Masu a Miruku 14 - Emakhuwa Bible

¹ Muthiyana a miruku onteka ntthokonawe, vaheera oohimiruku omphwata ntthokonawe ni matataawe.

² Yoowo oneetta ngwookoleleyani ommoova Yave, vaheera yoowo ontthara iphiro soolokottheya onoomunyoosa.

³ Otthekula wa oohimiruku oniiruuhela ekopo yoomaneliwano ottuli, vaheera iyano sa asuweli sinnawaakihera.

⁴ Sihinkhalaayawo imombe matatha khaankhala etthu, vaheera ikuru sa emombe sinruuha oruweraxa.

⁵ Namoona a ekhaikhai khanlokottha, vaheera namoona oowootha onsareya soowootha.

⁶ Namatthebwa onaasaasa miruku woohiphwanya, vaheera esuwelo enimurweela wookhweya yoowo orino iseru.

⁷ Mwiirakamelihe ni mulolo, niwoko nyuwo khamumphwanya esuwelo mwa yeeyo aneeraawe uulume.

⁸ Esuwelo ya mutthu a miruku ti okhalela iseru ephirowaawe, vaheera ohimiruku wa mulolo ti woolokottheya.

⁹ Alolo antheya saarehereriwaka soottheka, vaheera eriyari ya oororomeleya wookhala onnene.

¹⁰ Khula murima onsuwela yoowaawaaya, ni khawowo anaakhalele mpatta wa ohakalalawaya.

¹¹ Empa ya atakhali enoophwatiwa, vaheera eheema ya oororomeleya enimweetteleya nnene.

¹² Yookhala ephiro enkhala ntoko yooreera wa mutthu, vaheera ommaleloniwaya enrongha wookhwaani.

¹³ Naari wootheyani onoowereya weera murima onghaawa, ni ongwereyatho weera ohakalala onoomalela woothananani.

¹⁴ Oohiroromeleya anootthuveleliwa mweettelowaaya, vaheera mutthu a nnene onimwaakhela ntthuvelonawe nooreera.

¹⁵ Oohisuwela anaakhulela yakhalaru etthu, vaheera mutthu a miruku onoona nnenesene onnyikalaawemo.

¹⁶ Musuweli ti oowiipasoopa asembaka yoonanara, vaheera mulolo ti oovirikanya ni oohihiiheya.

¹⁷ Noowali ompaka sa ololo ni mutthu oowalaala onoothanyiwa.

¹⁸ Yoohiyeriwa ya oohisuwela ti ololo, vaheera esuwelo ti ecireemba ya anamiruku.

¹⁹ Oonanara murima anookokhorela ohoolo wa atthu a nnene, ni atakhali anookokhorela milako sa atthu a ekhaikhai.

²⁰ Oohaawa ansembiwa mpaka ni aximwaattamanaaya, vaheera asinthamwene a apuhi ti ancipale.

²¹ Yoowo onimunyoosa mukhwaawe onoottheka, vaheera ooreelihiwa yoowo onaapakela onnene oothoiwa!

²² Yaawo anuupuwela soonanara paahi anooyeleela, vaheera yaawo anuupuwela yeeyo eri yooreera amphwanya osivela ni ororomeleya.

²³ Muteko wootheene woovihaxa owineleya, vaheera wuulumaru paahi ohaawiha.

²⁴ Mihakhu sa asuweli ti ecireembaaya, vaheera ohimiruku wa alolo onruweratho ololo.

²⁵ Namoona onuuluma ekhaikhai onoopola okumi, vaheera namoona oowootha ti oolokottha.

²⁶ Yoowo ommoova Yave ookhalano ntthawelo noolipa ni omoova iwo onookhala wootthawela wa anamwanaawe.

²⁷ Omoova Yave ti naattuuttu a okumi, ni onimususiha mutthu mmiraakhoni mwa okhwa.

²⁸ Waatta wa atthu ti ovuwa wa mwene, vaheera ohikhala wa atthu, mwaana mulopwana a mwene ooheleya nthala.

²⁹ Mutthu oovilela onoonihera wiiwexexa, vaheera noowali onoonihera ololo.

³⁰ Murima wa murettele onruuhela okumi erutthu, vaheera nrima nnunttiha makhuva.

³¹ Yoowo onimuhooxa oohaawa onimunyoosa Mpattuxaawe vaheera yoowo onimpakela onnene oothoiwa onimuttittimiha Muluku.

³² Yaaphiyaka ehasara, atakhali anoophwatiwa; wa soothesene, mpakatho mookhwaani oororomeleya anoophwanya ntthawelo.

³³ Miruku simmaka mmurimani mwa anaseru – mpaka eriyari ya alolo iyo sinimwiisuweliha.

³⁴ Ekhaikhai enunnuwiha elapo, vaheera yoottheka ti wuuliha muru wa miloko sootheene.

³⁵ Murumeiyi musuweli onimusiveliha mwene, vaheera yoowo oneetta ngwuuliheyani muru oniiruuhela isara sa mwene.