Masu a Miruku 1 - Emakhuwa Bible

Masu oopacera

¹ Ala masu a miruku a Salomoni, mwaana mulopwana a Davide, mwene a oYixrayeli:

² Iyo sinimookhaviherani makhalanelo miruku ni olakeya; masuwelelo masu amvaha wiiwexexa;

³ okhala oolakeya ni mmirukuni, mpakaka yeeyo eri ya ekhaikhai, ya nnenesene ni yoowookoleleya.

⁴ Sinookhavihera waavaha mapakelo yaale ahingwera, saavahaka esuwelo ni iseru sooreera amiravo.

⁵ Namiruku awiriyaneke aandyeereraka osuwelawawe, ni yoowo orino miruku aakheleke weetteleya nnenesene

⁶ weera iiwexexe masu a miruku ni maphwanaphwaniho, andiisi ni ithale sa asuweli.

⁷ Omoova Yave ti mathipelo a esuwelo, vaheera alolo khaanoonelamo miruku ni olakiwa.

Wooperera wa miruku

⁸ Mwanaka, wiiwe mahusiho a atithawo ni ohinyoosere onxuttihiwaawo ni amayawo.

⁹ Awo eniikhale yoophwaneliha mmuru ni muxikomwawo.

¹⁰ Mwanaka, oonanara murima yeerera woohapuxa, ohiwaakhulele.

¹¹ Yeera: “Haya nrowe; niipithele ephome yoohinthowa; nrowe nitthekule niwiipithelaka yaale ahinnihovelaru;

¹² nrowe naamire akumi ntoko nihiye nnaamiraaya anamakhwa; aani naaphwate apurukuma, ntoko amphwatiwaaya yaale ankhuruwela munlittini.

¹³ Nnoophwanya itthu sootheene sootthuneyaxa ni nnoosariha mpaanimwahu seiyo niiyalaahu.

¹⁴ Mwiitakansere mmukuttulanimwahu; nikawaneke mipatta soolikana sootheene nneeraahu niphwanye.

¹⁵ Mwanaka, ohivire mphironi sa atthu awo! Osusihe inaawo mphironi awo ankuxeraaya,

¹⁶ niwoko inaawosaya sintthimakela opaka yoonanara; ari oolikaneene oyeeha ephome.

¹⁷ Mooteene yoowo ohimvareleyaaya muteko oreya ntthavi ipalame soonaka,

¹⁸ hiihotho asilopwana awo khaansuwela weera aniixiipithela wa ephomaaya asineenaaya; anreela muraakho inaawosaya!

¹⁹ Iwo ti ommaleloni wa anamahaawela; yoole oneetta moota owo, oniiphwata muneenaawe.

Wiitthana wa miruku

²⁰ Miruku sinkhuwelaxa mmiseweni, aani mmapuwani amviraxiwa;

²¹ mmattuumbani a misewe soonyakuleleya iyo sinkhuwela, mmilakoni sa esidade sinlaleiya:

²² “Nyuwosa muhisuwenle opaka yooreera, mpaka yaakhani muneeraanyu mpwaherere ni ohisuwelawanyu? Nyuwosa anamatthebwa, mpaka yaakhani muneeraanyu muhakalalele otthebwawanyu? Ni nyuwosa alolo, mpaka yaakhani muneeraanyu muhoonele esuwelo?

²³ Mwiiwelela ohiihawaka, Miyo kinimoovahani munepa wa miruku ni kinimoothupululelani soowuupuwelasaka.

²⁴ Wa soothesene, nyuwosa mookhootta wiitthanawaka; khaawo aapwatthenle kookonlaaka moonowaaka!

²⁵ Mweenre muhoonelarumo olakawaka ni muhitthuna waakhulela ohiihawaka,

²⁶ wa mpattaaka, Miyo kinootthebwa erisaanyu; kinootheya nihooxo noophwanyakani

²⁷ woomanakani woova ntoko ettheku, erisa yoophwanyakani ntoko eyuupuru ni othanana ni ovalavela wootepelakani.

²⁸ Vano awosa anookiitthana, mene nkaakhula; anookaasa, mene kheekiphwanya.

²⁹ Yeenre ethanya esuwelo ni ekhootta wooveya wa Yave,

³⁰ ehitthunaka waakhulela olakawaka ni ehipwatthelaka woopererawaka,

³¹ animooca yoowiima ya mweettelowaaya ni anoovona sa mapakelowaaya.

³² Vano oceendyaceendyeya wa oohisuwela onoowiiva, ni ohipwattha wa alolo onimwaaphwata;

³³ vaheera yoowo anaakiiwe onookhala oolipeene ni oomaaleleya, ahoovakaru yakhalaru yoonanara.