera oxuttihiwe, ni maaruwaanyu weera yiiwe masu a esuwelo.

¹³ Muhoovelele omulaka mwaana; nyuwo mwamuttaruxa ni ekopo, owo khakhwa.

¹⁴ Munttaruxe nyeenyuweene ni ekopo, ni hiiho munoomutapuxa mookhwaani.

¹⁵ Mwanaka, murimaawo wakhalano miruku, murimaaka onoohakalala.

¹⁶ Kinoohakalala iyanosawo suuluma ngwookoleleyani.

¹⁷ Ohaakhalele nrima anamattheka, mene omoove Yave mahuku ootheene.

¹⁸ Wapaka hiiho, vekhaikhai sinooweettela nnenesene muhoolommo, ni owehererawawo khawooceeleya.

¹⁹ Mwanaka, wiiwe ni okhale musuweli; ohoolele murimaawo mphironi mooreera.

²⁰ Ohiitakanse ni anamuhapaliwa, naari anamaca,

²¹ niwoko anamuhapaliwa ni anamaca ammalela moosiwani; ni oreesaaya onimwaawariha mattapwatta.

²² Ngwiiwe atithinyu yooyanreni; muhaanyoose amayinyu yuuluvalaka.

²³ Mphwanye ekhaikhai ni muhithumihe; mphwanyetho esuwelo, olakiwa ni miruku.

²⁴ Tiithi a oororomeleya onootthapa ni ohakalala; yoowo orino mwaana musuweli onoomuhakalalela.

²⁵ Atithinyu ni amayinyu ehakalaleke; amayinyu yooyanreni etteeliweke murima.

²⁶ Mwanaka, okivahe murimaawo; maithwaawo ewehexexe iphirosaka,

²⁷ niwoko puuta ti nlitti noowiixera ni muthiyana namararuwa ti ehime yoophureya.

²⁸ Owo ongwiipithela ntoko anamahuhula, ni ompakiha weera asilopwana ancipale ekhale oohiroromeleya.

²⁹ Taani aniithananihera? Taani ariipiwe murima? Taani aniikhupanyera? Taani avulanle makhwatta oohitthuneya? Taani yaaxeenre maitho?

³⁰ Ti yaale aniihiya epuruliwaka ni eviinyu, anaasaasa woohihiyerera othitela soowura soohapala.

³¹ Muhiihiyerere mulokotthiwaka ni eviinyu exeenreene, eceremelaka mukoomixini ni engwuriwa esivaxaka.

³² Ommaleloni, eyo enluma ntoko enowa ni enghapala ntoko evili.

³³ Maithwaanyu animoona itthu soohisuwanyeya, ni mpuwamwanyu munimuupuwela itthu soohookoleleya.

³⁴ Nyuwo mmwilikaneno mutthu onkona eriyari ephareiya, aani ntoko mutthu oniixaatalela osulu wa mwiri mutokweene wa nikula ntokotoko.

³⁵ Ni munimweera: “Aakuuputtha, mene nkoonne ovoreya! Aakimana, mene nkaasuwenle weera koomaniwa! Nkivenye yaakhani mukhoveni weera kiwuretho?”