Masu a Miruku 17 - Emakhuwa Bible

¹ Yooreerela ti okhalano ekapatthi yooca vakhaani mmuretteleni ni mummaaleleyoni, ohikhanle mpaani siraayamo ifesta vamoha ni minyakunyaku sincipale.

² Murumeiyi a miruku onoomulamula mwaana a mweettelo woowuuliha muru, ni onookhalano yoohiyeriwa ntoko mmoha a axunna.

³ Eyuuma yoorikaxa ni eparatha* sinrehereriwa vayikho, vaheera ti Yave onoota mirima sa atthu.

⁴ Mutakhali ompwattha iyano soonanara; namootha oniiwelela nlumi noosareya sootakhala.

⁵ Yoowo onaatheya oohaawa onoonihera ohimoonelamo Mpattuxaawe; yoowo onghakalalela erisa khakhala oohittaruxiwa.

⁶ Osuulu ti ecireemba ya anamuuluvala, ni asitiithi ti wiittikha wa anamwanaaya.

⁷ Iyano soowiikuxerera khasinimukhalela nnene mulolo; wootepaxa iyano soowootha wa mulamuli.

⁸ Makhwankwa ti macitta wa yoole omvaha; aneeraawe aroweru sinoomweettela nnene.

⁹ Yoowo onkuttelela yootakhala onoonihera osivela, vaheera yoowo omphitela yeeyo onaamwaraxa asinthamwene ooreera.

¹⁰ Ohiiha omoha ti wooreerelaxa wa mutthu a iseru, opwaha mirepettho ncira wa mulolo.

¹¹ Mutthu oonanara murima onaasaasa ovaanya paahi; tivawo mutokweene oohimorela ikharari aneeraawe arumiheliwe.

¹² Fataari omphwanya ursu* mwa yoowo iiyeriwe axaana, ohikhanle mulolo moololonimwawe.

¹³ Yoowo onaakakhanyiha yooreera ni yoonanara, kheemalaru yoonanara vaatewawe.

¹⁴ Opacera munyakunyaku ori ntoko waaleya mutari; tivawo muulume mulattu owo ohinaaye munyakunyaku.

¹⁵ Omutapuxa mutakhali ti omuthoriha oororomeleya ni eyo ti itthu Yave onthanyaawe.

¹⁶ Enimvareleya eheeni mulolo ovarela musurukhu mmatatanimwawe, eenre owo ahitthunaka miruku?

¹⁷ Nthamwene onsivela mweehuhuni sootheene; ti munna mweehuhuni yoorika.

¹⁸ Mutthu oohiseru oniiwanano omukhavihera mukhwaawe ni musurukhu, athatuwaka namaroromeliha a mukina oolinghe.

¹⁹ Yoowo onsivela waakhulana onsivela yoottheka; yoowo oniixoona onaasaasa ophwateyawawe.

²⁰ Mutthu a murima woonanara khasimmweettela nnene, ni yoowo a nlumi noolokottha ommora moottiluni.

²¹ Mwaana mulolo onruuha othanana paahi; khoowowo ohakalala wa atithawe mulolo.

²² Murima woosareya ohakalala ti murette wa erutthu, vaheera okumi woohooxeya onuumiha makhuva.

²³ Mutakhali onaakhulela makhwankwa wiiphiini weera ahapuxe ephiro ya ekhaikhai.

²⁴ Mutthu a iseru onnoona miruku, vaheera maitho a mulolo anxoraxora mpaka ekotenle elapo.

²⁵ Mwaana mulolo ti othanana wa atithawe ni owaawihereya wa yaale amuyanre.

²⁶ Khoonreera omuttaruxa oohinthowa, hata ongwaxula ophwanenle ottittimiheya.

²⁷ Yoowo onuurela masu ti musuweli, mutthu a miruku onkhala oomaaleleya.

²⁸ Aamaalaka, mpaka mulolo onimooneliwa okhala musuweli ni alamula nluminawe, onimooneliwa okhala a iseru.