Masu a Miruku 21 - Emakhuwa Bible

¹ Murima wa mwene onlikana ni mooloko ongwehawehiwa ni Yave; owo onimuhoolela weiwo ontthunaawewo.

² Iphiro sootheene sa mutthu sinimukhalela ntoko sa ekhaikhai, vaheera Yave omphima murima.

³ Opaka ya ekhaikhai ni ya ettiitthu ti yoowaakhuleleya wa Yave opwaha opaka sooveleela.

⁴ Okumi wa yoottheka ya atakhali onooneya mmaweheroni moota woowiixoona ni mmurimani woowiikuxa.

⁵ Soovaanela sa ananthiti sinooruweriha; vaheera soovaanela sa mvai simmalela moosiwani.

⁶ Mihakhu simphwanyiwa ngwoothani ti itthu simvira sipurulelaka wookhwaani.

⁷ Nipuhero na atakhali nimmwaapurula, niwoko ankhootta opaka yeeyo eri ya ekhaikhai.

⁸ Ephiro ya nanthowa ti yookhoromana, vaheera mweettelo wa oohinthowa ti woowookowa.

⁹ Okona vanloothoni na etarato ti wooreera opwaha okhala vamoha ni muthiyana ooxupa.

¹⁰ Yoohaawela ya namariheya ti opaka yoonanara; khanimmorela ikharari mukhwaawe.

¹¹ Namatthebwa aattaruxiwaka, oohisuwela omphwanya miruku; musuweli aaxuttihiwaka, omphwanya esuwelo.

¹² Oororomeleya ongweha empa ya atakhali; owo onaamoroxela atakhali mmathalani.

¹³ Yoowo onttiyela maaru mookhuwelani mwa oohaawa, vano aakhuwelaka khaakhuliwatho.

¹⁴ Ovaha muxiirini onkurunuxa isara, ni makhwankwa amvahiwa wiiphiini ammaliha onyoonyaxiwa.

¹⁵ Yaapakiwaka ekhaikhai, oororomeleya onoohakalala, vaheera atakhali anootteenguwa.

¹⁶ Yoowo onghapuwa mphironi mwa iseru onoophiyera munthukumanoni mwa anamakhwa.

¹⁷ Yoowo omvarexexa soohaawela onoothoiwa; yoowo omvarexexa eviinyu ni soowunkheliha khakhalaru thadyiri.

¹⁸ Mutakhali onthatuwa moopolelo wa oororomeleya, ni oohiroromeleya wa mutthu ookwanela.

¹⁹ Fataari okhala munikareni ohikhanle okhala ni muthiyana ooxupa ni oowaakuva onyoonyiwa.

²⁰ Vaate wa musuweli yookhala yooca ni makhura soothokororiwasene, vaheera mulolo onnanariha sootheene oraaweno.

²¹ Yoowo onaasa ekhaikhai ni ororomeleya omphwanya okumi, ekhaikhai ni ottittimiheya.

²² Namiriku ongwina esidade ya aweri ni omphwata esidade yoolipihiwa anroromelaayawo.

²³ Yoowo onuurela eyanowaawe ni nluminawe onsemba ohaawaxa.

²⁴ Oowixoona ni oowiikuxa oniitthaniwa namatthebwa; owo ontepa waapakela akina moota woowaaronyihela.

²⁵ Nooreesi onkhwa niwoko na ohaawelaxa ni na ohitoko ovara muteko.

²⁶ Mahuku ootheene owo onnahaawelaxa, oororomeleya eeraka ovakulela.

²⁷ Sooveleela sa atakhali ti soothanyeya; wootepaxa saaveleeliwaka ni muupuwelo woonanara.

²⁸ Namoona oowootha onooriheya, vaheera namoona a ekhaikhai onoopwaherera wuuluma.

²⁹ Mutakhali onooneya mukhoveni wiixoonawawe, vaheera oororomeleya onkuxera ephirowaawe ni iseru.

³⁰ Khasiwoworu miruku, hata iseru, naari yoovaanela singwera omvaanya Yave.

³¹ Ekavalu* enreherereliwa nihuku na ekhotto, vaheera owina onrweela wa Yave.