Masu a Miruku 12 - Emakhuwa Bible

¹ Ootheene ansivela olakiwa ansivela esuwelo, vaheera yoowo onthanya ohiihiwa ti mulolo.

² Mutthu a nnene onimusiveliha Yave, vaheera Yave onoomuttaruxa yoowo omvaanelela soonanara.

³ Khaawo ongwera wiilipihera mootakhalani, ni khoongwereya omphela oororomeleya.

⁴ Muthiyana a ethoonyero yooreera ti ecireemba ya aiyawe, vaheera muthiyana a mweettelo woowuuliheya muru ti ntoko eretta mmakhuvanimwawe.

⁵ Soovaanela sa oororomeleya ti soowookoleleya, vaheera ikano sa atakhali ti soolokottha.

⁶ Masu a atakhali ti mwiipithelo oniiva, vaheera oororomeleya yuulumaka, wookhala otapuxeya.

⁷ Atakhali anoophwatiwa, enalakaseya, vaheera ntthoko na oororomeleya nimpwaherera noolipanene.

⁸ Mutthu onttittimihiwa ottharihiwaka mmirukunimwawe, vaheera yoowo ori a murima woonanara onoonyoosiwa.

⁹ Fataari okhala oohittittimiheya, okhalanneene oowoorumeela, ohikhanle wiixeera oottittimimeya ohikhalanaka yooca.

¹⁰ Oororomeleya onkosoopa nnenesene mihuwosawe, vaheera mpaka ipakelo sooreera sa atakhali simmalela mooxililini.

¹¹ Yoowo onlima mmattamwawe onooruwera, vaheera yoowo ontthara ethiru, khanono miruku.

¹² Atakhali anghaawela soohuhula sikuxiwe ni oonanara murima, vaheera mukwankhwaari wa oororomeleya onimwiima.

¹³ Mutakhali ompharihiwa muntaphani mwa ngwoothanimwawe, vaheera oororomeleya onoowera wiitapuxa mmakacamihoni.

¹⁴ Mutthu onaakhela mureerelo mwa soowiima sa eyanowaawe, ni miteko sa matataawe onootthuveliwano.

¹⁵ Ephiro ya mulolo enimukhalela ntoko yoororomeleya, vaheera musuweli oniiwa soolakiwa.

¹⁶ Mulolo onoonihera woowaakuveya onyoonyiwawawe, vaheera mutthu a miruku khanghelela oveihiwawawe.

¹⁷ Namoona a nnene onkhalela onamoona woororomeleya, vaheera namoona oohiroromeleya onthaliha soowootha.

¹⁸ Aakhala masu amvulaliha ntoko ekatana, vaheera nlumi na asuweli ninruuha olama.

¹⁹ Iyano singhima ekhaikhai simpwaherera mahuku ootheene, vaheera nlumi noowootha ninkhala ehuhu vakhaani.

²⁰ Olokottha ori vamurimani wa yaale anuupuwela soonanara, vaheera ohakalala ori eriyari ya yaale ankhaliha murettele.

²¹ Kheewoworu yoonanara eneera emphwanye oororomeleya, vaheera atakhali aasareya milattu.

²² Yave onthanya iyano soowootha, vaheera onaahakalalela yaawo anuuluma ekhaikhai.

²³ Mutthu a miruku onnakhuwa osuwelawawe, vaheera murima wa alolo ongyeeha ololo.

²⁴ Matata amvara muteko anoolamula, vaheera anooreesi anoomalamalela mpotthani.

²⁵ Murima wookacamiheya onnamuthananiha mutthu, vaheera nsu nooreerelaxa ninnamuhakalaliha.

²⁶ Mutthu oororomeleya ti oomaaleleya moonthamwenenimwawe, vaheera iphiro sa atakhali sinaarongha wooriheyani.

²⁷ Nooreesi mpaka khanaaneela yoolupatthaawe, vaheera namavara muteko onnoonelamo sooreelasawe.

²⁸ Okumi ori mphironi mwa ekhaikhai; mphironi mmo khoomomo okhwa.